Vaaia o se sootaga
O Chen, Yang Su-yuan sa tauaso talu mai le 1981, ina ua oo i ni tulaga faigata i le maea ai o se taotoga o tu i ona mata. Ae o le po o lana vaai na fesoasoani ia te ia e maua ai le talalelei ma iu ai ina fesoasoani na te iloa ai le taua o galuega o le malumalu ma talafaasolopito o aiga.
E le’i leva ona tauaso, ma e le’i iloa e Tuafafine Chen o tamaitai talavou e toalua sa i luma o lona faitotoa na talosaga mo se ipu vai, o faifeautalai. O le valaauliaina o i laua i totonu na faia ai le suiga atoa i lona olaga.
“O le toatele o tagata e manatu o au e leai so’u aoga ona ou te tauaso,” o le tala lea a Tuafafine Chen. “Ae le o le mea lena na finagalo le Atua e tau mai ia te au. Na Ia auina mai faifeautalai ina ua po lau vaai e aoaoina au o i tatou uma o fanau a le Atua, ma na Ia faatauina i tatou i se tau maoae. Na ou iloaina lo’u taua ona o le tau na totogiina e Iesu. Ou te taugata tele.”
Talu mai lena taimi, ua tautua ai Tuafafine Chen i le tele o valaauga i le Uarota a Chung Li Muamua, Siteki a Tao Yuan Taiwan, faapea foi ma le auauna atu i le malumalu mai lava i le 1992.
Ae o le po o lana vaai o le a le na o le pau lea o le tofotofoga o le a feagai ma Tuafafine Chen. I le 1987 na toeitiiti lava a maliu ai ina ua maua se fula tele lea na manaomia ai le aveesea o se ivi asoaso. Na soifua pea o ia, ae o pili a le falemai na mama ai lana teugatupe o le olaga. Sa mafaufau o ia, pe aisea na le aveina atu ai o ia e le Atua.
Fai mai a ia, o Lana tali o le, “E tele ni au mea o totoe e tatau ona fai.”
E le’i umi, ae ona lagonaina le valaau mo talafaasolopito o aiga.
“Sa ou manatunatu pe o le a faapefea ona ou faia galuega o gafa pe afai e le mafai ona ou pupula?” o lana tala lea. “Ae sa le aluese ai lava le lagona.”
Faatasi ai ma se fesoasoani a se uo pele, sa ia mauaina ai augatupulaga e 22 o le laina autu o lona aiga ma faia sauniga uma mo tamaitai e ia lava. O loo galue nei o ia i lala o lona gafa faaleaiga. I le aluga o le olaga, ua ia talisapaiaina ai le sootaga e le mavavaeeseina i le va o galuega o le malumalu ma talafaasolopito o aiga.
“E tele sauniga tatou te maua i totonu o le malumalu, ma e taua uma lava,” o le tala lea a Tuafafine Chen. “Ae e tatau lava ona fai o tatou talafaasolopito o aiga. E le mafai ona tatou tuuina atu nei sauniga i o tatou augatama e aunoa ma le faia o o tatou gafa.”
“O talafaasolopito o aiga ma galuega o le malumalu o se galuega e tasi,” o le saunoaga lea a Elder Dennis B. Neuenschwander o le au Fitugafulu. “O sailiga o talafaasolopito o aiga e tatau ona avea ma punavai muamua o igoa mo sauniga o le malumalu, ma o sauniga o le malumalu o le mafuaaga muamua lea mo le sailiga o talafaasolopito o aiga.”1
O loo tauivi nei Tuafafine Chen ma se faama’i fou ma se aafiaga i le mavae ai o le oso faafuasei o le ma’i fatu. O le luasefulu tausaga talu lana olega muamua i le Atua pe aisea na tuua ai o ia, ua ia toe fesiligia ai foi lea lava fesili—ma maua ai le tali lava e tasi. Na ia lagonaina e pei na fetalai mai o Ia “Ou te le’i tauina atu foi ia te oe? O loo i ai lava galuega o le malumalu e tatau ona e faia.”
Ma o loo faaauau pea ona faaalu e Tuafafine Chen le vaiaso e tasi o masina taitasi i le malumalu.
“O mea nei e tatau ona tatou faia mo o tatou augatama ia e le mafai ona latou faia mo i latou lava,” o lana tala lea. “I lo’u tulaga, ou te le mauaina ia tautinoga mo le taimi e pei ona i ai i isi tagata e faigaluega ma mea faapena. E manaomia lo’u galue malosi i le taimi nei a o o’u mafaia.”