Ua Faasilasila Mai le Malumalu mo Manaus, Pasila

Na faasilasila mai e le Au Peresitene Sili i se tusi i taitai perisitua Pasila i le aso 23 o Me, 2007 ia fuafuaga e fausia se malumalu i Manaus, Pasila.

“Matou te faamalo atu i le Au Paia mo lo outou tuuto ma le faamaoni, ma e faafetai mo faamanuiaga o le a oo mai ia i latou e ala i le fausiaina o lenei malumalu fou,” o le saunoaga lea a le Au Peresitene Sili i le tusi.

Afai e maea, o le a avea le Malumalu o Manaus Pasila ma malumalu lona ono i Pasila. O siteki e aofia ai i le itu o le malumalu o le a faasilasilaina mai i se taimi mulimuli.

Faatasi ai ma malumalu ua fausia e latalata i le talafatai i saute ma sasae o Pasila, e tatau ai i nisi o tagata o le Ekalesia o loo nonofo i vaega tutotonu po o matu o Pasila ona faimalaga atu mo le silia ma le afe maila (1600 km) ina ia auai i le malumalu sili ona lata ane.

“Matou te mautinoa o le a avea lenei ma se faamanuiaga i le toatele o le Au Paia faamaoni i nei eria o loo taulalata mai o e sa malaga i se mamao ina ia olioli i faamanuiaga o le malumalu,” na saunoa ai le Au Peresitene Sili.

O le taimi nei e 124 malumalu o loo faagaoioia i le lalolagi, faatasi ai ma le 6 o loo fausia nei ma le 6 ua faasilasilaina mai, e aofia ai le malumalu o Manaus.

O le uluai malumalu i Amerika Latina na fausiaina lea i São Paulo, Pasila, i le 1978, a ua faatoa 54,000 lena o le faitau aofai o tagata o le Ekalesia. Na pulefaamalumalu ai Peresitene Spencer W. Kimball (1895–1985) i le sauniga o le maatulimanu. Na toe faapaiaina e Peresitene Gordon B. Hinckley le malumalu o São Paulo i le 2004 ina ua mavae ona toe faafouina.

I le faaiuga o le 2005 ua 928,926 tagata o le Ekalesia i Pasila, lea ua avea ma nofoaga o ni malumalu faaopoopo se tolu i aai o Recife, Porto Alegre, ma Campinas. O le Malumalu o Curitiba Pasila, lea na amata ona fausiaina i le 2005, ua faamoemoe e faamaeaina i le tausaga a sau.

I se asiasiga talu ai nei i Curitiba, na folafola atu ai e Elder Russell M. Nelson o le Korama a Aposetolo e Toasefululua i tagata o le Ekalesia, “Afai tou te saunia e o atu i le malumalu ma faia sauniga mo outou lava ma o outou tuaa, o le a outou fausia se molimau o lenei galuega, lea semanu tou te le ausiaina.” Na ia saunoa foi, “Atonu e faigofie atu ona fausia se malumalu nai lo le sauniaina o tagata mo se malumalu.”