O mai e Faalogo i le Siufofoga o se Perofeta
O Le Taavale Gaogao
I ni nai tausaga ua mavae sa fuafua ai se korama a ositaulaga e aoina ni meaai mo e le tagolima e avea ma se galuega fesoasoani. O Jim, o se tasi o ositaulaga, sa naunau lava e auai ma sa ia fuafua ai ia tele atu meaai na te aoina nai lo soo se isi lava. Na oo mai le taimi e feiloai ai ositaulaga i le falesa. Sa latou o atu uma lava i le taimi e tasi ma toe foi mai i se taimi na atofaina i lena afiafi. O le mea na ofo ai tagata, sa matuai gaogao le taavale a Jim. Na foliga mai sa to’a lava o ia, ma sa ula nisi o tamaiti ia te ia. I le vaaia o lenei mea ma le iloaina o Jim e fiafia tele i taavale, sa faapea atu ai le fautua, “Sau i fafo, Jim. Ou te manao e te vaai i la’u taavale. E fai lava ma leaga.”
Ina ua la taunuu i fafo, sa fesili atu le fautua ia Jim pe o faanoanoa. Sa tali Jim, “E leai. Ae ina ua ou alu atu e ao mai ni meaai, e tele mea na ou maua. Sa matuai tumu la’u taavale. A o o’u toe taliu mai i le falesa, sa ou afe i le fale o se tamaitai e le auai i le Ekalesia ua tetea ma lona toalua ma o loo nofo i tuaoi o lo tatou uarota. Sa ou tuitui atu i le faitotoa ma faamatala atu i ai le mea o loo tatou faia, ma sa ia valaaulia atu au i totonu. Sa amata ona ia tilotilo solo mo se mea e aumai ia te au. Sa ia tatalaina le pusaaisa ma sa mafai ona ou iloaina atu e leai ma se mea o i ai. O kapoti e gaogao. Sa iu ina ia mauaina se tamai apa pea.
“Sa faigata ona ou talitonuina. Sa i ai uma nei fanau laiti o loo fetaufetuliai solo o loo moomia ona fafagaina, ma sa ia tuuina mai ia te au lenei apa pea. Sa ou tago ave ma tuu i totonu o la’u taavale ma ou savali i le auala. Pe tusa o le afa o le auala talu ona ou alu ae ou faalogoina se lagona mafanafana ua lofia ai au, ma na ou iloaina ai e moomia ona ou toe foi atu i lena fale. Sa ou tuuina uma atu ia te ia meaai.”
Sa faapea atu le fautua, “Jim, aua lava nei galo ia te oe le lagona sa e faalogoina i lenei afiafi, aua o le uiga atoa lava lena o lenei fuafuaga.” Sa tofo e Jim le niuterene o le auaunaga e le faatuaoia.
Mai se lauga o le konafesi aoao ia Oketopa 2006.
O MEA E MAFAUFAU I AI
-
Ina ua faalogoina e Jim “se lagona mafanafana na lofia ai o ia” ma iloa e tatau ona toe foi, e te manatu o le a le mea na tupu ia Jim?
-
Fai mai le fautua o le lagona na faalogoina e Jim “o le uiga atoa lena o lea fuafuaga.” E te manatu o le a le uiga o lana tala?
-
O le a le faamoemoega na ia Jim ina ua alu atu e ao meaai? O le a lona faamoemoega ina ua oo i le afiafi? E mafai faapefea ona faatatau lenei mea i lo’u lava olaga?
-
O le a se isi mea e te mafaufau i ai e uiga i le mea na oo i ai Jim?