2008
O Le Foafoaina o se Faifeautalai—John Kay o Glenrothes, Fife, Sikotilani
Ianuari 2008

Faia o ni Uo

O Le Foafoaina o se Faifeautalai—John Kay o Glenrothes, Fife, Sikotilani

SAUNIA E KIMBERLY WEBB

Mekasini a le Ekalesia

I se tasi taeao malulu o Ianuari, sa tatalaina ai e Alison Kay le faitotoa ma iloa ai ni faifeautalai se toalua na tutu i le timu. Sa ia valaauliaina i laua i totonu. Mulimuli ane, sa ia iloa ai, sa galulue i laua i tau malulu e ui lava o le la aso sauniuni lea. E le’i umi ae papatisoina ma faamauina o ia o se tagata o le Ekalesia.

E fa tausaga o Ioane i le taimi na auai ai lona tina o Alison i le Ekalesia. Talu mai lena taimi, sa manao ai lava o ia e faapei o faifeautalai.

Sefuluai ma Tupe Teu

Sa amata ona totogi e Ioane lana sefuluai ina ua totogi e lona tina lana sefuluai. Ina ua faalogo o ia i le Tupe mo Fesoasoaniga Alofa ma le Tupe Faaagaga mo Aoga, sa amata foi ona fai saofaga atu i ai.

I se tasi aso, na asiasi mai ai faifeautalai. E fiafia Ioane e fesilisili i faifeautalai po o fea e o mai ai, pe faapeī o latou aiga, ma pe toafia ni tagata o loo laua aoaoina ma papatisoina. Ae o le aso lea, sa ia fesili ai pe faapefea ona totogi a laua misiona. E masani lava ona fesoasoani mai matua ma tagata o aiga, o le faamalamalama atu lea a faifeautalai. “Ou te manao e totogi lava e au la’u misiona,” o le tala lea a Ioane. I le 10 o ona tausaga, ua leva ona sauni o ia mo lana misiona i auala e sili atu ma le tasi.

Galue Malosi

E ese mai le ola i le talalelei ma le teuina o ana tupe, ua iloa e Ioane o le aoao e galue malosi o le a fesoasoani ia te ia e avea ai ma se faifeautalai maoae. “E ese le aoao gofie o Ioane,” o tala lea a lona tina. Ua ia aoaoina le tolose, auli, tata lavalava, sui se faamau, vele le togalaau, fufulu le taavale, ma kuka meaai. O ana feau masani lava o le tapenaina o lona potu ma tuu le tagamea i le masini tamea.

O a mea e fiafia i ai Ioane?

  1. Fasipovi kuka a Tina

  2. Karate

  3. Tietie solofanua

  4. O lana puaa fagafao o Saturn

  5. O le tala ia Tanielu i le lua o leona

  6. Taaalo ma uo

  7. Feaei ma Tama

  8. Tusiga ata (o le mataupu e sili ona fiafia i ai i le aoga)

  9. Pisa

  10. Pe’a i le laau tele i le pito i tua o lona togalaau, lea e alu e mafaufau ai

Faasosoloina o le Ataata

Fai mai Ioane e taumafai ia fiafia lona aiga e ala i le tautala faalelei i lona aiga, aemaise lava i lona tuafafine matua o Fipe. “Ma te taumafai e faalogo le tasi i le isi,” o lana tala lea.

Fai mai le tina o Ioane, “E le masani ai pe afai e le mapumapu pe pesepese ia Ioane i le matou fale.” E faafetai o ia ona o le uiga alofa o Ioane aua e pagatia o ia mai le tele o mea e mamafa i lona mafaufau. “E iloa lelei e Ioane le faiga e fai ai au,” o lana tala lea. “O ia e sili ona faamaoni a’ia’i ma faatuatuaina ma e tumu i le loto alofa.”

Ua tulimatai atu Ioane i le mauaina o le Perisitua Mekisateko, e le gata e mafai ai ona auauna atu o se faifeautalai ae e mafai foi ona ia tuuina atu ai faamanuiaga i lona aiga. Mo le taimi nei, e tatalo o ia mo i latou ma faafiafia i latou i ona uiga malie.