Savali a Faiaoga Asiasi

Na Aoao Mai e Iesu Keriso le Faamoemoega o lo Tatou Olaga i le Lalolagi

Filifili ma faitau ma le agaga tatalo mai lenei savali ni mau ma aoaoga e fetaui ma tulaga o loo manaomia e uso o loo e asia. Fetufaai atu i ai ou aafiaga ma molimau. Valaaulia foi i latou o loo e aoaoina ia faapena foi ona fai.

O Le a le Faamoemoega o le Olaga i le Lalolagi?

Peresitene Spencer W. Kimball (1895–1985): “O le tagata na foafoaina i le faatusa o le Atua, na tuuina i le lalolagi e ola i le olaga faaletino, o se tulaga e i le va o le muai olaga ma le tino ola pea.

“O o tatou uluai matua, o Atamu ma Eva, sa le usiusitai i le Atua. O le aina o le fua o le laau na faasaina, na avea ai i laua ma tagata faaletino. O le taunuuga, o i laua faapea ma a laua fanau uma e oo uma i le oti faaletino ma le oti faaleagaga (o le oti faaletino, o le tuueseeseina o le tino ma le agaga; ma le oti faaleagaga, o le tuueseeseina o le agaga mai le afioaga o le Atua ma le oti e faatatau i mea a le agaga).

“Ina ia mafai e Atamu ona toe maua lona uluai tulaga na i ai (ina ia i ai i le afioaga o le Atua), na tatau ai se togiolaina mo lenei le usiusitai. I le fuafuaga paia a le Atua, na faia ai se fuafuaga mo se faaola e tatalaina noataga o le oti ma, e ala i le toetu, ia mafai ai le toe tuufaatasia o agaga ma tino o tagata uma o e na nonofo i le lalolagi.

“O Iesu le Nasareta o ia lea o lē, a o le’i foafoaina le lalolagi, sa filifilia e sau i le lalolagi e faatino lenei auaunaga, ia manumalo i le oti faaletino” (“The True Way of Life and Salvation,” Ensign, Me 1978, 6).

O Le a Se Mea Ou te Faia e Faataunuu ai le Faamoemoega o Lo’u Olaga?

Peresitene Ezra Taft Benson (1899–1994): “Ina ua tuuina e lo tatou Tama Faalelagi ia Atamu ma Eva i lenei lalolagi, sa Ia faia lea tulaga ma le fuafuaga na mafaufau i ai e aoaoina i laua i le auala e toe foi atu ai i Lona afioaga. Na folafola mai e lo tatou Tama Faalelagi se Faaola e togiolaina i laua mai lo laua tulaga pau. Sa Ia tuuina atu ia i laua le ata o le faaolataga ma tau atu ia i laua e aoao a laua fanau ia faatuatua ia Iesu Keriso ma salamo. Ma le isi, na poloaiina e le Atua ia Atamu ma lana fanau ina ia papatisoina, ia maua le Agaga Paia, ma ia ulu atu i le tofiga o le Alo o le Atua … , o lona atoaga e na o totonu o le Maota o le Alii e maua ai” (“What I Hope You Will Teach Your Children about the Temple,” Ensign, Ape.–Me 1986, 4).

Julie B. Beck, peresitene aoao o le Aualofa: “Ina o avea ma afafine agaga o le Atua, o tamaitai ‘sa aoaoina i latou i a latou uluai lesona i le lalolagi o agaga ma saunia e o mai’ (MFF 138:56) i le lalolagi. O i latou o nisi o ‘tagata tautaua ma le maoae’ (MFF 138:55) sa ‘alalaga fiafia’ (Iopu 38:7) i le foafoaina o le lalolagi, aua o le a latou maua ai o latou tino faitino faatasi ai ma le avanoa e faataitai ai i se lalolagi faaletino (tagai Aperaamo 3:25). Latou te moomoo e galulue faatasi ma alii amiotonu, e faataunuu sini e faavavau, ia e le mafai ona maua taitoatasi.

“E le’i amataina le matafaioi a tamaitai i le lalolagi, ma e le muta ai foi iinei. O se tamaitai na te faatauaina le tulaga faatina i le fogaeleele, o le a ia faatauaina foi le tulaga faatina i le lalolagi a sau, ma ‘o le mea e i ai [ana] oa, e i ai foi [lona] loto’ (Mataio 6:21). O le atinaeina o se fatu faatina, e saunia ai teine ma tamaitai taitoatasi mo lana misiona paia e faavavau, o le tulaga faatina… .

“Mai mea na ou oo i ai, ua ou vaai i nisi o fatu faatina moni i tamaitai latou te le o tausia ni a latou lava fanau i lenei olaga, ae ua latou iloa ‘o mea uma e ao ina oo mai i ona aso’ ma o loo latou ‘faataatia le faavae o le galuega tele’ (MFF 64:32–33)” (“O Se Fatu Faatina,’” Liahona, Me 2004, 76).