Tali atu le Ekalesia i le Afa o Dean

A o papai atu le faalua a le Afa o Dean i eleele o Mekisiko, o le taimi lenei o se matagi o le vaega-2, sa faaauau ona galulue taitai o le Ekalesia i le lotoifale ma taitai o le atunuu i Jamaica e iloilo ni auala e sili ona lelei e fesoasoani ai i tagata e toe tulai mai mai faatamaiaga a Dean lea na tuua e pei o se afa o le vaega-5.

Na aumaia e Dean ni matagi afa i le tele o itu o Jamaica i le Aso Sa, 19 o Aokuso, 2007, peitai o savili e 145-maila-i le-itula (233-kilomita-i le-itula) e lata i le mata o le matagi na agai atu i saute o le motu. E ui ina sa tele fale o aiga o le ekalesia na faaleagaina taualuga ma isi mea, ae na lipotia mai le saogalemu uma o i latou faapea ma faifeautalai.

Na papai atu Dean i gataifale o le atu Keripeane o Mekisiko i le aso 21 o Aokuso. Na pasi a’e le mata o le matagi i se eria e tau leai nisi e nofoia o le Penisula o Yucatán, e 40 maila (64 km) i sasae-matusasae o Chetumal, Mekisiko. Na toe faaopoopoina le malosi o Dean a o pasi atu i le Vaifagaloa o Campeche ma taia ai le ogatotonu o gataifale o Mekisiko pe a ma le 100 maila (160 km) i matu o Veracruz, Mekisiko.

Sa lipotia mai le saogalemu o tagata o le ekalesia faapea ma faifeautalai. Na faatulagaina e taitai o le Ekalesia ni fale saogalemu ma le tele o meaai ma vai mo faifeautalai, ma sa saunia foi taitai o le faleteuoloa a epikopo i Mekisiko e uta atu fesoasoaniga alofa pe a manaomia.