O Se Auala i le Lotu
Ina ua fitu ou tausaga, na faauo ai e lo’u tina ma lo’u tama se aiga e le toaaga i le lotu o le matou uarota, na aofia ai se tina nofofua ma lana fanau tama e toalua. O i maua ma lo’u uso matua o Ioane matou te tupulaga lelei ma tama e toalua o Robin ma Shannon, o lea na foliga talafeagai ai le tuu atu o se lima o le faaaumea.
Na leai se taavale a le aiga, o lea na ofo atu ai lo’u tama e piki mai i latou mai lo latou fale i se nuu e le mamao ma ave ma aumai i latou mai le lotu. Ou te manatua aso na valaauina ai i maua ma lo’u uso matou te o e piki mai i latou. Sa ou le manao ai i lena taimi, e tiga lava ona ou tomumu, ae sa faaauau pea ona ave ma aumai i latou e tama seia oo ina latou toe toaaga i le lotu ma maua la latou lava taavale. E le’i umi ae papatisoina ma faamauina Robin ma Shannon, na amata ona auai lo la tina i le Aualofa. Ou te le’i iloaina i lena taimi ia aafiaga lelei o le a faapea ona oo mai ona o lenei faatinoga o le auauna atu.
I ni nai masina ae ou te le’i amata i le vasega valu, na maliu ai lo’u tama. O le mea na atili ai ona ou faanoanoa, ona sa ou le mautonu i ou foliga faaletino ma le leai o ni uo. Na amata ona ou gauai atu i lagona o le leai o se faamoemoe, ma na ou faaaluina taimi o le malologa ou te savali atu ai i le fale ma toe sau ona sa ou le fia nofo toatasi.
O le tausaga lava lena, na siitia mai ai le aiga na matou faauoina i le itu o le matou aoga, ma na amata ona aoga Shannon i la’u aoga. Na vave lava ona avea i maua ma se uo. Na ou lagonaina le taliaina, ma ou te le’i toe faanoanoa lava. O le iloaina sa fiafia se tasi e avea ma au uo, na faateleina ai lo’u lagona mautinoa ma lo’u lava taua. Sa ou le toe nofonofo na o au i le taimi o la’u malologa.
Na atili mafana le ma faauoga i le aoga maualuga. Ina ua o atu o ma uso matutua i kolisi ma misiona, na avea i maua ma Shannon ma se uso fai. Na maua a maua Taui Aeto o le Sikauti i le faapipiiga pine lava e tasi a le sikauti, o atu i le iunivesite e tasi, o atu i ni misiona i le taumafanafana lava e tasi, ma mulimuli ane sa ma potu faatasi. Sa ma faaipoipo uma i le Malumalu o Sate Leki i ni tamaitai lelei, ma o a ma ulumatua e tolu masina na va ai le fanau mai o le tasi ma le isi.
O se tasi afiafi a o lata i le faaipoipoga a Shannon, na amata ai ona ma talanoa e uiga i aso a o ma laiti. Na ou tauina atu ia te ia le ala na fesoasoani ai e foia lo’u le mautonu ma taulima ai le maliu o lo’u tama. Na ou faaopoopo atu, o lana faauoga na fesoasoani e toe faasagatonu ai lo’u olaga. Na faapea mai Shannon, ana faapea e le aveina ma aumai e lo’u tama lo latou aiga i le lotu, semanu e le alu atu o ia i le lotu, faia se misiona, ma faamauina i le malumalu.
Na malosi le pai mai o le Agaga ia te au i le taimi o lena talanoaga a o ou iloaina ia faamanuiaga na faia i o maua olaga e lena tietiega faatauvaa i le lotu. A o ou mafaufau i le faauo a Shannon, na ou iloaina ai, e le gata ina fesoasoani lo’u tama e laveai mai le aiga o Shannon, ae na ia saunia foi se uo o le na fesoasoani i lona lava atalii.