O Ai Na Liliuina Lo’u Ulu?
I le taimi o se sauniga faamanatuga i Piura, Peru, i le 1972, na fai lava ma tilotilo mai ia te au se failauga o le na talanoaina le taua o galuega o talafaasolopito o aiga. I le faaiuga o lana tautalaga, sa ia faateia ai au ina ua ia faasilasila mai, “ou te iloa o le a faia e Uso Rosillo ia lenei galuega.”
E le’i atoa se tausaga talu ona avea au ma tagata o le Ekalesia, ae na ou faatuina se sini e amata lo’u talafaasolopito o aiga—e le faapea ona o lana tautalaga ae na ou lagonaina se naunautai e fai. Na ou aumaia se siata o gafa o augatupulaga e fa ma amata loa i le faatalanoaina o ou matua ma tagata [o lo’u] aiga e saili ai mea na latou iloaina. O taimi uma lava ou te galue ai i lo’u talafaasolopito o aiga, ou te tatalo ma ole atu i le Alii mo le fesoasoani.
Ina ia maua aso na maliliu ai matua o matua o lo’u tina, na ou alu atu ai i le taulaga o Zorritos, i Peru i matu, lea na lagomau ai i laua. Sa latalata lava le fanuatanu i le itu i tua o le taulaga, ma o le toatele lava o tagata maliliu na lagomau i ni loa.
Na ou alu atu i le fanuatanu ma amata loa ona sue, ae leai se mea na ou maua ai. Na tonu ia te au ou te alu i le taulaga e fesili i so’u tausoga pe na te mautinoa lava o iina na lagomau ai o matou matua matutua. Ina ua fai mai ioe, na ou fai atu ia te ia, “O lona uiga ou te le foi lava seiiloga ou te maua na aso.”
Na ou toe foi atu i le fanuatanu ma amataina se sailiiliga maeaea, sa ou savali atu i laina tuugamau taitasi ma faitau i tusitusiga uma. Ou te le’i mauaina lava o la tuugamau, o lea na ou tootuli ai ma ole atu i le Alii e fesoasoani mai ia te au. Ona ou toe sueina lea—ae o le taunuuga lava e tasi. Sa ou le lava, ua sau foi le po, ma sa ou manao ou te foi ina ia ou faia isi sailiiliga na ou fuafuaina.
“Ia, sa fai lau vaega,” o lo’u mafaufau lea ia te au lava. O le a ou alu ae le faataunuuina la’u sini.
A o ou sauni e tuumuli, na ou faasaga agai i le faitotoa i luma. Ae o le taimi lava na amata ai ona ou savali, na ou lagonaina ni lima se lua o taofi mai tua lo’u ulu ma liliu atu i se vaega patino. Na tau atu lau vaai i se maafaamanatu laitiiti ma le palapala, lea sa gatusa lelei lava ma le palapala. Na ou tilotilo atu i o’u tua po o ai na mau i lo’u ulu, ae e leai se tagata na i ai.
Sa ou savali atu i le maafaamanatu, na ou taoto i luga o le palapala, ma tafitafi le tusitusiga. Faatasi ai ma le agaga faafetai tele, na ou faitauina ai le faamatalaga sa ou sailia: Isidro Garcia Rosillo, maliu 1 Aokuso, 1934. Francisca Espinoza Berrú, maliu 31 Ianuari, 1954.
Na faamutaina le faatalitali umi a ou tuaa ina ia maua o latou sauniga faaola i le 1980. O le taimi lena na ma o atu ai ma lo’u toalua i le Malumalu o Sāo Paulo Pasila ina ia maua o maua faaeega paia. I le malumalu, sa faamauina au i lo’u toalua ma papatisoina mo i latou e pele ia te au.
A o ou alu atu i le faatanoa o le vai papatisoga, na ou manatuaina le maafaamanatu laitiiti i le fanuatanu. Na ou ui ifo i le vai malu ma le iloa na taitaiina e le Alii ou laasaga a o ou sailia ou matua matutua.