O Le Tusi a Mamona: O Le Punaoa Sili i le Filemu o le Faaola

SAUNIA E ELDER NEIL L. ANDERSEN

O Le Au Peresitene o le Au Fitugafulu

A o lumanai le toe faapaiaga o le Malumalu o Sāo Paulo Pasila i le 2004, na tatalaina ai faitotoa o le malumalu i le toatele o taitai taualoa mai le malo, pisinisi, ma aoga. A o ou faafeaoina atu se taitai filifilia e maualuga lona faaaloalogia i le malumalu, sa ou matauina o lona mafaufau sa matuai taulai atu ma le totoa. Ana matou le oo lava i se potu faamauga i le faaiuga o le matou asiasiga, ou te le malamalama lelei i le mafuaaga.

I se leo faatauanau sa ia fai mai ai ia te au: “Lau Susuga Andersen, ou te fia tau atu ia te oe se mea e uiga i lo’u aiga. Na maliu lo’u atalii aupito matua i le lima tausaga talu ai i le 35 o ona tausaga ona o le kanesa. I ona masina mulimuli sa le mafai ona ia maua se filemu. Sa le mautonu, atugalu, ma popole i lona aiga, lona olaga, ma le tulaga sa i ona luma. I le iloaina e uiga i le tulaga o lo’u atalii, na faasoa mai ai e sa’u uo o se tasi o le Ekalesia ia se kopi o le Tusi a Mamona ma fautuaina ina ia ou fetufaai atu i lo’u atalii.

“O se vavega ia te au le vaaia o taunuuga o lena tusi i lo’u atalii. Sa lofituina ai o ia. Sa ia tusia ai i totonu ni faamatalaga ma ni manatu. Na mou ese ona popolega ma atugaluga. O le faitauina o le Tusi a Mamona sa ia maua ai le filemu tele. Ina ua maliu o ia, sa taatia lava le tusi i ona tafatafa. Ou te matuai faafetai lava mo le filemu na aumaia ai ia te ia.”

Ua tatou ola i lena vaitaimi ua loa ona valoia o le a faapea ona aveesea ai le filemu mai le lalolagi: “E faalogoina foi i lea aso taua ma tala o taua, o le a vavaō le lalolagi atoa, ma e matatau ma loto vaivai tagata” (MFF 45:26). Tatou te talanoa e le gata i le feteenai o atunuu ae faapea foi i le saoasaoa ma le le maopoopo o aai i aso nei, o le faasoesa o auala o faasalalauga ma tekinolosi, o le matape’ape’a i mea o le lalolagi, o le le mautu o tamaoaiga lelei, ma le fenumiai o le fesuisuiai o tulaga faatauaina. Tatou te galala mo le filemu.

E ese le manaia o afioga a le Faaola: “Ou te tuuina atu ia te outou le manuia, o lo’u manuia ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27).

E te manao ea i se filemu sili atu i lou olaga ma lou aiga? Faamata e te suia se mea o loo e faia i lou olaga, ina ia e maua ai le filemu sili atu o le Faaola?

O le Tusi a Mamona o se punavai o le filemu i le agaga ua galala. O se punaoa sili o le filemu o le Faaola. Ua faamalamalama mai i le folasaga o le Tusi a Mamona e faapea, e tau mai e le tusi ia i tatou le mea e ao ona tatou faia “e maua ai le filemu i lenei olaga ma le faaolataga e faavavau i le olaga a sau” (ua faatusilima mea e faamamafa).

O le faitauina o auala e aumaia ai e le Tusi a Mamona le filemu i le agaga, e pei lava o le faitauina o le oneone i luga o le matafaga. Sei ou faamatala atu ni nai auala, e mafai ona e faateleina le lisi e ala i ou lava aafiaga.

Filemu mai le Faatuatua ia Iesu Keriso

Mai le amataga e oo i le faaiuga o le Tusi a Mamona, “ua matou tautalatala ia Keriso, ua matou olioli ia Keriso, ua matou tala’i atu Keriso, ua matou vavalo atu foi ia Keriso, … ina ia iloa e a matou fanau le mea latou te faamoemoe i ai mo le faamagaloina o a latou agasala” (2 Nifae 25:26). E sili atu ma le afa o fuaiupu i totonu o le Tusi a Mamona e faatatau atu pe talanoa foi e uiga i le Faaola.¹

O tausaga taitasi, e masani lava i le vaitaimi o le Eseta ma le Kerisimasi, e fesiligia ai e tala fou o mekasini i le lalolagi atoa ia fesili: O ai Iesu Keriso? Pe Na Soifua Mai o Ia? Faamata e moni ia tusitusiga o loo i le Tusi Paia?² Ae ua tatou iloa e moni le Tusi Paia. Na tautino mai e Mamona, “Ua tusia lenei [le Tusi a Mamona] ina ia outou talitonu i lena [Tusi Paia]” (Mamona 7:9).

A o avea au ma se faifeautalai i Europa i le amataga o le vaitaimi o le 1970, sa amataina le tele o a matou aoaoga i le Liliuese aua na tele ina taliaina [e tagata] le paia o Keriso. Ina ua ou toe foi atu o se peresitene o le misiona i le 20 tausaga mulimuli ane ai, na suia le faamamafa o a matou aoaoga ona na matuai mou atu lava le talitonuga o Iesu o le Alo o le Atua, o le na tuuina mai Lona soifua mo a tatou agasala ma na toetu mai i le aso tolu. O le taua o la tatou molimau e uiga ia Iesu Keriso o le Alo o le Atua, o le a faaauau ona tuputupu ae e le gata i totonu o Europa ae faapea foi i le lalolagi atoa.

O se tasi o faamanuiaga o o tatou taimi ma taimi o lumanai, o le mafai lea ona tatou aveina atu o la tatou savali i le toatele o tagata o e laitiiti so latou iloa e uiga ia Iesu Keriso ma Lana misiona. Ua faatumulia le Tusi a Mamona i faamautinoaga o Keriso, ua aumaia faatasi ai ma le filemu tele ia i latou uma o e taliaina.

I mataupu a o lumanai le afio mai o le Mesia, tatou te aoao ai e uiga i Ona faamoemoega, Ana folafolaga, ma Lona mana faamalolo. Tatou te aoao e uiga i valoaga e faatatau i Lona soifuaga ma vavega i Amerika i le taimi o Lona fanau mai.

I Lona tulaga toetu, na Ia tautino mai ai, “Faauta, o au o Iesu Keriso, o Le na molimau ai perofeta, e sau i le lalolagi” (3 Nifae 11:10). Tatou te lagona Lona alofa mo i tatou: “Ua mutimutivale lo’u alofa ia te outou; ua tumu lo’u loto i le alofa” (3 Nifae 17:7). “Amuia outou ona o lo outou faatuatua. O lenei, faauta, ua atoatoa lo’u olioli” (3 Nifae 17:20). Tatou te vaaia o Ia i Lona mamalu o lo tatou Togiola, o le Tupu o tupu.

Mai lenei molimau o le Tusi a Mamona, e faamaoniaina e le Agaga, e tafe mai ai se filemu faaleagaga e le mafaamatalaina, e faamautinoa mai ai ia i tatou o Ia moni lava “o le toetu, ma le ola” (Ioane 11:25) ma o lo tatou filemu e faavavau o le a ia te Ia lea.

O Le Filemu o se Molimau o le Toefuataiga

O le Tusi a Mamona o se faaaliga faaletino o le misiona faalelagi a le Perofeta o Iosefa Samita. Ua i o tatou lima le tusi. E mafai ona tatou fetagofi i ai. E mafai ona tatou faitau i ai.

E faapefea ona talitonu se tagata e mafai e Iosefa Samita ona tusi se tusi faapena? Na tusia e lona faletua o Ema e faapea: “E le mafai e Iosefa … ona tusitusi pe faalau atu se tusi talafeagai ma faaupuina lelei; aemaise lava le faalauina o se tusi e pei o le Tusi a Mamona. Ma, e ui ina sa ou auai malosi i vaaiga na faapea ona tutupu ai, e ofoofogia ia te au, ‘o se [galuega] maoae ma le ofoofogia,’ e faapena foi i soo se isi tagata.”³

E leai se faamatalaga e uiga i le amataga mai o le Tusi a Mamona, sei vagana ai le tala a Iosefa Samita lava ia (tagai Talafaasolopito—Iosefa Samita 2:29–60), ua faaalia ai se faamaoniga. O alii faamaoni na molimau ma le lotomalie i le uuina o papatusi ma na faaali atu ia i latou e se agelu a le Atua—o se molimau latou te le’i faafitia lava. O le mea e sili atu ona taua, e oo mai le Tusi a Mamona faatasi ma se folafolaga faapea, a tatou ole atu ma le faamaoni i le Atua, ma le faatuatua ia Keriso, o le a Ia faaali mai le moni o ia mea ia i tatou e ala i le mana o le Agaga Paia (tagai Moronae 10:3–5).

Ua faamaonia mai e lenei molimau o le Tusi a Mamona “o Iesu Keriso o le Faaola o le lalolagi, o Iosefa Samita o lana talifaaaliga ma le perofeta i nei aso e gata ai, ma O Le Ekalesia a Iesu Keriso o le Au Paia o Aso e Gata Ai o le malo lea o le Alii ua toe faatulagaina i luga o le fogaeleele, e sauniuni ai mo le toe afio mai faalua o le Mesia” (folasaga o le Tusi a Mamona).

Na ou vaai i le mana o le Tusi a Mamona i le aumaia o se molimau o le Toefuataiga i le faitau afe o tagata i salafa o le lalolagi. Na ou faalogo i aafiaga i le tele o gagana, vaaia le tuuto o aganuu eseese, ma na ou tu ma maofa i le tutusa o le filemu e aumai e le Tusi a Mamona. E sa’o lava o se “galuega ofoofogia ma le mea e ofo ai” (2 Nifae 25:17).

O le taimi muamua na ou iloa ai le mana o le Tusi a Mamona i le olaga o se tagata liliu mai, a o ou auauna atu o se faifeautalai i Farani. Sa tele se taimi na ma faaaluina ma la’u soa mai Peretania i le tuitui o faitotoa—ae sa le tele se taunuuga. I se tasi aoauli na tatala mai ai e se tamaitai lauiloa e faamatua tagata lona faitotoa. Sa le umi sona taimi mo i maua i lena aso, ae na ma tuua ai se Tusi a Mamona ma faia se taimi tuupoina ma te toe foi atu ai i le lona lua o aso na sosoo ai. Ina ua ma foi atu i lona fale mautotogi ma tatala mai le faitotoa, na ou lagonaina se lagona faaleagaga mamana. Sa naunau o ia e vaai mai ia i maua. Sa ia faitauina le tusi ma lagonaina ai lagona mamana o le Agaga Paia. Sa ia talanoa mai e uiga i lona olioli ma le filemu. Sa saunia o ia mo soo se mea o le a ma valaauliaina o ia e fai, i le avea ai o i maua ma auauna a le Alii.

O se aso malulu ia Fepuari. Sa leai se falesa a le matou nuu, o lea na ma faatuina ai se faatanoa feaveai mo papatisoga i totonu o se fale laupapa tuai e teu ai meafaigaluega. Na taai le ausa o le vai mafanafana i le ea. Na siomia e tagata lotomaualalalo o le paranesi le faatanoa feaveai a o savali ane lenei tuafafine i le faasitepu ma alu i totonu o le vai ina ia papatisoina o se tagata o le Ekalesia.

O le filemu na faaalia e lenei tuafafine lelei na toe oo mai ai upu a Parley P. Pratt (1807–57) ina ua ia ta’ua le taimi muamua na ia mauaina ai le Tusi a Mamona: “A o ou faitau, na i o’u luga le agaga o le Alii, ma na ou iloaina ma malamalama ua moni le tusi, e pei lava le manino ma le iloa lelei o le malamalama ma le iloa e se tagata o loo ola o ia.”⁴

Faatasi ai ma le faamautinoaga a lenei molimau, tatou te o mai ai i le Ekalesia ma maua le lototetele i folafolaga ma matafaioi o a tatou feagaiga. O la tatou molimau e uiga i le tele o mataupu faavae o le talalelei, e tuputupu pea i le taimi atoa tatou te ola ai i le lalolagi, ae e masani lava o le Tusi a Mamona na te aumaia muamua ia i tatou le filemu tumau o le iloaina ua toefuataiina mai le talalelei ma le perisitua. O se faavae lea o loo tatou ola ai.

O Le Filemu o Aoaoga Faavae Mama a Keriso

I le aliae ai o faafitauli i lona nuu, na naunau ai lava Alema “e tatau ona latou tofotofoina, pe aoga i ai le afioga a le Atua,” lea sa “sili ona aoga ai i manatu o le nuu ai le pelu, po o se tasi mea” (Alema 31:5).

O le aoaoga faavae moni a Keriso, e mauaina ma le faatuatua, e suia ai o tatou olaga ma aumai ai le filemu ia i tatou. Na fetalai mai le Alii lava Ia, o le Tusi a Mamona o loo i ai “le atoatoa o la’u tala lelei faavavau” (MFF 27:5; tagai foi MFF 42:12). O le Tusi a Mamona ua faaali mai ai le ata o le faaolataga ma “taliina ai fesili maoae o le agaga.”⁵

O lesona o le upumoni i totonu o le Tusi a Mamona o loo aoaoina i tulaga faigata o taua ma puapuaga, i lauga a perofeta, i talanoaga a tama i atalii, faapea ma upu a le Faaola lava ia. O loo i ai se autu aupito taua: “E afio ifo le Atua lava i le fanauga a tagata ma togiola lona nuu” (Mosaea 15:1). O loo i ai i latou o loo saili: “Ou te faamatala atu foi ia te outou le fagatuaga na ou faia i luma o le Atua” (Enosa 1:2). O loo i ai le valaau faifai pea e lafoai a tatou agasala ae laa i se tulaga e maualuga atu: “Ua oo foi ina i ai a’u i le tiga matua tele lava ma le puapuaga o le agaga i ao e tolu ma po e tolu; na ou le maua foi le faamagaloina o au agasala, seia uma ona ou tagi atu i le Alii o Iesu Keriso i le alofa. Ae peitai, faauta, na ou tagi atu ia te ia, ona ou maua ai lea le filemu o lo’u agaga” (Alema 38:8; ua faatusilima mea e faamamafa). Ma o loo i ai foi upu faamafanafana ma tumu i le filemu a le Faaola: “Pe tou te le foi mai nei ea ia te au … ina ia ou faamaloloina outou? … Afai tou te o mai ia te au, e maua e outou le ola faavavau. Faauta, ua faaloaloa atu lo’u lima alofa ia te outou, ai se sau, ou te talia o ia” (3 Nifae 9:13–14).

E faasolo malie ae e le Tusi a Mamona ana tala i o tatou luma. A o tatou mafaufau loloto ma tatalo e uiga i ai, e faaali mai e le Alii i le vaega filemu o o tatou loto lo tatou lava manaomia ona salamo ma suia. A o tatou osifeagaiga ma le Alii ma fai suiga i o tatou olaga, tatou te lagonaina le mana o Lana Togiola ma le faamautinoaga o le filemu. A o agai i luma la tatou malaga faaleagaga, tatou te lagonaina le faamalosia e ala i Lona alofa tunoa a o tatou faafetaiaia ia faigata ma faafitauli o le olaga. Na faapea mai se Aposetolo, “A tatou mananao e talanoa i le Atua, tatou te tatalo. Ma a tatou mananao ia te Ia e talanoa mai ia i tatou, tatou te suesue i tusitusiga paia.”⁶

O le filemu lenei o le aoaoga faavae moni a Keriso o loo maua i le Tusi a Mamona.

O Le Filemu o le Tatou Aiga

I le vavaō, pisi, ma le le mautonu o o tatou olaga, e moomoo ai o tatou aiga mo se filemu. Tatou te manaomia ia avea o tatou aiga ma nofoaga o le sulufaiga, nofoaga o le toafilemu, nofoaga o le upumoni.

Ua tuuina mai e Peresitene Gordon B. Hinckley se folafolaga matagofie a o tatou faitauina le Tusi a Mamona: “Ou te folafola atu ia te outou e aunoa ma le faatuai … o le a oo mai i totonu o outou olaga ma totonu o o outou aiga se fuafaatatau faaopoopo o le Agaga o le Alii, o se folafolaga mausali ina ia savavali i le usiusitai i Ana poloaiga, ma se molimau malosi atu e uiga i le moni o le i ai o le Alo o le Atua.”⁷ Ioe, o folafolaga nei o le filemu tele o loo faapea ona tatou manaomia i o tatou aiga.

O le Tusi a Mamona o se talafaasolopito maoae faaleagaga. O upu a perofeta na tuufaasolo mai i seneturi mai tama i atalii, na puipuia ma faasaosaoina mai faigata ma taua, aumaia faatasi ma otootoina, ona natia lea mo seneturi, ma iu ai i le oo mai i lenei tisipenisione o le atoaga o taimi. O se mea ea e ofo ai le faapea o le Agaga o le Alii, ua alu ae i gagana ma aganuu uma, o loo maua i lona faateleina faapena i totonu o lenei tusi paia?

O le folafolaga o le mafanafana ma le filemu o loo afifi i totonu o mataupu ma fuaiupu taitasi o le Tusi a Mamona. Na pau lava le mea e tatau ona tatou faia o le tago atu i lenei tusi ma le agaga tatalo ma le faatuatua, ma o le a oo atu le filemu o le Faaola i a tatou suesuega.