Uo i le Uo
O Le Mamalu o le Atua o le Malamalama Lea
“Afai foi e maua e se tasi le malamalama ma le faautauta sili atu i lo se isi i lenei olaga ona o lona filiga ma usiusitai … , o le a faapea ona sili atu ona avanoa i le olaga a sau” (MFF 130:19).
Na ou faaaluina le tele o tausaga o lo’u olaga e aafia ai i aoaoga. A o ou laitiiti, na ou manatu o aoaoga o le alu i le aoga, faia o suega, ma maua ni togi lelei. Ae ina ua ou matua, na amata ona ou iloa le eseesega o le lelei i le aoga ma le aoaoina. E mafai ona lelei se tagata i le aoga ae le aoaoina lava. O aoaoga moni o le aoaoina o le auala e aoao ai. O le taimi lava na ou iloaina ai lena lesona, sa amata loa ona avea aoaoga ma mea fiafia.
O se tasi o faamoemoega autu o le olaga i le tino ina ia aoaoina—ia maua le poto ma le malamalama. Fai mai le Mataupu Faavae ma Feagaiga e 93:36, “O le mamalu o le Atua o le malamalama lea.” Atonu ua e faapea o le malamalama o lona uiga o le faameaalofaina i galuega o le poto salalau, ae o le malamalama e faatatau foi i le faaaogaina o le atamai tatou te maua mo faamoemoega amiotonu.
O le poto, i le faalelalolagi ma le faaleagaga, e oo mai faafasitepu. O la’u molimau na tuputupu ae mai lea upu ma lea upu, o lea mataupu ma lea mataupu, o sina mea itiiti iinei, ma sina mea itiiti iina (tagai Isaia 28:10)—o le ala lea na fai ai i le toetoe o tagata uma o le Ekalesia. A o ou laitiiti, ou te manatua le faitauina mai e lo’u tina o tala o le Tusi a Mamona ma talafaasolopito o le Ekalesia ia te au. Na ou lagonaina se lagona manaia, toafilemu, ma mautinoa o mea na ou aoaoina ua moni. O lenei lagona na tuputupu ae i se naunautaiga faamaoni e aoao atili e ala i le suesueina o tusitusiga paia. E leai se mea na sili atu ona i ai se aafiaga malosi i lo’u olaga nai lo le faitauina, suesueina, ma le sailiili i tusitusiga paia ina ia mafai ona maua le poto ma le malamalama atili.
Na ou ola ae i Kalefonia i lo’u talavou i le taimi na matuai faateteleina ai faatosinaga leaga e pei o fualaau faasaina ma musika leaga. Ona o le malamalama na faamanuiaina au ou te maua, na ou filifili ai ou te le auai i na mea. Sa ou sauniuni e avea ma se faifeautalai ma auauna atu i le Alii. I totonu o le misiona, o le malamalama o loo ou auauna atu i le Alii na faamalosia ai lo’u naunau e galue malosi i le fausiaina o Lona malo. O le galue ai o se faifeautalai atonu o se tasi lea o auala sili e aoao ma maua ai le malamalama faaleagaga.
O le taua moni o le aoaoina e mafai ai ona faatamaoaigaina oe i soo se tulaga—e fuafua ai po o le a le mea e tatau ona fai pe afai e te matuai le iloa lava pe o le a se mea e fai! E masani ona aoaoina i tatou i tusitusiga paia e saili le malamalama i le suesue ma le faatuatua (tagai MFF 88:118). I o tatou lava olaga, i o tatou aiga, faapea ma le Ekalesia, e mafai ona tatou maua faamanuiaga o le malosi faaleagaga, taitaiga, ma le puipuiga a o tatou saili i le faatuatua ina ia maua le malamalama ma faaaoga malamalama faaleagaga i le amiotonu.