O Le Lesona a le Aualofa Na Suia Ai Lo Matou Aiga
Na e moomoo ea ia i ai se auala faigofie, faavavega e puipui ai lou aiga mai faatosinaga leaga e faapea ona osofai mai i itu uma?
Sa ou matauina se suiga faifai malie i uiga o le ma atalii o Iakopo i lona tausaga muamua o le aoga maualuga feololo (ua suia igoa). O ia o se alii talavou lelei, ae na iu ina le mafaufau ma tetee i nisi taimi. Na pei lava na o le televise, taaloga vitio, ma le Initoneti sa i lona mafaufau. E finau mai i taimi uma ia i maua e uiga i le faiga o ana meaaoga, tapenaina o lona potu, ma le fesoasoani i feau i le fale. Sa ou vaaia foi lea lava tulaga na tupu i le ma fanau matutua atu a o avea i latou ma tupulaga talavou, ae sa ou manatu, na fai lava si ogaoga atu o le tulaga lenei. Na ou iloaina mai aafiaga faanoanoa ia le liliuese o nisi o fanau mai le Ekalesia a o latou tuputupu ae. Sa ou tatalo faatauanau ina ia ou iloa le ala e puipui ai lo maua atalii aupito laitiiti ma le matou aiga atoa mai faatosinaga leaga o le lalolagi.
O le mea moni, ou te le’i mafaufauina se vavega i lena Aso Sa ia Novema, a o ou saofai i le pito i tua o le vasega a le Aualofa. Na faasilasila mai e Sister Randall, o se fesoasoani i le au peresitene o le Aualofa, o le autu o le lesona o le suesueina o tusitusiga paia, ma na taia au i se lagona o le mamafa o le tausalaina a o ou mafaufau i lo’u lava aiga. “Fai soo lenei lesona o le suesue i tusitusiga paia,” o ou mafaufauga na. “O loo ou faia le mea sili ou te mafaia.”
O lo’u toalua o se toalua ma se tama lelei, o le sa alofa faapelepele i lona aiga i taimi uma, ae sa le ano o ia i suesuega faaleaiga o tusitusiga paia. Sa fai a matou tatalo ma tamaiti, ma sa matou taumafai e fai afiafi faaleaiga e le aunoa. Ae soo se taimi lava ou te fautuaina ai le suesueina o tusitusiga paia, e musu lava e mafaufau i ai. Talu ai ona sa ou manatu e taua tele, o lea matou te faitauina faatasi ai ma lau fanau taitoatasi ia tusitusiga paia i po a o le’i momoe i latou. Ou te le’i iloa pe o le a se isi mea e mafai ona ou faia.
Ae peitai, talu ai nei lava, soo se taimi ou te alu atu ai e faitau ma tusitusiga paia ma Iakopo, e masani lava ona fai mai o ia: “E, se le o le taimi lenei. Ua ou lelava tele [pe pisi po o le a lava; e fia selau ana alofaga]. O le a ou faitau na o au.” Soo se taimi lava ma te le faitau faatasi ai ma ou fesiligia ai i le taeao e sosoo ai, e fai mai lava i taimi uma, ua “galo” ona faitau. Sa ou mafaufau pe o le a le tele ou te faamamafaina ai le taua o le suesueina o tusitusiga paia, ae o loo ia lagonaina atu lona tamā o loo matamata televise i le isi potu.
Ina ua amata le lesona a Sister Randall, sa ou faamoemoeina e faalogo foi i se isi tala e uiga i le fiafia o se “aiga atoatoa” e suesue tusitusiga paia. Nai lo lena, na amata e Sister Randall i le faamatalaina o se tala mai le Feagaiga Tuai: “O loo faamatalaina i le Numera e 21 e uiga i gata feai na osofaia le fanauga a Isaraelu a o latou malaga agai atu i le nuu o le folafolaga. E toatele tagata na utia e gata ma maliliu ai. I le iloaina o le faatamaiaga matautia, na salamo le fanauga a Isaraelu ma talosaga atu ia Mose e tatalo i le Alii e aveese ia gata mai ia i latou ma ia faamaloloina i latou.”
I lo’u mafaufau, sa ou vaai faalemafaufau i lo matou aiga o loo faimalaga i le olaga ae faafuasei ona osofaia i matou e gata feai i ituaiga gata oona o o tatou aso e gata ai o: solitulafono, fualaau faasaina, ponokarafi, ma le ola le mama. Na ou lagonaina le vaivai e pei o le fanauga a Isaraelu.
Na faamatalaina e Sister Randall, na ta’u atu e le Alii ia Mose e fai se gata apamemea (o se faatusa o Keriso) ma tuu i luga o se laau. Ona folafola atu lea e Mose i tagata, soo se tasi lava e utia e se gata na o le pau lava le mea na te faia o le tepa atu i le gata apamemea ona ola ai lea o ia. E ui lava i le faigofie o lenei folafolaga, ae ua ta’u mai e Alema ia i tatou e faapea “ua i ai nisi e toatele ua faapea ona faamaaaina, ua le mafai i latou ona vaai atu, o le mea lea na latou fano ai. O lenei, o le mea na latou le vaai ai, aua, na latou le talitonu e faaolaina ai i latou” (Alema 33:20).
Na ta’u mai e Sister Randall ia i matou e faapea, e ui o o tatou aso ua ese ituaiga gata feai ua i ai, o i tatou foi e mafai ona tatou vaai atu ia Keriso ma faaolaina ai. I o tatou aso, ua ta’u mai e perofeta ia i tatou e faitau a tatou tusitusiga paia i aso uma, suesuega a le tagata lava ia ma faatasi ma o tatou aiga; ia faia tatalo faaletagata lava ia ma tatalo faaleaiga; ia auai i a tatou sauniga lotu; ia totogi sefuluai; ia salamo; ia agavaa e ulu atu i le malumalu; ma ia faia afiafi faaleaiga. O le tatou auala lenei e vaai atu ai ia Keriso ma faamaloloina ai.
I le taimi muamua, o le faigofie o le auala na foliga ai e matuai faigofie lava ona puipui i tatou mai faaosoosoga i aso taitasi o le olaga. Ae ina ua tautala Sister Randall, na ootia lo’u loto, ma na ou lagonaina le fetalai mai o le Alii ia te au e ala mai ia te ia. Na ou iloaina sa na o se tulaga lava o le faatuatua. Pe na ou talitonu ea i upu a perofeta ma aposetolo o aso nei, pe o le a ou faliu ese, e pei ona faliu ese le toatele o le fanauga a Isaraelu mai le gata apamemea?
Sa ou foi i le fale mai le lotu ma le naunautai e fesoasoani i lo’u aiga ia faamalolosia e ala i tatalo faaleaiga ma le suesueina o tusitusiga paia. Sa ou tatalo mo le tele o vaiaso ina ia faamaluluina le loto o lo’u toalua. Sa ou anapogi. Sa ou faia se afiafi faaleaiga faapitoa ma valaaulia ai le ma atalii ua faaipoipo ua le toaga i le lotu, faapea ma lona aiga ina ia matou auai faatasi. Sa matou aoao e uiga ia Mose ma gata feai. Mulimuli ane, i se tasi po, na ou fesili ai i lo’u toalua pe mafai ona matou amataina le tausaga fou i le faitauina faatasi o se aiga ia tusitusiga paia. Ma i le aso o le Tausaga Fou, na amata ai ona ia taitaiina i matou i le suesueina o tusitusiga paia i aso taitasi.
E le’i faapea na vave ona atoatoa lo matou aiga, ae sa ou maofa i le tele o le alualu i luma o le siosiomaga i lo matou aiga. Sa faaitiitia lo matou feupuai ma na i ai se agaga alofa sili atu i totonu o le matou aiga. Ou te le’i itaitagofie pe lotovaivai e pei ona sa masani ai. Sa ou lagonaina le latalata atu i lo’u toalua faapea ma le Alii, lea na faate’ia ai au. Ae peitai, na sili atu ona suia ia uiga o Iakopo. Na amata ona ia faamanatu mai ia i matou uma e tatau ona fai a matou suesuega o tusitusiga paia, ma sa ia faaaogaina ma le lotomalie lona avanoa e faitau ai.
Na ou iloa i se auala e ese mai, le poto o le mulimuli i perofeta ma le faalagolago i a latou folafolaga. E i ai sau molimau i le moni o upu nei a Peresitene James E. Faust, Fesoasoani Lua i le Au Peresitene Sili: “E masani ona alu ai taumafaiga e ese atu a matua o se aiga pisi e fafagu po mai tagata uma ma faatasi mo tatalo faaleaiga ma le suesueina o tusitusiga paia. Atonu foi tou te le lagonaina i taimi uma le fia tatalo pe a outou faatasitasi, ae o le a outou maua ai se taui faasili pe afai tou te taumafai pea.”1