Ua Talanoaina e le Tausi Talafaasolopito o le Ekalesia le Matafaioi o Talafaasolopito i le Misiona a le Ekalesia

O faamoemoega taua o le Matagaluega o Talafaasolopito o le Aiga ma le Ekalesia, na saunoa ai Elder Marlin K. Jensen o le Au Fitugafulu, o le “fesoasoani lea i fanau a le Atua ina ia osia ma tausia feagaiga paia,” o se luitau faatusipaia na tuuina atu i le Perofeta o Iosefa Samita i popofou o le Ekalesia.

I le saunoa atu ai i le konafesi faaletausaga a le Asosi o Talafaasolopito o Mamona i le aso 26 Me, 2007, o le Susuga a Elder Jensen, sa faaigoaina o le tausi talafaasolopito ma le tusitalafaamaumau o le Ekalesia ia Aperila 2005, na toe faamatalaina auiliili le atiina ae o le matagaluega o talafaasolopito ma sao o le toatele o taitai o e sa matuai faatauaina le poloaiga a le Alii na tuuina mai i le aso na faavaeina ai le Ekalesia ina ia tausia se tala o le Ekalesia.

“Ou te le tautala atu o se tausi talafaasolopito faapolofesa, ae o le tausi talafaasolopito o le ‘Ekalesia,’ o se tasi o loo i le vaega toatele o taitai aoao o le Ekalesia ua valaauina mo se vaitaimi e le mailoa, e faataunuuina se valaauga na faavaeina e ala i se faaaliga i le Perofeta o Iosefa Samita,” na ia saunoa ai.

O mea na ausia i aso ua mavae e le matagaluega, na ia faaauau ai, sa faaautu tonu lava i le aoina mai, faasaoina, ma sina vaega o le lolomiina o faamaumauga o loo aofia ai i le talafaasolopito faatosina o le Ekalesia.

“O le a le faamoemoega taua o le talafaasolopito o le Ekalesia?” sa ia fesili ai. “Ua avea le Ekalesia ma se faalapotopotoga tele faavaomalo faatasi ai ma le totonugalemu o lona malosiaga ua faateleina le seesee atu agai i le itu lalolagi i saute. O nei vaega ma isi vaega ua faatalitonuina ai i matou faapea e le mafai ona tatou faaauau pea la tatou galuega o talafaasolopito e pei ona masani ai.”

Ina ua mavae se iloiloga tele ma le agaga tatalo i le tele o tausaga ua mavae i le fuafuaina o le auala mo le matagaluega, na saunoa ai Elder Jensen, “ua matou lagonaina o le talafaasolopito e ao ona i ai se sao i le misiona atoa a le Ekalesia, … i le faaolataga o tagata.”

Na matauina e Elder Jensen faapea o lena poloaiga ua tulagaese ai lava le Matagaluega o Talafaasolopito o le Aiga ma le Ekalesia mai isi galuega ma tagata naunau i talafaasolopito.

“O se faanaunauga mamalu ma le lofituina ai lenei, o se faanaunauga e le faigofie ona ausiaina ma e masani lava ona le talisapaiaina atoatoa e a matou paaga faapolofesa,” na ia saunoa ai.

Ina ia ausia lenei poloaiga, na ia faaopoopo mai ai, ua taulai atu ai le Matagaluega o Talafaasolopito o le Aiga ma le Ekalesia i ni vaega se tolu: ia mautinoa le manatuaina o mea silisili a le Atua, ina ia fesoasoani e faasaoina ai le faatulagaga faaalia o le malo, ma molimau ma puipuia le upumoni o le Toefuataiga.

O lenei sini “o loo faauigaina ai la matou galuega ma tagata o loo matou galulue i ai,” i le fatuina lea o se “vaaiga sili atu ona tele o le galuega nai lo le mea e mafai ona matou ausiaina na o i matou—o lea e moomia ai le galulue faatasi,” na saunoa ai Elder Jensen. Ua “aveesea ai i matou mai le na ona avea ma se tasi e aoina mai faamatalaga i se faalapotopotoga ua mataalia lea o le a faatutuina mea e ao ona faamuamua i le aoina mai, tufatufaina atu, ma le sailiilia ma le tusitusia.”

O le fausiaina o se matagaluega e tautuaina ai se Ekalesia i le lalolagi atoa e moomia ai se suiga i mafaufauga lea e le aunoa ma se tiga, na ia saunoa ai. O sea ituaiga atinaega o le a moomia ai fesuiaiga i le faalapotopotoga lea e faamamafaina ai le tautuaina o tagata lautele o le Ekalesia e faapea foi i taitai. O nei suiga uma e tatau ona matuai faaaoga lelei ai le tekinolosi.

O se isi laasaga taua e agai atu i le atiina ae o le matagaluega o talafaasolopito o le fausiaina lea o se fale e 250,000-sikuea-futu (23,000-sikuea-mita) ina ia lauiloa o le Faletusi o Talafaasolopito a le Ekalesia.

“Na suatiaina le eleele ia Oketopa talu ai ma o loo faagasolo pea le galuega ma ua fuafua o le ogatotonu o le 2009 e faapaiaina ai. O le faletusi o le a teuina ai mea anagata na aoina mai ma ua fuafua e tatalaina i soo se tasi, tosina mai ai tagata, ma e matuai aoga lava,” na saunoa ai Elder Jensen.

Sii mai le Church News, 2 Iuni, 2007.