Ua Tele Atu se Vaaiga Faavaomalo a Tufuga o Faivaalofilima a le Ekalesia i Lomiga a le Ekalesia
Ua toatele tagata tusiata ma pueata mai le lalolagi atoa ua faaaoga e tuuina atu ai i mekasini a le Ekalesia ma isi lomiga aloaia a le Ekalesia se vaaiga tele faavaomalo.
Na muamua tuuina atu e le Matagaluega o Mataupu Aoaoina a le Ekalesia se valaau mo polofesa tusiata ma pueata i le lomiga o le Liahona o Oketopa 2005. Talu mai lena taimi, ua faasolo lava ina toatele le vaega o tagata talenia a le Ekalesia mai le tele o atunuu ma ua fatuina ai se polokalama komepiuta o nei saofaga. Na sosoo ai ma se talosaga mo tagata tusiata o soo se atunuu e tusia ni vaaiga faalelotu, ae maise lava i tala o le Feagaiga Tuai, lea ua faaopoopo atu i le polokalama.
“O le faamoemoega o le [fatuina ma le faaaogaina] o le polokalama komepiuta ia faateleina ai le sa’o o le fatufatua’i o faatufugaga ma ia atagia tonu ai le Ekalesia i le lalolagi atoa i lomiga a le Ekalesia,” o le saunoaga lea a Tadd Peterson, o lē o loo taiulu i le galuega faatino o se tusi mamanu taitai i le Vaega o Ata o le Matagaluega o Mataupu Aoaoina. “O loo matou taumafai foi e faaaoga ia taleni tusiata a tagata o le Ekalesia i le lalolagi atoa.”
O se vaega o le galuega faatino o le Feagaiga Fou, na auina atu ai e le aufaigaluega o le Liahona se valaau mo le au fai saofaga e fatuina ma auina mai ata vali ma ata tusi e ono mafai ona faaaoga i lomiga a le Ekalesia e lagolago ai le autu o le Feagaiga Fou mo le 2007. Na faaaogaina faivaalofilima mai tusiata i Atenitina, Pasila, Kolumipia, Finelani, Siamani, Peru, ma Aferika i Saute.
O le taimi nei e sili atu ma le 200 tagata pueata, tusiata, ma tusi mamanu mai atunuu e 31 o loo aofia i totonu o le polokalama komepiuta.
Ua tuuina mai e le au fai saofaga ni ata pue mo se vaega o tusiga o le mekasini a le Ekalesia faapea foi ni nai lomiga i le lotoifale mo faifeautalai e o faatasi ma le Talai La’u Talalelei, o se tusi lesona e faaaoga e faifeautalai i le lalolagi atoa.
O le faaaogaina o faivaalofilima faavaomalo e fesoasoani e maua ai se lagona o le lotogatasi i tagata o le ekalesia i le lalolagi atoa, o le saunoaga lea a Uso Peterson. O faivaalofilima ua faaalia ai aganuu eseese ma sitaili eseese, ae peitai, o loo i ai se faaaloalo ma se alofa e tasi mo aoaoga o le talalelei faapea foi le ava ma le migao i mataupu paia.
“O nei faivaalofilima e telē se taua i tagata uma o le ekalesia, e avea moni ma sui o se ekalesia aoao,” na saunoa ai Uso Peterson.
O le auala e sili ona lelei mo le auina mai o se talosaga ia faaaofia [galuega o faivaalofilima] i totonu o le polokalama komepiuta, o le auina mai lea o faamatalaga e faafesootai atu ai ma faataitaiga o galuega o faivaalofilima po o ata pue mo le iloiloina e ala i le i-meli i le cur-artist-photographer@ ldschurch.org. E mafai foi ona auina mai kopi (faamolemole aua nei auina mai uluai galuega) o ata tusi po o ata pue, faamatalaga e faafesootai atu ai, ma se talaaga puupuu o le galuega e faigaluega ai e lafo mai i le:
Artists and Photographers Database
50 E. North Temple St., Rm. 2474
Salt Lake City, UT 84150-3220, USA
O galuega faakonekarate e faalagolago lea i le nofoaga, poto masani, sitaili, ma punaoa e maua e tusiata po o pueata.