Taimi o Fetufaaiga

O Lo’u Olaga O Se Meaalofa; O Lo’u Olaga Ua I Ai Se Fuafuaga

SAUNIA E LINDA CHRISTENSEN

“O tagata soifua uma—tane ma le fafine—ua foafoaina i le faatusa o le Atua. O i latou taitoatasi o se atalii po o se afafine faaleagaga faapelepele a ni matua faalelagi, ma, o lea ua tofu ai i latou taitoatasi ma se natura ma se taunuuga paia” (“O Le Aiga: O Se Folafolaga i le Lalolagi”).

O lo’u olaga o se meaalofa; o lo’u olaga e i ai se fuafuaga. O lo’u olaga e i ai se faamoemoega; na amata mai i le lagi.

Na ou filifili ou te sau i lenei aiga matagofie i le lalolagi

Ma saili mo le malamalama o le Atua, e taitai a’u i lo’u fanau mai.

(“O Le a Ou Mulimuli i le Fuafuaga a le Atua,” Tusipese a Tamaiti, 86–87)

Ua aoao mai nei upu e faapea, sa e nofo faatasi ma le Tama Faalelagi ae e te le’i sau i le lalolagi. O oe o Lona atalii/afafine. Sa fetalai atu le Tama Faalelagi i Lona Alo o Iesu Keriso e foafoa le lalolagi. O le lalolagi sa saunia ina ia mafai ona e sau i ai ma maua ai se tino. Na tuuina atu foi ia te oe se saolotoga, ma sa e filifili e te sau i le lalolagi ma aoao ia e mulimuli i le fuafuaga a le Tama Faalelagi.

E mafai ona e aoao i le fuafuaga a le Tama Faalelagi i totonu o tusitusiga paia. Ua aoao mai Iakopo, o se perofeta o le Tusi a Mamona, sa filifilia Iesu Keriso e avea ma o tatou Faaola. E afio mai o Ia i le lalolagi e nofo ai, tauave i Ona luga agasala a le lalolagi, ma saunia se ala mo le fanau uma a le Tama Faalelagi e toe foi atu ai ia te Ia. Ona o Iesu, ua mafai ai ona e salamo ma faamagaloina au agasala. Fai mai Iakopo, “E ua sili naua le ala o lo tatou Atua!” (2 Nifae 9:13).

E alofa le Tama Faalelagi ia te oe. Ua Ia tuuina mai ia te oe Lana afioga—o tusitusiga paia—ina ia mafai ai ona e aoao e uiga i Lana fuafuaga. Afai e te mulimuli i Lana fuafuaga, o le a e fiafia i le lalolagi ma e toe foi atu e nonofo faatasi ma Ia i se aso.

Gaoioiga

Ia aveese le itulau U4, ma faapipii i se pepa malo. Oti ese siepi taitasi mai laina uliuli soloatoa, ma faapipii se fasi ie mamoe po o se ie e pipii i le laupapa ie mamoe i le pito i tua. Faaaoga le faataitaiga o le laupapa ie mamoe ua uma ona faatulagaina e fesoasoani i lou faatulagaina o siepi i o latou tulaga sa’o. Aoao e uiga i le ata o le faaolataga, ma ia faasoa atu mea ua e aoaoina i lou aiga. Mafaufau e fai le gaoioiga lenei mo se lesona o le afiafi faaleaiga.

Manatu mo Taimi o Fetufaaiga

Ia faaali atu se ata o le Au Peresitene Sili ma le Korama a Aposetolo e Toasefululua ma se kopi “O Le Aiga: O Se Folafolaga i le Lalolagi” (Liahona, Iuni 1996, 10). Ia talanoa i le taua o le folafolaga, ma fesoasoani i tamaiti e tauloto le fuaiupu muamua o le parakalafa lona lua. Ia faamalamalama atu o le uiga o le “foafoaina i le faatusa o le Atua” ua i ai o tatou tino faaletino ma e mafai ona avea i tatou e pei o le Tama Faalelagi. Ia talanoaina ia faamanuiaga o le mauaina o se tino. Tagai i O Ou Tulaga Faatalalelei: “O le a ou tausia lo’u mafaufau ma le tino ia paia ma mama, ma o le a ou le tagofia lava mea e faaleagaina ai a’u.” Ia talanoa e uiga i ala e faaali ai le faaaloalo mo o tatou tino.
Ia fai atu, “E i ai so’u taunuuga paia,” ma fesili atu i tamaiti pe o le a le uiga o lena faaupuga. Ia talanoaina le uiga o le upu paia (tuusao mai le Atua) ma le taunuuga (o se fuafuaga ua uma ona fuafuaina). Faitau faatasi le Aperaamo 3:23. Vase le fasifuaitau “na filifilia lava oe ae e te lei fanau mai.” Ia faasoa atu ni mea na tutupu mai le olaga o Aperaamo. Ia faamamafa atu sa silafia ma sa alofa le Tama Faalelagi ia Aperaamo i le muai olaga. Ona o lona usiusitai, na maua ai e Aperaamo le tele o faamanuiaga mai le Tama Faalelagi. Ia faasoa atu ni faataitaiga o nisi tagata o e na filifilia ae latou te lei fananau mai e faataunuu se misiona taua: Iosefa Samita (tagai 2 Nifae 3:14–15), Gordon B. Hinckley (tagai “Ia Outou Saili le Malo o le Atua,” Liahona, Me 2006, 82), ma Iesu Keriso (tagai Mose 4:1–2). Ia faamanatu atu i tamaiti, o loo i ai i le Tama Faalelagi se misiona taua mo i latou e faataunuu a o latou i ai i le lalolagi. Fesili atu, “O a ni ituaiga o mea tou te manatu e finagalo le Tama Faalelagi e te faia?” Molimau atu ua tofu tagata taitoatasi ma se taunuuga paia, ma o le filifilia o le mea tonu o le a fesoasoani e faataunuu ai.