Faamuamuaina o La’u Faaipoipoga Nai lo Lo’u Faamaualuga
E pei lava o soo se ulugalii, e i ai foi o maua feeseeseaiga ma lo’u toalua i le ma faaipoipoga. Ae e tasi lava se mea na tupu ou te manatuaina lelei lava. Ou te le o toe manatua le mafuaaga o le ma feeseeseaiga, ae na iu ina ma le fetautalatalaai ai, ma ou te manatua na ou mafaufau, na sese lava lo’u toalua. Na ou lagonaina e leai se mea na ou faia e tatau ai ona ou faatoese.
A o faagasolo pea le aso, sa ou faatalitali mo le faamalie mai o lo’u toalua o ia na sese. Ioe, na te iloaina lelei lava lona sese. Masalo na iloa lelei lava lona matuai faatiga i o’u lagona. Na ou lagonaina e tatau ona ou tu mo au lava; na pau le mea taua o le mataupu faavae.
A o latalata ina uma le aso, sa amata ona ou iloaina sa le aoga lava lo’u faatalitali, o lea na ou alu ai i le Alii i le tatalo. Na ou tatalo ina ia iloa e lo’u toalua le mea na ia faia, ma le tulaga ua afaina ai le ma faaipoipoga. Sa ou tatalo ina ia musuia o ia e faatoese mai ina ia mafai ona faatea le ma feeseeseaiga.
A o o’u tatalo, na ou lagonaina se uunaiga malosi e tatau ona ou alu atu i lo’u toalua ma faatoese i ai. Sa fai si ou te’i i lenei uunaiga ma na vave ona ou ta’ua i la’u tatalo ou te lei faia se mea sese, o lea e le tatau ai ona ou faatoese atu. Na oo malosi mai se mafaufauga i lo’u mafaufau: “E te fia sa’o, pe e te fia faaipoipo pea?”
A o ou mafaufau i lenei fesili, sa ou iloa ai e mafai ona ou taofi pea i lo’u faamaualuga ma aua nei ou fiu, seiloga lava e faatoese mai o ia, ae o le a le umi o lena faiga? O ni aso? Sa ou faanoanoa lava i lo ma le fetautalatalaai. Sa ou malamalama e ui o lenei lava mea na tupu o le a le faamutaina ai le ma faaipoipoga, ae afai o le a ou le gauai atu i taimi uma, e ono avea lena ma mafuaaga ogaoga i le aluga o tausaga. O lea na ou filifili ai e sili atu le taua o le maua o se faaipoipoga fiafia ma le alofa, nai lo le taofiofi pea i lo’u faamaualuga i se mea e foliga mai e leai se aoga i se taimi mulimuli mai.
Sa ou alu atu i lo’u toalua ma faatoese i ai ona o lo’u faaitaina o ia. Sa faatoese mai foi o ia, ma e le’i umi ae ma toe maua le fiafia ma toe faatasi i le alofa.
Talu mai lena taimi, e i ai lava tulaga sa manaomia ai lo’u toe fesiligia o lena fesili: “E te manao e te sa’o, pe e te manao e te faaipoipo pea?” Ou te matuai faafetai lava mo lena lesona maoae na ou aoaoina i le taimi muamua na ou feagai ai ma lena fesili. Ua fesoasoani ia te au i taimi uma e toe faatulaga ai ou manatu ma faamuamua lo’u toalua ma la’u faaipoipoga nai lo lo’u lava faamaualuga.