Ua Maua Tusitusiga Paia faaSipaniolo ma le faaPotukale i le Mamanu MP3

Ina ia ogatasi ma le sini o le saunia o tusi ma mea e faaaoga ua faamaonia i tagata o le ekalesia i le lalolagi atoa, ua maua ai nei faila i le leo o tusitusiga paia faaSipaniolo ma le faaPotukale i le mamanu o le MP3 i le Uepi saite a le Ekalesia. E mafai ona maua mai le komepiuta ia nei faila e aunoa ma se totogi.

O nei faila faalogologo o le a tuuina atu ai tusitusiga paia i tagata ua faaaogaina masini faalogologo [MP3] lea ua faatupulaia le toatele, i le lalolagi atoa. O lenei tekinolosi ua faafaigofie ai ona feaveai e i latou e fia faalogologo i le Tusi a Mamona, Mataupu Faavae ma Feagaiga, ma le Penina Tau Tele. Ua maua ai foi e tagata o le ekalesia se isi ituaiga faiga e aoao ai.

A o lei oo ia Setema 2007, sa na o le gagana faaPeretania na maua ai tusitusiga paia e i latou e faaaogaina MP3. Na taua e Rob Jex, o le faatonu faamaopoopo o tusitusiga paia mo le Matagaluega o Mataupu Aoaoina, na filifilia le faaSipaniolo ma le faaPotukale ia aofia ai ona o gagana nei e ese mai le faaPeretania e faaaoga tele e tagata o le ekalesia. Ma le isi, o loo i ai foi leo o nei gagana i isi mamanu, ma o lea na faigofie ai foi le liliuina i le ituaiga o le MP3.

Na ia faamamafa mai, o faila MP3 ua saunia e “faalelei atili ai suesuega anoa o le afioga a le Atua.”

O fuafuaga mo le faateleina o faila faalogologo ina ia maua i le Uepi saite a le Ekalesia, ua aofia ai isi gagana e 28 i nai isi tausaga o le a sosoo ai. Na saunoa Uso Jex o le Tusi a Mamona ua lolomiina i gagana e 106 ae o le tusi fusi tolu i gagana e 49. O loo faaauau pea faaliliuga o isi gagana a o galue le Ekalesia e tuuina atu le afioga a le Atua i le lalolagi.

Ina ia mafai ona maua faila faalogologo, faaaoga le www.lds.org/audio.

Na faamalamalama mai e Elder L. Tom Perry o le Korama a Aposetolo e Toasefululua i le konafesi aoao ia Aperila 2000: “Ua faamanuiaina i tatou i masini faaonaponei ma polokalama fou e faasalalauina ai savali o le talalelei i faiga faasatelite, o a tatou lava fesootaiga patino i komepiuta, televise, leitio, faapea foi tusitusiga i a tatou mekasini ma nusipepa. O nei mea uma ua faaopoopo i a tatou auala o le tufatufaina atu, lea ua faateleina ai lo tatou avanoa e maua ai savali o loo fofogaina mai” (“Ia Outou Gauai Atu i Ana Upu Uma,” Liahona, Iulai 2000, 27; Ensign, Me 2000, 23).