Oo Atu Faavaomalo le Polokalama o Faleteuoloa a Epikopo i le tuanai ai o Tausaga e 75
A o avea ma se alii e 16-tausaga le matua, na aveina atu ai e Glen L. Rudd ni pauna moa o le va o le 800 ma le 900 pauna (360 i le 400 kg) i le Faleteuoloa a Epikopo o le Siteki a Paionia i le taulaga o le Aai o Sate Leki mo lona tama.
Sa matamata o ia a o sii ae le kiliva mamafa i luga o fata la’u uta o le fale ua masani ai. Sa faalogo o ia i mea e fai ai i totonu ae le’i vaai lava i ai. Na ia iloaina tulaga o le tele o aiga o le latou siteki; o le toatele lava o tamā o ana uo sa le faigaluega ona o le Pau Tele o le Tamaoaiga.
Ae o le aso lena, na ia vaaia ai le mea tonu lava na tupu. “Na ou iloaina lava sa matou fesoasoani i tagata matitiva, tagata lima vaivai,” o le toe tomanatu lea a Elder Rudd, o le sa avea muamua ma se sui o le au Fitugafulu o le na faaaluina le 25 tausaga o pulea le Lotoa o le Uelefea—o le taunuuga o lena faleteuoloa muamua lava.
A o talavou o ia, sa ia iloaina le taimi o le maualuga o le Pau o le Tamaoaiga, lea na toetoe lava o le 70 pasene o alii i lana siteki na leai ni galuega, na ofoina atu ai e le Ekalesia le fesoasoani. I le faleteuoloa sa i ai se lotoa o malala ma fafie, o se fale fau meaafale, o se fale e tuuapa ai meaai ma se fale suisui, ma meaai—o le tele lava na foai atu e tagata e pei o lona tama, o e na i ai ni fale fasi moa.
O le aso 19 o Aokuso, 2007, na faailoga ai le 75 tausaga o le tatalaina o lena faleteuoloa, o le faleteuoloa muamua lava a le Ekalesia. O le asō, o loo faagaoioia ai e le Ekalesia le 108 o faleteuoloa i totonu o le Iunaite Setete ma Kanata, ma le isi 29 i Amerika Latina. O loo i ai foi faleteuoloa i Atenitina, Pasila, Sili, Kolumipia, o le Dominican Republic, Ekuatoa, El Salvador, Kuatemala, Honduras, Mekisiko, Parakuei, Peru, Iurukuei, ma Venesuela.
E le gata i lena, ae o loo faagaoioia foi e le Ekalesia i le lalolagi atoa le 285 o Nofoaga Autu o Punaoa mo Galuega, 44 faleoloa Tesareta o oloa ua faaaoga, ma le 100 o nofoaga e teu ai meatotino a aiga. Na foai atu e tagata o le Ekalesia le 623,153 o aso e galulue ai i fale o uelefea i le 2006, ma e 239,410 tagata i le lalolagi atoa ua maua ni aoaoga ma galuega e fesoasoani ai i taumafaiga saili galuega a le Au Paia o Aso e Gata Ai, e tusa ai ma faamatalaga na tuuina mai e le Tautua o le Uelefea.
“Ua faafia afe ona ou pasia lenei nofoaga,” o le saunoaga lea a Elder Rudd, e faatatau i le faleteuoloa muamua lava a le Ekalesia ma lona taua. “Ou te lagona lava le fiafia i lenei nofoaga. O le mea lenei na amata ai.”
Na amataina le faleteuoloa i le amataga o le 1932, i le taimi na fono ai Harold B. Lee (1899–1973) a o avea ma peresitene o le siteki (lea na avea mulimuli ane ma Peresitene lona Sefulutasi o le Ekalesia) ma ona fesoasoani ma epikopo o le Siteki a Paionia. “Na filifili ai ina ua mavae se talanoaga manaia e tatau ona latou faia se mea ma fai vave loa,” o le saunoaga lea a Elder Rudd. “Na tonu ai o le a latou fausia se faleteuoloa ma aoao pe faapefea ona faatumuina.”
Na maua e taitai o le siteki le faaaogaina fua o se fale i le Pierpont Avenue ma na tapena ma saunia e volenitia. Sa anapopogi tagata o le Siteki a Paionia i lena aso o le tatalaga aloaia ma aumai a latou saofaga i le faleteuoloa.
“O se mea manaia lava, aua e oo ane i le taimi na maea ai, na lava lava meaai ma isi aitema na foai atu na tumu ai le faleteuoloa,” na tusia ai e Elder Rudd i se lipoti e uiga i le faleteuoloa. “Ma le isi, na i ai se agaga i le siteki atoa sa le’i i ai muamua—na o le alofa faaleuso lava.”
O le faleteuoloa, lea na tutusa lava le faaaogaina i le amataga ma le ofisa o sefuluai, na faagaoioia i lalo o mataupu faavae tutusa e pei o faleteuoloa o i ai nei a le Au Paia o Aso e Gata Ai. “E tatau ona galulue tagata uma. O le faamoemoega lena o le Ekalesia, ia fesoasoani i tagata ia fesoasoani ia i latou lava,” na faamalamalama mai ai Elder Rudd.
Fai mai Elder Rudd ona o le taugofie o oloa o meaai na i ai i le vaitau o le 1930, o le toatele o faifaatoaga na le mafai ona faafaigaluegaina ni tagata e fesoasoani atu ma o le toatele lava na seleseleina mea na mafai ona latou faia ae tuu uma isi mea e pala. O taitai o le faleteuoloa—na aofia ai le fesoasoani o Peresitene Lee o Paul C. Child ma le pule o le faleteuoloa o Epikopo Jesse M. Drury —na tofia ia Fred J. Heath ma isi alii sa le faigaluega e faafesootai le au faifaatoaga, ma e toatele alii na auina atu i faatoaga i le Wasatch Front ma le mamao e oo atu i Idaho e selesele laau toto lea na faapea ona faasoasoa i le au volenitia.
Na taunuu mai loli i le faleteuoloa ua faatumulia i fualaau aina ma isi fua o faatoaga. O le tele o fualaau aina na tuuapaina, na taua ai e Elder Rudd.
Fai mai o ia, i se tasi taimi na matua tele le aniani (lea na matuai foai mai) ma o meaai na tuuapa na teuina i le fogafale i luga o le faleteuoloa, lea na amata ai ona tau lo’u le taualuga. Na faatutu ni pou e tau taofiofi ai le taualuga mai le solo i lalo. Na faafesuiai aniani mo isi mea na manaomia. Na tuuina atu e le faleteuoloa le fesoasoani. E leai se tasi na faapea na foi fua, o lana tala lea.
E le’i umi ae talosaga mai le Siteki a Sate Leki pe mafai ona latou auai faatasi i le faleteuoloa a le Siteki a Paionia, ma o le fa tausaga mulimuli ane, na siitia atu ai le nofoaga i se fale e telē atu. Na faatutuina isi faleteuoloa i Siteki o Murray ma Liberty. Ma le isi, na faatulaga foi ofisa mo galuega i siteki uma e ono na i ai i lena taimi i le Vanu o Sate Leki.
“[O le faleteuoloa a le Siteki a Paionia] na avea ma mamanu mo isi faleteuoloa uma,” na saunoa ai Elder Rudd, “e aofia ai le faleteuoloa tele na fausia e le Komiti Aoao o le Uelefea i le 1938 ma le 1939, lea na tutu i le nofoaga na faaigoa mai lava i lena taimi o le Lotoa o le Uelefea.”
Sii mai le Church News, 25 Aokuso, 2007.