E Mafai Faapefea Ona Ou Oo i le Lotu?
I le 1997 na ou oo ai i le mea na faapea o se tofiga e 10 aso e faigaluega ai i La Victoria, Venesuela. Ina ua ou iloaina o le a ou le foi atu i le fale i Italia i le vave sa ou faamoemoeina, sa amata ona ou vaavaai mo se falesa o le Au Paia o Aso e Gata Ai, ou te alu ou te lotu ai i le Aso Sa.
I se tasi aso i le taimi o taumafataga i le aoauli, sa ou faamasani ai i se tasi o enisinia talavou mai Italia o le na iloaina le mea e maua ai se falesa i Maracay. Sa ia tusia se faafanua mo au. Sa i ai se taavale sa ou faaaogaina, ae o le mea na leaga ai, ou te le’i faia le siaki a le fomai na manaomia e maua ai se faatagaga le tumau ou te aveina ai se taavale.
Sa ou fou atu i le eria, sa laitiiti foi lo’u malamalama i le gagana faaSipaniolo, ma sa fautua mai nisi i le le lelei o le alu toatasi i taavale mo femalagaaiga lautele. Sa ou feagai ma se faafitauli. I le taulalata mai o le Aso Sa o le Eseta, sa ou manao lava e faafou au feagaiga e ala i le taumafa i le faamanatuga. Afai e le mafai ona ou aveina le taavale, o le a faapefea ona ou alu i le lotu i Maracay? Afai ou te aveina le taavale, e lamatia au i le taofia ona o le aveave e aunoa ma se pemita.
A o ou mafaufau totoa i mea e mafai ona ou filifili ai, sa oo mai le mataupu faavae o le faatuatua lona 12 i lo’u mafaufau: “Matou te talitonu i le usiusitai … faamamalu, ma lagolagoina le tulafono.” Nai lo lo’u aveina o se taavale, sa ou iloaina e tatau ona ou usitai i le tulafono a le malo (tagai MFF 58:21), e tusa lava pe afai o le a faapea ona misi ai le lotu.
I ni nai aso mulimuli ane, sa ou siitia atu ai i le faletalimalo lea na nonofo ai nisi matou te faigaluega faatasi. I le taeao o le Aso Toonai, ina ua ou foi atu i le faletalimalo mai se savaliga, sa ou taumafai pea e mafaufau pe faapefea ona ou alu i le lotu i le aso e sosoo ai. A o ou pasi atu i le laulau a le tali telefoni, sa ou te’i i lo’u vaaia o se kopi o le Liahona faaSipaniolo.
“O ai le tagata lea e auai i le Ekalesia iinei?” sa ou fesili ai. Sa tali mai se tasi, o le mekasini lena a se tagata e faigaluega i le faletalimalo. Sa alu atu le tali telefoni i lona ofisa ma valaaulia o ia ma te feiloai. A o ma talanoa e uiga i le Ekalesia, sa tau mai e lenei uso lelei o loo i ai se uarota iina lava i La Victoria, ma e le mamao lava le falesa pe a savali mai le faletalimalo. Fai mai o ia, o le a fiafia ma te feiloai i le taeao e sosoo ai ma te o i le lotu. Maeu lo’u fiafia!
Sa iu ina ou nofo ai lava i La Victoria mo isi masina e lua. O le taimi lena sa ou faia ai ni faauoga se tele a o ou auai ma le fiafia i le lotu ma gaoioiga. E le’i leva lava ona uma le Eseta, ae ou maua le faatagaga aloaia e aveina se taavale, lea sa mafai ai ona ou alu i le konafesi a le siteki i Maracay.
A o ou i ai i Venesuela, sa faamalosia—lau molimau i le taua o le usitai i tulafono a le malo—e tusa lava pe faigata. Sa ou maua ai foi se molimau e faapea, o lomiga a le Ekalesia o se auala lelei tele lea e faasoa atu ai faamanuiaga a le Alii.