Ua Tofia Wheelwright e Avea ma Peresitene Fou o le BYU–Hawaii

Na fofogaina mai e Peresitene Gordon B. Hinckley le tofiaina o Steven C. Wheelwright, o se polofesa ma se taitai faaaloalogia o le Aoga Faapisinisi i Harvard, e avea ma peresitene o le Iunivesite o Polika Iaga– Hawaii i le aso 5 Iuni, 2007.

“Ou te iloa o le a sii e Peresitene Wheelwright le BYU–Hawaii i ni tulaga maualuluga,” na saunoa ai Peresitene Hinckley mai le Maota Autu o Konafesi i le Aai o Sate Leki, Iuta. “O lona atamai ma le tele o ana fegalegaleaiga ou te mautinoa ai o le a ia faalauteleina atu ia aafiaga o le BYU–Hawaii ma faamanuiaina ai olaga o i latou uma o e autovaa mai i lenei aoga lauiloa.”

Ina ua mavae le faasilasilaga, sa faafeiloaia loa e Peresitene Wheelwright ia tamaiti aoga o le BYU–Hawaii e ala i le satelite i se “Aloha” naunautai ma faapea atu o se avanoa faamamaluina le mauaina o se tofiga faapea.

“Ou te talitonu i le BYU–Hawaii ma lana misiona aua o loo tuufaatasia ai le aoaoga faaleagaga ma le poto salalau ma o loo taulai atu i le atiina ae o le tagata ma le malamalama i nei tagata talavou lelei,” o le saunoaga lea a Peresitene Wheelwright.

Na saunoa Peresitene Hinckley e faapea talu mai ona uluai tatalaina le BYU–Hawaii o se kolisi i le 1955, ua avea ma se iunivesite i totonu o le atunuu ua sili ona tele ni aganuu eseese o loo i ai i totonu, lea e 2,400 tamaiti aoga mai atunuu e 70.

E tele se silafia o Peresitene Wheelwright i le galulue faatasi ai ma tamaiti aoga mai aganuu eseese, e aofia ai eria o Asia. I le avea ai ma faauluuluga o le Aoga Faapisinisi i Harvard mo le polokalama o le MBA, sa latou galulue faatasi ai ma tamaiti aoga mai le lalolagi atoa ma fesoasoani e tuu le toatele o i latou i tofiga faapisinisi. Na saunoa Elder Henry B. Eyring o le Korama a Aposetolo e Toasefululua e faapea o lenei faiga o le a faamanuiaina ai tamaiti aoga o le BYU–Hawaii a o latou toe taliu atu i o latou atunuu moni pe a maea ona faauu.

Ina ua maea ona faauu mai Stanford ma se MBA ma le Ph.D, sa faaaluina e Peresitene Wheelwright se tausaga e avea ai ma faiaoga i le INSEAD, o se aoga faapisinisi faavaomalo i Fontainebleau, Farani, ona faaaluina lea o le taimi atoa na totoe o lona olaga faigaluega i mea tau aoaoga i Harvard ma Stanford.

O Harvard na la feiloai ai i le lata i le 30 tausaga talu ai ma le sa avea muamua ma taiulu o le Aoga Faapisinisi a Harvard ma o loo avea nei ma peresitene o le BYU–Idaho, o Kim Clark. Na saunoa Peresitene Clark e uiga ia Peresitene Wheelwright faapea e i ai sona agaga o le a lelei mea uma ma o se tagata e alofa i le Alii ma e tumau mausali ma le le mafaagaeetia i lana tautinoga i le Alii.

“Na te silafia le lagi ma o le a matuai musuia lava i se faatuatuaga maoae ona o le faatuatua,” na saunoa ai Peresitene Clark.

A o lei litaea mai Peresitene Wheelwright mai Harvard i le tau toulu o le 2006, sa avea o ia ma Polofesa a le Edsel Bryant Ford o le Pulega o Pisinisi, o se polofesa a le Baker Foundation, o se pule sinia o le aoga, ma le faatonu o le Harvard Business School Publication Activities. Sa avea foi o ia ma Polofesa a le Kleiner, Perkins, Caufield Byers o le Pulega i le Stanford University Graduate School of Business.

A o talavou o ia, sa avea Peresitene Wheelwright o se faifeautalai a le Ekalesia i Sikotilani. Sa avea foi o ia ma peresitene o le Misiona a Egelani Lonetona mai le 2000 e oo i le 2003. Sa avea o ia o se fesoasoani i le au peresitene o le siteki, fautua maualuga, ma se epikopo. Talu ona ia tuua Harvard, sa auauna atu o ia ma lona faletua o ni faifeautalai fesoasoani i le BYU–Idaho.

O Peresitene Wheelwright sa soifua a’e i le Aai o Sate Leki ma e i ai sana lafu povi i Star Valley, Wyoming. O i la’ua ma lona faletua o ni matua o se fanau e 5 ma fanau a le la fanau e 15.

Ua suitulaga Peresitene Wheelwright ia Eric B. Shumway, ua litaea mai le BYU–Hawaii ina ua mavae ona auauna i tofiga eseese talu mai le 1966 ma le avea ai ma se peresitene talu mai le 1994.