Manatu Faaopoopo mo Taimi o Fetufaaiga, Ianuari 2008

O manatu faaopoopo nei e mafai e taitai o le Peraimeri ona faaaogaina faatasi ma le Taimi o Fetufaaiga o loo lomia i le Liahona o Ianuari 2008. Mo le lesona, faatonuga ma le gaoioiga e o faatasi ma nei manatu, tagai i le “O Lo’u Olaga o se Meaalofa; O Lo’u Olaga Ua I Ai se Fuafuaga” i itulau U4 ma le U5 o le vaega a tamaiti o le lomiga lenei.

Ia fesili atu i tamaiti pe o le a le uiga o le ia faamaoni. Ia fautua atu upu faatino e faatusa i ai le faamaoni o se tagata e pei o le mulimuli, auauna, tausia, usitai, faalagolago, ma isi lava. Faitau faatasi le 2 Nifae 10:23. Aoao atu e uiga i le meaalofa o le saolotoga. Ia talanoaina le uiga o le ia faamaoni i a tatou molimau ia Iesu Keriso.

Fai se kopi o le taaloga “Sauniuni mo le Afio Mai o Iesu” o loo maua i le pito i tua o le tusi lesona Peraimeri 2. Ia saunia ni fasipepa laiti se 12. Tusi ai se numera i luga o fasipepa taitasi, faaaoga ai faalua le 1 e oo i le 6. Gaugau ia pepa, ma tuu i se koneteina. Taaalo i le taaloga e ala i le valaaulia o tamaiti e o mai i luga, se’i se numera, ma tuu le faailoga i avanoa i le aofai tonu o numera. Faitau le sikuea. Afai o loo faamatala mai ai se filifiliga sao, ia fesili atu pe aisea e avea ai lea filifiliga o se filifiliga faamaoni. Afai e faamatalaina ai se filifiliga sese, ia fesili atu pe mafai faapefea e tamaiti ona filifili ia faamaoni. Taalo i le taaloga i le umi lava e mafai ona taalo ai. Ia faauma i le tuuina atu o le molimau i le taua o le faamaoni i a tatou molimau ia Iesu Keriso.
Ia saunia ata e ‘oti 1–1 e oo i le 1–25 mai le taga ata o le Peraimeri 1. Ia valaaulia tamaiti e fesoasoani e faamatala le tala o le Foafoaga e faaaoga ai ata na ‘oti. Ia faailoa atu le agaga faafetai mo le lalolagi matagofie na foafoaina e Iesu Keriso mo i tatou.

Ia faaali atu le Taga Ata o le Talalelei 101 (Atamu ma Eva). Fesoasoani i tamaiti e sue le mau Mose 5:4, ma faitau le fuaitau “Ma sa oo ina valaau atu Atamu ma Eva, lana ava, i le suafa o le Alii.” Ia talanoaina pe o le a le uiga o lenei mea. Faaali atu le ata 1–34 (Atamu ma Eva o loo aoaoina le la fanau) mai le taga ata Peraimeri 1, ma faitau le Mose 5:12. Ia fesili atu, “O le a le mea na fai e Atamu ma Eva e fesoasoani ai i le la fanau?”

Fesili atu i tamaiti pe faapefea ona aoao atu e o latou matua ia i latou le talalelei. Ia tuuina atu nisi o faataitaiga pe a manaomia, e pei o le avea ma se faataitaiga lelei ma le faia o afiafi faaleaiga. Usu se pese po o se viiga e faatatau i aiga. Ia molimau atu o Iesu Keriso na foafoaina le lalolagi ma o Atamu ma Eva o uluai matua ia i luga o le fogaeleele.

Mo tamaiti e matutua atu: Ia saunia se itulau o se pepa ma se lisi o upu eseese e faamatalaina ai mea na tutupu o le Foafoaga (malamalama, aso, po, lagi, laueleele matutu, vao, laau, malamalama tele, malamalama itiiti, ma isi lava). Fai atu i tamaiti e sue i le Kenese 1, sue pe o le a le aso na tupu ai vaega taitasi, ma lisi le fuaiupu o le mau. (Faataitaiga: Malamalama—aso muamua, Kenese 1:3–5.)
Aoaoina o le pese: “O A’u o se Atalii o le Atua” (Tusipese a Tamaiti, 2–3). Ia taulai atu i le fesoasoani i tamaiti ia iloa ma malamalama i le taua o aoaoga faavae o loo aoaoina i lenei pese. Ia valaaulia tamaiti e faalogologo a o tata e le ta piano le fati o le tali ma ia tutu i luga pe a latou iloaina le pese. A tutu uma loa le toatele o tamaiti, fai atu i ai e musumusu mai le igoa o le pese. Usu atu le tali i tamaiti. Fai atu i tamaiti tou te pepese faatasi i le tali ma faalogologo mo upu faatino e faamatalaina ai mea latou te mananao i se tagata na te faia mo i latou. Usu le tali, ma lisi ia tali a tamaiti i luga o le laupapa (faasino, taitai, savali i tafatafa, fesoasoani, aoao). Ia fesili atu: “O ai e faasinoina i tatou? O le a le taimi e taua ai le i ai o se taitai? Aisea e te manao ai e savali se tagata i ou tafatafa? Aisea o le a e manao ai i se tasi e fesoasoani ia te oe e sue le auala? O a nisi o mea e ao ona tatou faia e mafuta ai ma le Tama Faalelagi i se aso?” Toe usu le tali, ma molimau atu i faamanuiaga o le i ai o ni matua, faiaoga, taitai, perofeta, ma tusitusiga paia e fesoasoani e toe maua ai lo tatou auala i le Tama Faalelagi.

A o e aoaoina atu ma toe faamanatu ia fuaiupu o le pese, faaaoga upu autu po o fuaitau e fesoasoani ai i tamaiti e manatua aoaoga faavae o loo aoaoina i fuaiupu taitasi. Mo se faataitaiga: fuaiupu 1—meaalofa (aiga ma matua faalelalolagi); fuaiupu 2—tusitusiga paia (Ana afioga); fuaiupu 3—faamanuiaga; fuaiupu 4—E moni lava Ana folafolaga.