O Se Mea Ou Te Lei Mafaufauina
I le aoga maualuga sa ma feoai ai ma se alii talavou sa le malilie i ai lo’u aiga. Ona o lo latou tetee, na iu ai lava ina ua ou faatautee i nai ou tei ma ita i ou matua. O le mea na faanoanoa ai, sa ou talitonu latou te le iloa le mea sa lelei mo au; sa na o au lava na iloaina. E faapefea ona latou matuai tetee i la’u uo tama? Ioe, sa i ai ni taimi na ia fai mai ai ni tala le lelei ia te au. Ae sa ou talitonu na ala ona ia faatiga ia te au ona sa alofa ia te au. Sa ou manatu e leai se tasi na popole moni ia te au.
O le i ai i se mafutaga sauaina na suia ai ou lagona ma manatu. Sa ou ita i tagata uma i lea taimi, ma le fiafia ia te au lava i le isi taimi. Sa ou le toe alu i le lotu, aluese mai tagata uma sa alolofa moni ia te au, ma aloese mai soo se mea faaleagaga, aemaise lava o musika lelei. Sa ou lagona le tiga, e ui ina ou le faailoaina atu.
A o ou tauivi ma lo’u olaga ma tagata uma na siomia au, sa talosaga mai lo’u faiaoga vaiolini mo se fesoasoani. Sa avea o ia ma taitai musika a le Peraimeri i lana uarota, sa faapea ona fuafuaina se polokalama o le faamanatuga na usuina ai ni pese e le Peraimeri. Sa fesili mai lo’u faiaoga pe ou te manao e taina ni nai pese. Ou te le’i manao i ai, ae sa ou fai atu ioe. Ina ua ia tuuina mai ia te au le musika, sa ou tilotilo i igoa. O le pese mulimuli o le “O Le Atua Lo’u Tama” (Viiga, nu. 184).
Sa leai so’u fiafia tele aua sa ou iloa le mana o musika. Ae sa amata lava ona ou faataitaia ia pese, a o ou faia mea uma ou te mafai e tetee ai le Agaga—mai le mafaufau i lo’u ita tele i lo’u aiga e oo i le taumafai e tuuese ia pese mai lo’u mafaufau pe a ou le faataitaia.
Ina ua oo i le Aso Sa mo le polokalama, sa le mafai ona ou faatali mo le taimi e uma ai. I le taimi o le polokalama, sa ou taumafai e le amanaia le Agaga, ae ina ua oo mai le taimi mo le pese faaiu, sa fai e lo’u faiaoga vaiolini se mea ou te le’i mafaufauina. Sa faliu atu ma valaaulia le au lotu atoa e pepese.
Sa ou tuuina lau laau ili i luga o uaua o le vaiolini ma ta le nota muamua. Sa taia au e le Agaga i se malosi uiga ese o lea na amata ai ona tafe ifo loimata i o’u alafau a o lei uma le laina lona lua. Sa tau mai e le Agaga ia te au ou te faalogo i upu ma manatua o au o se afafine o le Atua, o le a taua pea au ia te Ia, ma ou te le’i manaomia se uo tama faasaua. Sa ou manaomia o Ia.
O na leo uma—laiti ma matutua—na peseina upu faigofie o le viiga sa fesoasoani ou te faalogo ma malamalama ai i Ana fetalaiga, o upu a lo’u aiga, ma upu a taitai o le Ekalesia. O lo’u vaivaiga o musika. Sa silafia e le Tama Faalelagi o musika o le auala lea i lo’u loto. O au le tagata sa manaomia ona sui, ae le o lo’u aiga.
E silafia ma malamalama le Alii i le mana o musika (tagai MFF 25:12). Na te siitia i tatou ma tatala o tatou loto ma mafaufau i le Agaga. O le a ou faafetai pea mo musika ma le agaga o loo ia aumaia pea i lo’u olaga i le aso.