Faia o ni Uo
Tuputupu Ae i le Faatuatua—Yondonjamts o Ulaanbaatar, Monokolia
Sa le mafai e faifeautalai O Le Ekalesia a Iesu Keriso o le Au Paia o Aso e Gata Ai ona talai atu le talalelei i tagata o Monokolia seia oo i le 1993. I lalo o le tulafono faakomunisi mai le vaitaimi o le 1920 seia oo i le 1990, na faasasaina ai tagata Monokolia mai le auai i se tapuaiga. O le taimi nei ua faafetai ia Yondonjamts e 10 tausaga le matua ma lona tama o Bayartsengel; lona tina o Gantsetseg; ma lona uso o Monkhsaihan, 14; ma lona tuafafine o Bolor-Erdene, 16, ua mafai ona avea i latou ma tagata o le Ekalesia.
Tatalo Faamaoni, Papatisoga ma le Perisitua
A o le’i papatisoina ma faamauina ia Yondonjamts, sa tatalo o ia e le aunoa ina ia mafai ona auai foi lona tama i le Ekalesia. Sa faafetai lava o ia ina ua filifili lona tama e papatiso. Ina ua uma lona papatisoga ma le faamauga, na iloa e Yondonjamts e taua ia te ia le saunia e avea o se tiakono i le Perisitua Arona. Sa taua foi i lona tama le mauaina o le perisitua. Sa masani ona tatalo lenei alii talavou ina ia mafai ona maua e lona tama le perisitua, ma sa ia mauaina lava. E ioe tagata uma o le aiga o Yondonjamts o se alii talavou faamaoni o le na iloaina le taua o le tatalo.
Aiga e Faavavau
E silia laitiiti lava ma se tausaga talu ona papatisoina ma faamauina lona tama, na malaga atu ai le aiga i le Malumalu o Hong Kong Saina. Na fiafia Yondonjamts ua faamauina lona aiga i le malumalu ina ia mafai ona avea i latou ma se aiga e faavavau. A o i ai i le malumalu, na ia talosaga ai e tuu le igoa o se tamaitai i le lisi tatalo ina ia tatalo ai tagata sa i le malumalu mo ia. Sa popole o ia ona o se manua sa i lona vae, ma sa fiafia o ia ina ua toe malosi lea tamaitai.
O Ana Mea e Fiafia e Fai
-
Taalo pasiketipolo.
-
Tusi ata.
-
Fai papeti i tamatamailima.
-
Alu i le lotu.
-
Ai suaalaisa ma vine.
-
Asiasi i le itu i sasae o le nuu.
Aoga
O se tagata o le vasega fa, e fiafia Yondonjamts i le matematika ma le olitami (gaugauina o pepa i siepi). O loo ia aoaoina foi le Igilisi ma le faaMonokolia i le aoga. O lana tusi e sili ona fiafia i ai o le The Happy Prince na tusia e Oscar Wilde. Fai mai lona tina, o ia o se tamaitiiti lelei i le aoga, e ese le usiusitai. O le aoga e na o le lima minute e savali i ai mai lona fale.
Afiafi Faaleaiga
I afiafi faaleaiga, e faitau e le aiga ia tusitusiga paia, fai tala faatino, usu pese, fai suega pupuu o le talafaasolopito o le Ekalesia, ma ai ni meaai manaia. E fiafia Yondonjamts e faitau le Tusi a Mamona e uiga i le tatalo a Alema mo lona atalii ina ia iloa le upumoni ma salamo. E fiafia Yondonjamts i le mea moni faapea na salamo Alema le Itiiti ma suia lona olaga (tagai Mosaea 27:8–31).
Saunia mo se Misiona
E manao Yondonjamts e faia se misiona i se aso. O loo sauniuni o ia e avea o se faifeautalai e ala i le tatalo, faitauina o tusitusiga paia, auai i sauniga a le Ekalesia, ma taumafai ia faamaoni ma amiotonu. O loo ave foi ana lesona ta piano. Talu ai o le tau i Monokolia e malulu tele i le taumalulu, e pei ai e manaia ia te ia se misiona i Hawaii.
O Gafea o le Lalolagi e i ai Ulaanbaatar, Monokolia?
O Monokolia o se atunuu mauga e i le va o Saina ma Rusia. O Ulaanbaatar o le taulaga lea.
Peraimeri
Pe a ma le 20 minute e malaga atu ai le aiga i le pasi e auai atu i le Paranesi a Bayanzurkh. I le Peraimeri, e fiafia Yondonjamts i pesepesega ma faalogologo i musika. E fiafia foi o ia i le taimi o fetufaaiga.