Mo Le Malosi o Oe: O Se Talanoaga ma le Au Peresitene Aoao o Tamaitai Talavou

O le au peresitene aoao o Tamaitai Talavou—Susan W. Tanner, peresitene (ogatotonu); Julie B. Beck, fesoasoani muamua (tauagavale); ma Elaine S. Dalton, fesoasoani lua (taumatau)—ua saunoa e uiga i auala e mafai ai ona fesoasoani matua ma taitai i le autalavou e faateleina lo latou naunau ma tautino e ola i tulaga faatauaina o le talalelei. Talu mai le faatalanoaga, ua valaauina ai Sister Beck e avea ma peresitene aoao o le Aualofa, ma ua valaauina ia Mary N. Cook i le au peresitene aoao o Tamaitai Talavou.

O le a se mea e mafai ona taulai atu i ai matua ma taitai pe a talanoa atu i le autalavou e uiga i tulaga faatauaina?

Sister Susan W. Tanner: I le avea ai ma se au peresitene o loo i ai sa matou anavatau: “E mafai ona ou faia mea faigata.” Na fautuaina e lo matou faufautua faaleperisitua o Elder John B. Dickson, ina ia matou suia i le “A ou iloa o ai au, e mafai ona ou faia soo se mea e fetalai mai ai o Ia ou te faia.” E malosi lava lo latou lagona e faapea, afai e malamalama le autalavou i o latou faasinomaga i le avea ai ma fanau a le Atua, o le a faapea ona latou tausia tulaga faatauaina. O le manatu i lo latou faasinomaga o le a tuuina atu ai ia i latou le lagona mautinoa o le tagata ia te ia lava.

Sister Elaine S. Dalton: O le talanoa e uiga i tulaga faatauaina e le faatatau i tulafono; o tulaga faatauaina e faatatau i le agavaa mo le mafutaga a le Agaga Paia. O tulaga faatauaina e faatatau i le tutu i mea paia ina ia e agavaa ai e maua le mafutaga a le sui lona tolu o le aigaAtua. O le a avea o Ia ma ou taitai i le ala a o e ulu atu i le papatisoga ma le faamauina—o le ala e oo atu ai i le malumalu.

Sister Julie B. Beck: Ou te manatuaina se tagata faasalalau o le na faitioina o tatou tulaga faatauaina e faapea ua faasasa tele. Sa ia faitauina le tusi o le Mo Le Malosi o le Autalavou, ma sa manatu o ia e faatatau uma lava i tulafono. O lea na ou talanoa atu ai ia te ia e uiga i le saogalemu ma filifiliga, ma na ou faaaogaina ai upu o le tuufau ma le saoloto ma le puipui. Na ou faapea atu, mo se faataitaiga, afai e tausia e se tamaitai talavou o matou tulaga faatauaina o le le inu ava malosi pe faaaoga fualaau faasaina, o le a le avea lava o ia ma se pologa i na mausa. O le a saoloto o ia, ma o le a faateleina lona mafai ona faia filifiliga aua o le a le ia te ia le faafitauli o le fai ma mausa. Na amata ona luelue le ulu o le tagata faasalalau ina ua malamalama o tulaga faatauaina e le o se pa e taofiofi ai i tatou i totonu. O tulaga faatauaina o mea ia e fesoasoani tatou te o atu ai ma galulue i le malosi atoa i se lalolagi ua tumu i filifiliga. E mafai ona tatou saofaga i lenei lalolagi ma ola i ni olaga fiafia ma faamanuiaina aua o loo puipuia i tatou.

E mafai faapefea ona faaofi e matua ma taitai ia tulaga faatauaina i loto o le autalavou?

Sister Tanner: O nisi taimi tatou te vaai ai i faigata o loo feagai ma le autalavou ma oo mai ai se vaaiga lata mai nai lo se vaaiga mamao. E manaia le faitau i le Mo Le Malosi o le Autalavou e vaavaai ai mo ni folafolaga; e manaia le faitau i tusitusiga paia e vaavaai ai mo ni folafolaga. Soo se taimi lava e apoapoaiina ai i tatou e faia se mea, e masani lava ona mulimuli mai ai ma se folafolaga. O matua ma taitai o e na ola i tulaga faatauaina o ni faataitaiga lelei ia. E mafai ona iloa e le autalavou na tutupu ni mea lelei i o tatou olaga, na faapea ona tatou faavaeina ni aiga e faavavau. O folafolaga na o loo faataunuuina i o tatou olaga.

Sister Dalton: Ou te le’i fetaui lava i se tagata e le’i manao i folafolaga o loo i le Mo Le Malosi o le Autalavou: “O le a mafai ona e faia i le poto ma le tomai e sili atu galuega o lou olaga,” ma o le a mafai ona e “onosaia tofotofoga i se lototele e sili atu,” “o le a e maua le fesoasoani a le Agaga Paia,” “o le a e maua le lagona lelei e uiga ia te oe lava,” “o le a avea foi oe ma faatosinaga lelei i olaga o isi,” ma “o le a e agavaa e alu i le malumalu” (2–3).

Sister Beck: Afai e te le ma i faamanuiaga, e le mafai foi ona e ma i le mea na mafua ai ona e maua ia faamanuiaga.

Sister Dalton: O nisi taimi e manatu ai matua o se tulaga faatauaina o se mea faatauvaa. Latou te faapea mai, “o le a ou le tau i lena taua pe oti i luga o lena mauga.” Ae e le faatatau i ni mauga; e faatatau i le paia. O se tulaga faatauaina e faatatau i le malamalama o ai oe i le avea ai o se atalii po o se afafine o le Atua.

E mafai faapefea ona faatoilalo e matua ma taitai le mata’u i le faaitaina po o le le fiafia o le autalavou?

Sister Beck: Ou te mafaufau i nisi o mau: “Aua e te fefe ia te i latou: aua ou te ia te oe” (Ieremia 1:8) ma le “Ina tatala ia lou gutu, o le a faatumuina” (Mose 6:32). O loo faamoemoe mai le Alii i Ona taitai—ma o matua uma lava o se taitai—ia tautala atu i le faamaoni.

Sister Tanner: Ua tau mai e le Mataupu Faavae ma Feagaiga vaega e 121 le vaega lena pe a “aoai faamalosi atu i aso e tatau ai,” e te faaali atu “mulimuli le alofa faateleina” (f. 43). Afai e iloa e le autalavou e te alofa ia i latou, o le a sili atu lo latou naunau e faalogo. Ma afai foi e te tulitatao atu ma lo’u alofa, e mafai ona e fai atu ni mea faigata.

Sister Beck: Ou te manatu ua tatou manatu faatauvaa i le autalavou. Ua i ai i latou i tausaga e sailiili ai—o tausaga [e fesilisili ai] pe “aisea”. E i ai se mafuaaga o lena mea: e finagalo le Alii ina ia latou mauaina a latou lava molimau. O le galuega a taitai ma matua o le tuuina atu ia i latou o ”mafuaaga“ faavae ma ia lagolagoina tulaga faatauaina e ala i le aoao atu e uiga i mafuaaga mo i latou. Ou te manatua ni a ma talanoaga ma la’u tama teine e uiga i ofu i le Aso Sa. Na ou faamatalaina i ai o’u lagona i le faiga e tatau ona fai ai ona lavalava e alu atu ai i sauniga faamanatuga. Na ou aoaoina foi o ia e uiga i le faamanatuga ma tuuina atu la’u molimau i le mafuaaga tatou te o ai i le lotu. Sa faia ma le alofa. Na te le’i suia le faiga o ona lavalava i lena Aso Sa po o le vaiaso na sosoo ai. Ae e le’i umi ae ona faaaogaina se faiga e sili atu ona aloaia na fai ai ona lavalava mo le sauniga faamanatuga. Sa ou onosai lava a o ia mauaina lana lava faamaoniga [i mea na aoaoina ai o ia]. Ma e le’i toe foi lava o ia i le faiga o ona lavalava sa faia ai muamua. Sa aoaoina o ia i le aoaoga faavae, ma na taliina ai lana fesili pe “aisea”.

E mafai faapefea ona fesoasoani le Mo Le Malosi o le Autalavou i matua ma taitai e taliina ai fesili o le “aisea”?

Sister Tanner: Ou te fiafia lava i le Mo Le Malosi o le Autalavou aua o loo faavae i aoaoga faavae. O aoaoga faavae o upumoni ia e faavavau, na faatulagaina mai a o le’i faavaeina le lalolagi. Ma o tulaga faatauaina o loo faavae i luga o aoaoga faavae, ma o le a le suia lava foi ia tulaga faatauaina. E le o se mea na fatuina e tagata matutua e le malamalama i olaga o le autalavou ina ia faafaigata ai le olaga. O loo taua mai i le Mo Le Malosi o le Autalavou ia aoaoga faavae ma tulaga faatauaina masalo e sili atu ona manino nai lo se isi lava punaoa. O loo talanoa mai foi e uiga i taunuuga. Ina ia mafai ona e iloa mea e ta’u o upumoni e faavavau, po o a mea e tatau pe le tatau foi ona tatou faia, ma mafuaaga e tatau ai pe le tatau ai ona tatou faia. O lenei tusi e mafai ona avea ma se fesoasoani tele i matua. O nisi taimi pe a ou mafaufau, “Ou te manao e faamalamalama sao lenei mea i ni upu e malamalama gofie,” ou te faaaogaina ai lena tusi, ma o le manatu o loo ou manaomia o loo otootoina i se fuaiupu.

O a nisi auala e mafai ai e matua ma taitai ona faaaoga le Mo Le Malosi o le Autalavou?

Sister Beck: E mafai ona outou talanoaina i afiafi faaleaiga se tulaga faatauaina e tasi i le taimi, ma faailoga le aoaoga faavae, o tulaga faatauaina, ma taunuuga o vaega taitasi. Afai o se faiaoga i le lotu, e mafai ona e faaaogaina i soo se lesona. Na fesoasoani foi ou te taulotoina ai nisi o fuaitau autu na ou manao lava e faamamafa, ma na ou iloa ai, a ou talanoa atu i le autalavou, e faigofie lava ona ou manatuaina na fuaiupu.

Sister Dalton: Mo se faataitaiga, o se tasi o fuaitau autu o le “E manao Satani ia e manatu e le mafai ona e salamo, ae peitai …”

Sister Dalton ma Sister Beck, faatasi: “… e matua le moni lena tulaga” (30)!

Sister Tanner: O le autalavou e masani lava o faiaoga sili ia o isi talavou. O se tasi mea matou te fiafia lava e fai pe a matou talanoa atu i le autalavou o le tufa atu o se tusi o le Mo Le Malosi o le Autalavou i nisi o tagata talavou ma faapea atu, “Ou te manao e te filifili mai se tasi o nei tulaga faatauaina ma i ni nai minute ia fai ai se lauga puupuu e faatatau i ai.” E tele ni lauga e tofi faafuasei na ou maua na faatumulia ai le potu i le Agaga. A faasoa mai e le autalavou o latou aafiaga ma tuuina mai a latou molimau, latou te lagonaina le Agaga ma amata iloa ai le mana o le tusi.

Sister Beck: O le faia o se afiafi o tulaga faatauaina e tasi i le tausaga ua le lava lea. E mafai ona tatou faaaogaina le Mo Le Malosi o le Autalavou i tolauapiga; e mafai ona tatou faaaogaina i konafesi a le autalavou faapea foi i tulaga aloaia ma le aloaia. O se punaoa e tatau lava ona i ai i luma o o tatou autalavou. Ma e tatau foi ona ola ai matua ma taitai. E le mafai ona avea oe ma taitai e ta’u atu i le autalavou ia tifaga e aloese mai ai, ae alu oe matamata ai i na tifaga. E le mafai ona avea oe ma tina o le fai atu, “Aua le ofuina lena ofu e le tauagafau,” ae o loo e ofuina se ofu e le tauagafau. E le mafai ona avea oe ma tama e fai atu, “Totogi lau sefuluai,” ae e te le totogiina lau sefuluai.

Ma pe i ai ea se matafaioi a le Mo Le Malosi o le Autalavou mo tagata e le o ni autalavou?

Sister Dalton: Ou te tauina o le Mo Le Malosi o “Oe.” E faatatau ia i tatou uma lava.

Sister Beck: O loo i ai lo’u igoa i luga o la’u kopi, ma ua faailogaina mo au. O tulaga faatauaina e le faapitoa i se itupa po o se matua; e mo le fanau a le Atua.

O a nisi o faamanuiaga vave maua tatou te maua e ala i le ola i tulaga faatauaina a le Alii e pei ona aoaoina i le Mo Le Malosi o le Autalavou?

Sister Dalton: Filemu o le mafaufau.

Sister Beck: O le mafutaga a le Agaga Paia.

Sister Dalton: Ma lagona mautinoa o le tagata ia te ia lava. E ogatasi ma le autu a le Mutuale 2007: “Ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua” (MFF 121:45). O na faamanuiaga vave maua e taua ona o nisi taimi e mafaufau ai le autalavou, “Afai ou te filifilia le mea lenei, o le a leai ni au uo.” O le mea e faanoanoa ai, e iu ina sao lena mea.

Sister Tanner: Na sao mo au i le vasega fitu. Sa ou faamaoni, na feteenai ma se mea na mananao se vaega lauiloa o teineiti ou te faia. Ae ona o lena mea, na leai ai ni au uo, ma sa ou faanoanoa, na ou maua le lagona mautinoa o le mea na ou faia na sao. Ma ou te mautinoa o le mea lena na lagolagoina au mo se vaitaimi. Na ou iloaina e mafai ona ma faafesagai ma tagata na ou manao moni ma te faafesagai—o lo’u Tama Faalelagi ma lo’u aiga.“ Ae e tusa lava po o le manatu lena, e le faapea ai e le tiga.

Sister Dalton: E le o folafola mai e le Mo Le Malosi o le Autalavou ia te oe se olaga e saoloto mai faafitauli pe afai e te ola i tulaga faatauaina, ae o loo faapea mai “o le a mafai ona e … onosaia tofotofoga i se lototele e sili atu” (2). E ui ina ou te le’i iloaina i le po na ou savali ese ai mai se pati ma tapuni ai le faitotoa i le lumanai o lo’u olaga atoa o fegalegaleaiga—na amata mai i lena taimi ona teena au e tamaiti lauiloa—ua ou iloa nei o le ola i tulaga faatauaina e mafai ai ona avea oe ma se taitai. O se tamaitai talavou se toatasi po o se alii talavou se toatasi e i ai le lototele e ola i nei tulaga faatauaina ma savali ese mai se tulaga le talafeagai, na te tuuina atu i isi le lototele e mulimuli ai.

O a ni faamanuiaga tumau o le ola ai i tulaga faatauaina o loo i le Mo Le Malosi o le Autalavou?

Sister Beck: O le vaiaso ua tea na matou o ai matou te faatau ma le fanau teine a la’u fanau. Na ou vaaia se faatauoloa o mataituina la matou faatauga malie. O se taimi mulimuli ane, na ou tuuina atu ai ia te ia se kata e tufa atu [a le Ekalesia]. Sa ia faapea mai ia te au, “Ua ou i ai i le taimi o lo’u olaga o loo ou taumafai ai e pulea [au lava], ae ou te le iloa pe faapefea ona fai.” Ona ma talanoa lea. O au upu mulimuli ia te ia o le, “Afai e te manao i le mea lenei pe a e oo i lo’u matua”—ma na ou faasino atu i fanau teine laiti a lau fanau—“e tatau ona e matuai faaeteete lava i mea o loo e filifilia nei. O filifiliga na ou faia a o ou matua pei o oe na iloa ai le ituaiga tagata ua ou i ai nei.”

Sister Dalton: O faamanuiaga tumau e salalau atu i augatupulaga, ma o se mea itiiti e tasi o loo e faia i le taimi nei, e mafai ona faia ai se suiga tele, i le tulaga e te iu i ai, ma le tulaga e iu i ai ia augatupulaga e mulimuli mai ia te oe. Ma e le mafai ona galo ia i tatou o augatupulaga na muamua atu na ositaulaga mo i tatou ina ia tatou maua le talalelei ma iloa ai tulaga faatauaina.

E mafai faapefea e le autalavou ona taulimaina faaosoosoga ma maua ai na faamanuiaga vave maua ma faamanuiaga tumau?

Sister Dalton: Pe a ou fesili atu i le autalavou, “O le a le mea e sili ona faigata tou te faia?” e toatele e fai mai, “O le o atu i pati ma ofoina mai se pia ae le inuina.” Ona ou fesili lea, “Aisea ua outou i ai iina i le pati?” Latou te faapea mai, “Ou te alu e fai ma se faataitaiga lelei i isi.” Ma o taimi uma ou te tali atu ai, “Ia e aumaia au uo i nofoaga e mafai ona latou lagonaina ai le Agaga. Ia aua lava nei e ulu atu i nofoaga e le alu atu i ai le Agaga. Aloese mai ai!”

Sister Beck: E i ai se tala faatusa a Elder Lynn G. Robbins o le au Fitugafulu. Na saunoa o ia, afai o loo tipi lau taumafa i kuki e i ai sukalati ninii, ae e alu atu lava i le umukuka ae faatoa vela lava ia kuki—ua manaia lava le manogi ma e vaai faalemafaufau ai i sukalati ninii ua liu suavai a o e vaeluaina le kuki—o le a se umi e te i ai ona e tofoina lea o se kuki se tasi? O le a moni lava le tele o lo’u malosi? O le mea lena e tau o le tetee—po o le taumafai e tetee. Ae afai o loo tipi lau taumafa i kuki e i ai sukalati ninii ma e te le alu lava i le umukuka i le mea o loo tao ai ma e te le o taoina foi e oe lava, o lona uiga o loo e aloese mai faaosoosoga. E faigofie atu lena!

O le a se mea e mafai ona ausia e le autalavou o loo ola i nei tulaga faatauaina amiotonu?

Sister Beck: O loo sau Satani mai itu uma i o tatou tagata talavou. Peitai o loo i ai sa tatou puipuiga, o lea e le tatau ai ona tatou matatau. E mafai ona tatou talitonuina folafolaga a le Alii. Ua Ia fetalai mai, e fai miti ma iloa faaaliga e o outou alii talavou ma tamaitai talavou, o le a Ia liligiina ifo Lona Agaga i luga ia te i latou i aso amuli, ma o le a Ia faalolovaia le lalolagi i le amiotonu ma le upumoni (tagai Ioelu 2:28–32; Mose 7:62). E leai se mea amiotonu e le mafai ona fai e le autalavou!

Sister Dalton: O o tatou tagata talavou o ni tagata taua i mea mulimuli e tutupu i le lalolagi. Tatou te faitau i faalavelave ma mea o le a tutupu, ae o le ola i tulaga faatauaina o loo i le Mo Le Malosi o le Autalavou o le a faasaoina ma puipuia ma faamalosia ai o tatou tagata talavou i se auala e mafai ai ona latou auauna atu ma faia mea e leai se isi tagata e mafai ona faia.

Sister Tanner: O le autalavou i aso nei ua pei lava o le autau a Helamana! Na tausia na tagata talavou e laveai i augatupulaga a sa Nifae, ma o loo tausia o tatou tagata talavou e laveai lenei augatupulaga.

FESOASOANI I LE AUTALAVOU IA MAUA LE MALOSI

O se tasi auala e amata ai ona fai ia aoaoga o loo i le Mo Le Malosi o le Autalavou (aitema nu. 36550) o se vaega o o tatou olaga—ma ia faaofi atu i loto o le autalavou—o le faailoa lea o le aoaoga faavae, o tulaga faatauaina, ma taunuuga o loo i vaega taitasi o lenei tusi. Mo se faataitaiga, mafaufau i le vaega “Mama Atoatoa i Tulaga Feusuai”.

O aoaoga faavae e taliina ai le fesili “Aisea tatou te ola ai i nei tulaga faatauaina?”: “O sootaga vavalalata faaletino i le va o le tane ma le ava, e matagofie ma paia. Ua faauuina e le Atua mo le foafoaina o fanau, ma e mo le faailoaina atu o le alofa i le va o le tane ma le ava. Ua poloai mai le Atua o le sootaga vavalalata faalefeusuai, e ao ona faaagaga mo faaipoipoga” (26).

O tulaga faatauaina ua aoaoina ai i tatou i mea e tatau ma mea e le tatau ona tatou faia: “Aua lava nei e faia ni sootaga feusuai ae e te le’i faaipoipo, ma ia e faamaoni atoatoa i lou toalua pe a uma ona oulua faaipoipo” (26).

O taunuuga o iuga lelei ma le lelei o le ola ai i tulaga faatauaina: “A e usitai i poloaiga a le Atua ia mama atoatoa mai tulaga feusuai, ua e saunia oe lava e osia ma tausia feagaiga i le malumalu. Ua e saunia oe lava e atiina ae se faaipoipoga malosi ma fanauina mai fanau i le lalolagi, o se vaega o se aiga matagofie. Ua e puipuia oe lava mai le faatamaiaga o lagona, ia e masani ona oo mai ona o le faia o sootaga vavalalata faalefeusuai ma se tasi i fafo atu o le faaipoipoga” (26).

FAASOA ATU TULAGA FAATAUAINA

O se tamaitai talavou ou te iloaina sa fai si ona le fiafia i ana uo i le fesiligia o ona tulaga faatauaina: “Aisea e le mafai ai ona e tafao faamasani a o le’i atoa lou 16 tausaga?” “Aisea e te le inu pia ai?” Ina ua tatalo o ia pe faapefea ona ia taulimaina lenei tulaga, na oo mai le manatu i lona mafaufau: “O le a ou tuuina se tamaitusi Mo Le Malosi o le Autalavou i le taga o lo’u ofuvae. A fesiligia au e tagata e uiga, mo se faataitaiga, tafaoga faamasani, o le a ou tuu atu ia i latou le tusi ma fai atu i ai latou te faitauina le vaega e uiga i tafaoga faamasani.”

Mulimuli ane, na avea o se manatu maoae tele! E tolu masina ae ua ia tufaina atu ni kopi se 52 o le Mo Le Malosi o le Autalavou. Ma e toatolu ni uo fou na amata ona latou o mai i le lotu.

Na toa lenei tamaitai talavou i se auala faauo ma na te lei faameoina lava ona tulaga faatauaina. A ola le autalavou i tulaga faatauaina i le manino ma aunoa ma se faameo, o le a faaaloalo isi tagata ia i latou ma vaai atu i a latou faataitaiga.

Mary N. Cook, fesoasoani lua i le au peresitene aoao o Tamaitai Talavou.