Faia o Soo Se Uarota ma “Au Uarota”
O le toe amata mai i le amataga i totonu o se uarota po o se paranesi fou e mafai ona luitauina. O nai motugaafa nei se lima e avea ai tagata ese o ni uo.
O tausaga ua tuanai, ina ua ou toe foi atu i le lotu e le aunoa, i le mavae ai o se vaitaimi sa ou le toaga ai, sa ou mautinoa na iloa e tagata uma o le uarota o au o se tagata agasala faamaualalo sa sailia le salamo. I se faatusatusaga, na foliga mai na iloa lelei lo latou agalelei i o latou laufofoga ataata ma molimau mananaia, ae o au agasala na tau le iloa ai au ma le aogā. I le toe tepa i tua, na ou iloa ai, o tagata fou i tulaga eseese e mafai ona lagonaina le iloagofie tele pe matauina gofie. O le savali atu i totonu o se falelotu fou, o le saofai i talaane o ni tagata e te le iloaina, ma le pese toatasi mai se tusipese, e avea o ni mea lofituina pe afai e tumu oe i le popole po o a manatu o isi tagata e uiga ia te oe.
I le avea ai ma se tamaitai nofofua e leai se fanau, na ou iloa ai o le toe amata i se uarota fou e fai lava si taufaafefe. Petai, o lena alu atu ma le popole i totonu o se falesa e tumu i tagata ese, o se tasi lea o mea ua faafia ona ou faia ona ou te siitia soo ona o la’u galuega. I le aluga o tausaga, na ou aoaoina ai le faaaogaina o se uiga faaalia fou i la’u uarota ma galue i le faia o na tagata ese e avea o ni au uo ma ni aumea mafana. O auala o loo i lalo e mafai ona fesoasoani ia i tatou uma ia lagona ai le masani i soo se uarota po o paranesi, e tusa lava po o fea o le lalolagi tatou te o i ai.
Manatua le mafuaaga tatou te o mai ai i le lotu. O se falesa o se nofoaga paia ma saogalemu mo fanau a le Tama Faalelagi e faapotopoto ai e tapuai atu ia te Ia. O iina e mafai ona tatou faatasia ai i le tatalo, pese, ma le faamoemoe. Aloese mai le faamasinoina o isi, po o le manatu foi o loo faamasinoina oe e isi. E fesoasoani ia te au le manatua, o tagata uma o loo taumafai e o mai i le lotu o loo taumafai foi e pei o au, e fetagofi atu i le Togiola a le Faaola ma tausi Ana poloaiga.
Ia faailoa atu oe. Na ou aoaoina, o le mea muamua lava ia saili le au epikopo ma faailoa atu i ai au lava ina ia latou silafia ou te fou atu. A uma lena, ia mautinoa ia ou iloaina le taitai vaega o faitaulaga sili aua o le a ia tofia ni faitaulaga sili e avea ma ou faiaoga o aiga. Ma le isi, i le avea ai o se uso, ia mautinoa ou te iloa po o ai uso o le au peresitene o le Aualofa. E manaomia foi e le failautusi o le uarota lo’u tuatusi ma le numera o le telefoni, e mafai ai ona ia talosagaina o’u pepa faamaumau mai la’u uarota muamua. O tagata nei na latou faailoaina atu au i isi tagata o le uarota, fesoasoani ia ou iloa lo’u auala i gaoioiga a le uarota ma le siteki, ma tuuina mai le lagolago ina ua ou maua se valaauga.
Sa masani ona ou nofo i le nofoa umi mulimuli lava, e lata i le faitotoa, o le taimi lava e uma ai le tatalo faaiu, ou te teleai ai i fafo a o le’i tautala mai se tagata ma fesili mai po o ai au. Ae o le savali punou atu i totonu ma toe sau i fafo—pe faataupupula atu i le faitotoa e o atu ai i fafo—e laitiiti lava se fesoasoani e te masani ai i se uarota fou.
Faagalo lou popole, ae alu atu i le tagata o loo i ou luma. Lulu lima ma i latou e faiaoga i vasega e te auai pe na lauga foi i le sauniga faamanatuga (e mafai ona e feiloai i ai i le faapaologa o le falesa pe a uma). Afai e te faaaluina sina taimi e te tilotilo solo ai i le potu ae e te le’i nofo i lalo, e mafai ona e feiloai atu i tagata taitoatasi ma aiga i taimi taitasi e te alu atu ai i se sauniga. Ia lototele e fesili atu mo se auala e te alu atu ai i se gaoioiga a le uarota po o le paranesi. E masani ona faigofie atu le savavali faatasi i totonu ma se isi tagata nai lo le ulufale atu toatasi. Fesili mo se lisi o telefoni a le uarota po o le paranesi; o le a fesoasoani e te manatua ai igoa. E le umi lava ae e matauina igoa ma foliga, ma o le a le toe avea na tagata ma tagata ese. E faapena foi ia te oe.
Auauna Atu. Saili ni auala e mafai ona e fesoasoani atu ai i tuaoi ma tagata o le uarota po o le paranesi, e tusa lava pe faatauvaa e pei o le tatalaina o le faitotoa ma faafeiloai i latou a o latou ulufale atu. (O le a fesoasoani foi lenei faiga e manatua ai e isi ia oe.) Tusi lou igoa i lisi o le au volenitia. Fesili po o ai o gasegase po o taofia i le falemai, ma asiasi atu ia i latou. Talia ia valaauga. Pe a talafeagai ai, ia faailoa atu i le epikopo po o le peresitene o le paranesi ia tomai o loo ia te oe e ofoina atu e ese mai lou valaauga, ma fai atu i ai e mafai ona faalagolago atu ia te oe pe a i ai se mea e manaomia ai.
Ia saunia e auai. O vasega o le Aoga Sa, au perisitua ma le Aualofa e mulimuli i se faatulagaga o lesona. Aumai ia tusi lesona, faitau le lesona a o le’i oo i le taimi o vasega, ma ia saunia e faitau mau po o le faamatala o mataupu faavae na aoaoina e ala i le faasoa atu o aafiaga o lou olaga. O le tautala i nofoaga faitele e fai si lofituina, faatoafilemu lelei lou fefe, ma ia saunia e faasoa atu lau molimau i le moni o le talalelei.
Vaavaai mo ni foliga fou. Ia aapa atu i isi i se auala e te manao foi latou te aapa atu ai ia te oe. A uma sina taimi, o le a e iloa ai ua “le toe tagata ese outou, po o e ua aumau, a ua nuu faatasi ma le au paia, o le aiga foi o le Atua” (Efeso 2:19). Ua e mafanafana i lou aiga fou o le Ekalesia.
O aiga o le uarota po o le paranesi e aofia ai tagata uma—e le tatau ona i ai se tasi e tuua na o ia. Atonu e le o taimi uma e mafai ai ona maua ni faauoga ma tagata taitoatasi o le ekalesia, ae a faasoa atu lo tatou fiafia i le talalelei, afai e mama a tatou molimau, afai tatou te naunau e tausoa avega a le tasi ma le isi, ma afai e faaaoga lo tatou naunau e auauna atu i le Alii e ala i le auauna atu o le tasi i le isi, o i tatou o se aiga. Ou te faafetai lava ona po o fea lava ou te alu i ai i lenei lalolagi, o paranesi ma uarota uma o loo i ai foi isi fanau a le Tama Faalelagi. Ou te molimau faamaoni atu o le uarota o loo ou auai ai nei o le nofoaga sili lea ona fiafia mo au ou te i ai.