O Le Tali Atu a le Ekalesia i Faalavelave Faafuasei ua Faaalia ai le Vave, ma le Maufetuunai

O se mafuie i Peru ma se afa i Mekisiko e na o ni nai aso na va ai le tasi mai le isi, na faaalia ai le vave ma le maufetuunai o auala e tali atu ai le Ekalesia i faalavelave faafuasei.

“O nei faalavelave e lua ua faaalia ai o loo i ai i taitai o le Ekalesia i le lotoifale ia punaoa ma le gafatia e tali atu ai i manaoga faavavave e ala i le faatauina ma le teuina o sapalai faaleoleo i le lotoifale,” o le faamatalaga lea a Dennis Lifferth, o le pule faatonu o le Matagaluega o Auaunaga o le Uelefea i le laumua o le Ekalesia i le Aai o Sate Leki.

O le taimi lava na uma ai le mafuie e 8.0-le malosi i Peru ia Aokuso 2007—o le mafuie ua sili ona matautia ua taia ai le atunuu talu mai le 35 tausaga ua tuanai—na amata iloilo ai e taitai o le Ekalesia i le lotoifale ia manaoga faavavave o tagata Peru uma, ae le na o le Au Paia o Aso e Gata Ai, i le nuu o Pisco lea sa sili ona leaga ona aafiaga.

A o la’uina se uta a le vaalele la’u uta o le ituaiga 747 i le Aai o Sate Leki o sapalai taua faafomai, meafaigaluega e fai ai taotoga, pusa meaai tetele, pusa mo le tumama, ma tapoleni e aveina atu i Peru, o Elder Walter F. González o le Au Peresitene o Fitugafulu, Peresitene o le Eria a Saute Amerika i Sisifo, sa taitaia le faatauina o meaai i le lotoifale ma tatalaina ni falelotu se fa e fai ma malutaga.

O le lua o aso talu ona uma le mafuie, na fai ai Elder González ma sui o le Ekalesia i se sauniga lea na tauaaoina atu ai le sili i le 8,000 palanikeke ia Pilar Nores de García, o le tamaitai sili o Peru, mo le tufatufaina atu i tagata Peru na aafia i le mafuie.

E le’i umi lava ona uma le mafuie, ae agai atu se isi taufaamatau fou i Mekisiko. Na faamoemoe e taia e le Afa o Dean ia Cancun, o lea na amata ai ona faaputu e taitai o le Ekalesia i le lotoifale ni meaai, vai, ma meafaigaluega i se fale e lata i le vaega na faamoemoe e lavea i le afa. Ina ua sui le ala matagi, ma taufaamatauina ai le Penisula o Yucatán, na sii atu e taitai o le Ekalesia ia sapalai i se isi fale i Chetumal. A o amata ona toe foi mai le afa i le atunuu, na faapea foi ona toe faaputuina ni sapalai i se fale lona tolu.

Na iloga se sao o tekinolosi i sauniuniga faavavave, o le tala lea a Rick Foster, o le faatonu o auaunaga faaletaitai mo le Matagaluega o Auaunaga o le Uelefea i le laumua o le Ekalesia. O le taimi nei, ua sili atu nai lo se isi lava taimi, ua mafai ona vave iloa ia faalavelave—o nisi taimi o le nofoaga tonu lava o le faalavelave.

“O le mauaina o lenei faamatalaga na mafai ai e taitai o le Ekalesia ma tagata faigaluega ma volenitia o loo nonofo i eria na faamatauina ona amata le faagasologa o le faatauina o sapalai ma aveina atu tagata i malutaga [na saunia],” o le saunoaga lea a Uso Foster.