Misia o Mikaele
“O le e alofa i le Atua ia alofa foi o ia i lona uso” (1 Ioane 4:21).
E faavae i se tala moni
A le tumutumu la le o le fale!“ o le valaau lea a Natalie. E fiafia o ia e alu i le lotu. O le Aso Sa o le aso sili lea ona fiafia i ai o le vaiaso, vagana ai le mea e tasi—sa faanoanoa o ia ona o lona tuagane o Mikaele, na filifili e le alu atu i le lotu faatasi ma le aiga atoa.
Na nofo filemu Natalie i le taimi o le sauniga faamanatuga, sa mafaufau o ia ia Mikaele. I taimi a o sau o ia i le lotu, e fiafia Natalie e nofo i ona tafatafa a o matamata ana tusi ata o Iesu Keriso. A uma le sauniga faamanatuga, e uu e Mikaele lona lima ma momoli atu o ia i le Peraimeri. “Toe fetaui, Tuafafine,” na masani lava ona ia fai mai ai. Ae ua leva e le’i toe sau Mikaele i le lotu.
Na moomoo Natalie maimau pe ana mafai ona ia nonoaina o ia i lana maea tafue ma toso mai o ia i le lotu i lana tamai taavale mumu, ae na ia iloaina o le a le fiafia o ia i lena mea. O le a se isi mea e mafai ona ia faia?
I le Peraimeri, na faafeiloai ai ma le fiafia e Sister Chang lana vasega. “Ua ou fiafia lava ua outou o mai uma i le aso,” o lana tala lea. “Ou te fiafia pe a ou vaai i o outou foliga fiafia. Ae o ai o loo misi?”
Na tilotilo solo Natalie i le potu. Na sii lona lima. “O Jed,” o lana valaau lea. “Ua le sau nei Jed.”
“E sao oe,” o le tala lea a Sister Chang. “E le’i sau foi Jed i le vaiaso ua tea.”
“Atonu o ma’i o ia,” o le tala lea a Lisa.
“Atonu o loo malaga,” na fai mai ai Boyd.
“Atonu ua le fia sau lava,” na fai atu lemu ai Natalie.
“E tatau ona tatou faailoa atu ia te ia tatou te alolofa ma misia o ia pe a aluese,” o le tala lea a Sister Chang.
“E faapefea ona tatou faia lena mea?” na fesili ai Natalie.
“O le a tatou tau atu ia te ia,” na fai mai ai Sister Chang. “O mea laiti e masani ona faia ai se eseesega tele. Na ou faia se kata tou te saini ai, ma e mafai ona outou tusia se ata faapitoa mo Jed.”
Na filifili Natalie e tusi se ata o se mauga ma laau aua e fiafia Jed i fafo. Ma na fesili atu Natalie pe mafai ona ia tusia se isi ata e ave i le fale.
Ina ua foi atu Natalie i le fale, na tau atu o nofonofo Mikaele i totonu o lona potu o loo faalogologo i musika. “Malo, Tuafafine,” na ia faafeiloai ai o ia. “O le a le mea ua tupu?”
Na tuu atu e Natalie ia te ia se fasi pepa na gaugau. “Na ou faia se kata mo oe.”
“Mo au?” o le ataata lea a Mikaele. “Aisea? E le o so’u aso fanau po o se isi mea.”
“Na fesoasoani Sister Chang ia te au i le tusiaina o totonu. O loo faapea mai, ‘Ou te misia oe pe a e le sau i le lotu faatasi ma i matou. Ou te alofa ia te oe.’ Ae na ou sainia lo’u igoa.”
“Faafetai,” o le tala lemu lea a Mikaele. “O se kata manaia. Manaia tele lau galuega.”
“Faafetai lava.” Na opo mai e Natalie lona tuagane ma faataalise atu e fesoasoani ia Tina i le faiga o le meaai. Na ia lagona le fiafia i totonu. Na alofa tele o ia i lona tuagane, ma o lenei la ua ia iloaina foi.
O le Aso Sa na sosoo ai, sa fiafia lava Natalie ina ua filifili Mikaele e alu atu i le lotu. Sa ia uuina lona lima ma o atu i le falesa. Sa saofai filemu o ia i ona talaane i le taimi atoa o le sauniga. Na iloa atu e Natalie ia Jed o saofai mai i le laina nofoa lona lua i luma atu, ma talotalo atu ia te ia.
Na fiafia Natalie e alu i le lotu, aemaise lava pe a i ai uma iina ana uo ma lona aiga. Na filifili o ia e amata mai i lena taimi, afai na te misia se tasi, o le a ia tauina atu i ai, aua o nisi taimi o mea laiti e mafai ona faia ai se eseesega tele.
“O la tatou matafaioi … o le vaai o tagata uma ua papatisoina e faamalosiauina ma ia faia ia latou lagonaina le mafanafana o lenei talalelei a lo tatou Alii.”
Peresitene Gordon B. Hinckley, “Saili Tama’i Mamoe, Fafaga Mamoe,” Liahona, Iulai 1999, 118.