Faatulagaina o Mea e Tatau Ona Faamuamua
Sa ou fanau ma ola ae i Korea i se aiga alolofa, ma na ou auai i le Ekalesia a o ou talavou. Ou te fia faasoaina atu le aafiaga o lo’u liua ia te outou.
Sa ma faigaluega faatasi ma se tamaitiiti na ma vasega faatasi i le faletusi a le aoga i le faatoa uma ai o malologa o le taumalulu, ae fesili mai loa pe ou te fia alu i le lotu faatasi ma ia. Na ou fesili i ai pe o le a le ituaiga lotu na talanoa mai ai, ae fai mai e latalata lava i le matou aoga. Na faapea mai, e ese le manaia, ma na toatele foi teineiti. Na 16 ou tausaga i lena taimi, ma o le faamatalaga lena e uiga i le lotu na manaia ia te au. Na ou filifili ai ou te alu. Na ou alu i le lotu Peresipeteriane mo le lua tausaga a o ou aoga tulagalua, ma na manaia mea na ou manatua e uiga i le lotu.
Sa ma o ma la’u uo i se gaoioiga i le Aso Toonai, ma sa o mai tagata uma e faatalofa ma faafeiloai au. Sa ou lagona le faagaeetia ona o lo latou agalelei ma le faafeiloaiina o se alii laitiiti latou te le’i iloaina. Sa ou alu i le lotu i le aso na sosoo ai, ma sa faafeiloai atu au i faifeautalai.
Na aoaoina au e faifeautalai e uiga i mataupu faavae autu o le talalelei, e uiga ia Iesu Keriso, ma e uiga i le Toefuataiga o le talalelei e ala i le Perofeta o Iosefa Samita. O lesona uma na aoaoina ai au sa talafeagai ma fetaui, ma sa faagaeetia au i le alualu i luma e faavavau ma le ata o le faaolataga. Sa masani ona ou mafaufau pe aisea ua ou i ai iinei i le lalolagi ma po o a foi mea o faatalitali mai mo au pe a mavae le oti. Sa mafanafana le iloa afai ou te faia mea uma e mafai ona ou faia mo au lava, o le a faia e le Faaola isi mea e totoe.
E lua masina mulimuli ane ae ou manao ou te papatiso ma faamauina, ae sa ou manaomia se faatagaga mai ou matua. Sa lotu Puta i laua, ae sa la faatuatuaina au. Na tonu ia te au e sili ai lo’u fesili muamua i lo’u tina, o lea na ou talosagaina ai faifeautalai e o mai i lo’u fale i le ao. Ae ou te le’i alu i le aoga, na ou fai ai i lo’u tina, atonu o le a oo mai ni tagata ese e fesili atu ia te ia e uiga i se mea, ma pau lava lana tala e tatau ona fai o le ioe. Ona ou tamoe lea i fafo o le faitotoa ou te alu i le aoga. Ina ua ou foi mai, na fai mai lo’u tina, e toalua ni ana malo aulelei lava mai Amerika na i ai. Fai mai o ia, e ese le lelei o le la faaKorea, ma sa faagaeetia ai o ia o lea na ia fai atu loa i ai ioe. O lea na ou maua ai le faatagaga mai ou matua ou te auai i le Ekalesia.
O Se Olaga e Faavae i Feagaiga
Pe a tatou papatiso, tatou te osia se feagaiga, ma o le amataga lena o lo tatou olaga i le talalelei. Tatou te osia ma faafouina isi feagaiga i o tatou olaga atoa, e pei o le tagofia o le faamanatuga po o le, mo alii talavou, mauaina o le perisitua. O lo tatou olaga e faavae i feagaiga. O loo faamoemoe mai le Tama Faalelagi ina ia tatou faamaoni i feagaiga tatou te osia, ma a tatou faia faapea, o le a faamaoni o Ia i le feagaiga na Ia osia e faamanuia mai i tatou.
O le savali ou te manao e tuuina atu ia te outou tagata talavou o le, ia faatulaga mea e tatau ona faamuamua, malamalama i feagaiga o loo outou osia, ma ia faamaoni i na feagaiga e tusa lava pe manaomia ai ona outou ositaulaga. Pe a outou faamaoni ma i ai se vaaiga e faavavau, o le a faamanuia outou e le Alii, e le gata i le lumanai ae faapea foi i o outou taimi i luga o le fogaeleele.
Mo se faataitaiga, i aso o ou i ai i le aoga maualuga, na ou filifili ai e le faia au suesuega i Aso Sa. E fai au suesuega seia oo i le vaeluaga o le po o le Aso Toonai ona ou fai lea i lo’u tina e fafagu au i le taeao po o le Aso Gafua. Sa ou tausia le paia o le aso Sapati. O nisi taimi na fai si ou le mautonu aua sa ou iloa sa faaaluina e tamaiti o la’u vasega le aso atoa e suesue ai. I Korea, o le maua o se avanoa i se iunivesite lelei o se sini aupito taua. Ae e tusa lava pe na i ai sa’u suega i le Aso Gafua, ou te le’i suesue lava i le Aso Sa. Talu ai ona e tasi le aso na le atoa ai aso o au suesuega, sa matuai tatau ai lava ona taulai atu lo’u mafaufau i au suesuega. Ou te manatu, sa sili atu ona lelei lo’u faaaogaina o lo’u taimi suesue ona o lenei taulaiga. I le faaiuga, na avea au ma se tasi o tamaitiiti aoga aupito maualuga [togi] i la’u aoga maualuga, ma na maua lo’u avanoa i se tasi o iunivesite e aupito iloga i totonu o Korea.
O le taimi lava tatou te taulai atu ai i le Ekalesia ma mataupu faavae o le talalelei, ona mafai lea ona tatou faatatauina na lava mataupu faavae i soo se mea lava tatou te faia, ma e mafai ona tatou maua le lagolago mai le Alii ma faamanuiaina ai.
O Le Manatu Tasi i le Mamalu o le Atua
O se tasi o mau e sili ona ou fiafia i ai o le MFF 4:5, lea o loo talanoa mai e faatatau i uiga [o se tagata] i tulaga faaletaitai. O loo taua ai “le manatu tasi i le mamalu o le Atua.” Soo se taimi lava ou te faia ai galuega auauna atu a le Ekalesia, o taimi uma ou te fesili ai ia te au lava, O fea o ou taulai i ai? O o’u vaai ea i le mamalu o le Atua ae le o se isi lava mea?
E 28 tausaga sa ou faigaluega ai mo le IBM i Korea. O le taimi foi lena, sa ou auauna atu ai i le tele o tofiga a le Ekalesia, e aofia ai le failautusi faapitoa a le siteki, fautua maualuga a le siteki, peresitene o le siteki, sui risone, ma le Fitugafulu Eria. Sa ou taumafai i taimi uma e faapaleni ia mea e tatau ona faamuamua o le aiga, galuega, valaauga a le Ekalesia, ma taimi mo au lava. Ma sa mafai lava i taimi uma ona ou faia mea na manaomia ona fai.
I le avea ai o se sui risone ma se Fitugafulu Eria, sa tatau ai ona ou asiasi atu i Sate Leki e faalua i le tausaga mo konafesi aoao, ma i le avea ai o se faatonu i le galuega, na ou iloa ai, o le tuua o le ofisa i le sili atu ma se vaiaso sa le o se mea faigofie. Sa ou naunau ou te alu i le malaga, ma o le peresitene o le kamupani sa iloaina lelei au ma faatuatuaina au ina ua ou fai atu o le a mafai lava ona ou faia. Afai tatou te faatulagaina ia mea e tatau ona faamuamua, e mafai ona tatou taulimaina o tatou faafitauli. Ou te le manao e fetuunai o’u talitonuga ina ia alualu i luma [la’u] galuega. O le taimi lava e mautu ai lena manatu, ona filemu lea o lou loto aua ua e faia le mea sa’o. E le faigofie le tausia o a tatou tautinoga po o feagaiga ma e manaomia ai le tele o le ositaulaga, ae a tatou faia, o le a sili atu le tele o faamanuiaga tatou te maua nai lo mea na tatou ositaulagaina.
Auala e Alualu ai i Luma
Vaai faalemafaufau o loo e i le isi itu o se vaitafe, ae o le isi itu o loo i ai lou fiafia e faavavau. E tatau ona i ai ni auala e alualu ai i luma lou olaga ina ia e sopoia ai le isi itu. Mo se faataitaiga, ia filifili e alu i se misiona, ia faaipoipoina i le malumalu, ma ia i ai se aiga. A o e sauniuni mo nei mea taitasi, o le a e i ai i le ala e ausia ai lau sini tupito.
Ina ua faasilasilaina mai le Malumalu o Seoul Korea, sa matou fiafia uma lava. Na matou iloaina a aunoa ma se malumalu, e le mafai ona atoa lo matou olaga faaletalalelei. Na umi se taimi na faamaeaina ai le malumalu, ae o faamanuiaga mai le malumalu na faamausaliina ai faavae o le molimau ma le faatuatua o tagata. A o latou auai atu i le malumalu, e faateleina lo latou tuuto atu i le talalelei, ma ua latou agai atu i a latou sini tupito.
O lea ou te uunaia ai outou tagata talavou ina ia faatulaga ni sini i o outou olaga e alualu ai i luma seia oo i le tini. O le a latou tuuina atu ia te outou le fesoasoani ma le puipuiga. Ou te iloa afai tatou te faamaoni i a tatou feagaiga, o le a sili atu ona aoga o tatou olaga, ma o le a faamanuiaina i tatou.