Manatu Faaopoopo mo Taimi o Fetufaaiga, Oketopa 2007

O manatu faaopoopo nei e mafai e taitai o le Peraimeri ona faaaogaina faatasi ma le Taimi o Fetufaaiga o loo lomia i le Liahona o Oketopa 2007. Mo le lesona, faatonuga, ma gaoioiga e o faatasi ma nei manatu, tagai “Faauta i le Tele o Lou Olioli” i itulau U4 ma le U5 i le vaega a tamaiti o le lomiga lenei.

A o le’i faia le Peraimeri, ia fai ni ata o tamai mamoe (mo se faataitaiga, tagai i le tusi lesona a le Peraimeri 2, lesona 23, po o le Peraimeri 1 ata 1-8). Ia ta’ilua tamai mamoe mo tamaiti taitoatasi, e tasi e avanoa ae o le isi ia tusi ai i luga le igoa o le tamaitiiti. Ia faapipii tamai mamoe i le puipui o le potu o le Peraimeri.

Faitau le Ioane 10:14. Fesoasoani i tamaiti ia malamalama i le faatusatusaga o loo faia e Iesu. Ta’u atu ia i latou faapea o tamaiti taitoatasi e pei o se tamai mamoe ae o Iesu o le leoleo mamoe po o le taitai (tagai i “Faatusatusaga,” O Le Aoao Atu, E Leai Se Isi Valaauga E Sili Ai [1999], 172–73). Na saunoa Cheryl Lant, le peresitene aoao o le Peraimeri: “Na silafia lelei e Iesu tamaiti uma taitoatasi sa Ia faamanuiaina i le tala i le Feagaiga Fou. Sa Ia silafiaina uma tamaiti Sa Nifae, ma Na te silafiaina foi tamaiti uma taitoatasi i aso nei. E finagalo o Ia mo i latou uma ina ia lagonaina Lona alofa. E finagalo o Ia ina ia latou aoaoina Ana afioga ma maua se molimau. E finagalo o Ia mo i latou taitoatasi ina ia maua faamanuiaga o le lagi lea e auala mai i le ola amiotonu” (“Fafaga Au Tamai Mamoe,” lauga i le fale tatala a le Peraimeri, Set. 2006).

Faapipii le Ata 240 o le Pusa o Ata o le Talalelei (Iesu le Keriso) i luma o le potu. Ia valaaulia tamaiti e saili a latou lava mamoe ma aumai i latou i le Leoleo Mamoe Lelei. Fai atu i le ta piano e tata malie se pese a o auauai laina taitasi o tamaiti e saili a latou lava tamai mamoe ma avatu i luma. Afai e maua uma e tamaiti se avanoa, ona faamanatu atu lea ia i latou faapea e toatele isi tamai mamoe e le’i oo mai lava i le lafu e ala lea i le o mai i le Peraimeri. Faitau le Luka 15:4. Tuu atu i le ta piano e toe tata, ma valaaulia tamaiti taitoatasi e filifili se tasi o tamai mamoe e leai se igoa o tusia ai i luga. Ia valaaulia i latou e mafaufau i se tasi e mafai ona latou valaauliaina e o mai i le lafu. Fai atu ia i latou e tusi le igoa o le tagata i luga o le tamai mamoe ma ave i le fale e faamanatu atu ai ia i latou ina ia valaaulia lenei “tamai mamoe” e mulimuli i le Leoleo Mamoe Lelei.

Ia molimau atu o Iesu o le Leoleo Mamoe Lelei ma na Ia ofoina atu Lona ola mo i tatou, o Ana mamoe.
Ia valaaulia se tagata toaga o le Ekalesia e sau i le vasega ma faafoliga o se tagata sailiili—se tagata o loo aoaoina e faifeautalai. Tuu atu i le malo na valaaulia e tusi se faailoga fesili tele lava i luga o se pepa ona faapipii lea i lona ofu. Tuu atu i le malo e aveese ni faailoga fesili se tele mai fafo o se taga po o se ato. Faamatala atu faapea o lenei tagata e matuai tumu i fesili. Fesili atu i tamaiti pe latou te manatu ua latou iloa lelei le talalelei ina ia tali ai i fesili a le tagata sailiili. Ia faamatala atu i ai faapea o le a e faia se taaloga o fesili ma tali. O le vaega faigata o le tatau lea ona usuina e tamaiti a latou tali uma.

Ia amataina e le malo e ala lea i le fesili atu i tamaiti, “O ai oe?” Ia tuu atu i le ta piano e tata malie le amataga o le “O A’u Se Atalii o le Atua” (Tusipese a Tamaiti, 2–3), ona tuu atu lea i tamaiti e tali le fesili i le usuina lea o le pese. Ia toe fai le faiga lava lea i nisi fesili faaopoopo ma pese. A maea pese taitasi, ia tuu atu i le malo faaaloalogia e toe fai le fesili ma le tali. Mo se faataitaiga, “Oi, o lena la. O i tatou uma o fanau a le Atua ma ua auina mai iinei ona e alofa o Ia ia i tatou.” O isi fesili e i ai ni tali faamusika e ono aofia ai: “O fea sa ou nofo ai ae ou te le’i fanau mai?” “O le a le faatuatua?” “O fea na maua mai ai e Iosefa Samita le Tusi a Mamona?” Ia tuu atu i tamaiti e filifili po o a pese e usu e tali ai fesili taitasi, ma tuu atu na o se taufaaataata pe a moomia e tamaiti.

Fesoasoani i tamaiti ia malamalama o loo latou aoaoina le talalelei e ala i pese a le Peraimeri. Ia tuuina atu le molimau i le talalelei ma le taua o musika i le aoaoina mai ma le aoaoina atu o le talalelei.