Taimi o Fetufaaiga

Faauta i le Tele o Lou Olioli

Saunia e Elizabeth Ricks

“Ia faapea ona faapupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi” (Mataio 5:16).

Na e matauina pe a e faasoaina atu se mea e pei o se meaai manaia po o se meataalo, e te maua ni lagona lelei? Ioe na e matauina. E mafai ona e faasoaina atu mea e ese mai lo meaai manaia po o meataalo, e pei o le malamalama. O le faasoaina atu o le malamalama e mafai ona aumai ai le olioli tele—e le gata i le tagata na te mauaina ae faapea foi i le tagata na te tuuina atu. O le ituaiga malamalama e sili ona lelei e faasoa atu o le talalelei a Iesu Keriso.

Na lagona e le tamaitai e iva tausaga o Ashley le fiafia i le faasoaina atu o le talalelei. Ina ua uma ona luiina Ashley e faasoa atu se kopi o le Tusi a Mamona, sa faapea loa ona momoli atu e le tama o Ashley ia Ashley i le fale o lona puleaoga, ma na tuuina atu ai e Ashley se Tusi a Mamona ia te ia. Na tuuina atu foi e Ashley i faifeautalai faamisiona le igoa o lona puleaoga. O se fiafiaga tele na lagonaina e Ashley! (Tagai “Nine-Year-Old Member Missionary,” Friend, Iulai 1997, 42–43.)

O le mea e sili ona taua e mafai ona e faasoaina atu o le talalelei a Iesu Keriso. Na valaauina e le Alii ia Oliva Kaotui ma Tavita Uitimera e talai atu le talalelei. Na Ia faamatalaina le fiafia o le a laua mauaina:

“Afai foi e faapea ona oulua galulue i o oulua aso uma i le alagaina o le salamo i lenei nuu, ma aumaia tau lava o se agaga e toatasi ia te au, faauta i le tele o lo outou olioli faatasi ma ia i le malo o lo’u Tama!

“Ma o lenei, afai o le a tele lo outou olioli faatasi ma se agaga e toatasi ua oulua aumaia ia te au i le malo o lo’u Tama, faauta i le sili atu o lo outou olioli pe afai lua te aumaia ni agaga e toatele ia te au!” (MFF 18:15–16).

E faaali atu lo tatou faatuatua ia Iesu Keriso pe a tatou faasoa atu le talalelei i isi. Ma tatou te maua le fiafia tele pe a tatou fesoasoani atu i isi ia iloa le fuafuaga a Iesu Keriso ma lo tatou Tama Faalelagi.

Gaoioiga

Tusi lou igoa i lalo o se tasi o faatagata faifeautalai. Oti ese, ma faapipii i luga o se pepa malo. I le afiafi faaleaiga, tuu le faatagata faifeautalai i talaane o ata taitasi, ma faamatala atu i lou aiga le auala e avea ai ia tagata o loo i tulaga taitasi ma se faifeautalai. Fai atu i lou aiga e faatino ia tulaga o loo i ata po o ni tulaga e ese mai latou te mafaufau i ai ma tuu atu ia te oe e faataitai ona faasoa atu le talalelei.

Manatu mo Taimi o Fetufaaiga

1. 1. Ia saunia ni nai fasipepa ua e tusia ai luga ia amioga e fai ma se faataitaiga, lelei ma leaga. Tuu atu i nisi o tamaiti e piki mai se fasipepa se tasi mai se atigipusa. Ia auauai i le faitauina. Tuu atu i tamaiti e filifili pe o le tulaga o se faataitaiga lelei po o se faataitaiga leaga. Faapipii ia pepa i le laupapa i lalo o le autu “Faataitaiga Lelei” po o le “Faataitaiga Leaga”. Mo se faataitaiga, “Ou te faia ofu talafeagai” e tatau ona alu i lalo o le “Faataitaiga Lelei,” ma le “ou te palauvale i nisi taimi” e tatau ona alu i lalo o le “Faataitaiga Leaga.” Fesoasoani i tamaiti e tilotilo i luga, faitau, ma tauloto le Mataio 5:16. Molimau atu na faia e Iesu Keriso faataitaiga mo i tatou uma.

2. 2. Fai atu i tamaiti e mafaufau i se taimi na latou faalogo ai i isi o tuuina mai a latou molimau. Faamalamalama atu e ui lava o le sauniga molimau o se taimi mo le faasoaina o molimau, e mafai foi ona fai atu a tatou molimau i isi foi taimi. Sue le 2 Timoteo 1:7–8. Ua saunoa mai Peresitene Gordon B. Hinckley, “Ou te moomoo i tagata uma o lenei Ekalesia, ina ia latou tuu na upu i se mea e mafai ona latou vaai atu i ai i taeao uma, a o latou amataina galuega o le aso” (“Ia Aua le Mata’u,” Liahona, Fep. 2005, U2). Fai mai o ia, o na upu e aumaia ia i tatou le lototele, faatuatua, ma le malosi. Tuu atu i tamaiti e tusi le fuaiupu e 7 ma le vaega muamua o le fuaiupu e 8 e ave i le fale ma tuu i se mea e mafai ona latou vaai i ai i taeao uma. Fesoaoani i tamaiti ia lagona le mana o le molimau a perofeta ma aposetolo. Afai e maua, ta se molimau na pueina mai le konafesi aoao pe mai le vitio Molimau Faapitoa a Keriso. Po o le faitau mai se lomiga o le Liahona.

Manatua: Afai e te le manao e aveese itulau mai le mekasini, e mafai ona kopi, tusi lolomi, pe lomia lenei gaoioiga mai le Initoneti i le www.lds.org. Mo le Igilisi, kiliki i le “Gospel Library.” Mo isi gagana, kiliki i le “Languages.”