Tohi ki he ʻĒtitá
Ofi ange ki he ʻOtuá
Neongo ʻa e ʻikai ke u ʻalu ki he lotú, naʻá ku kei fie maʻu pē ke fakatau haʻaku Liahona. ʻI ha ʻaho ʻe taha ne u lava ai ʻo hū ki ha Uepisaiti ʻo kole ke fakatau mei ai, pea lī mai leva ʻe ha fefine haʻaku tatau. Naʻá ku mātuʻaki fiefia ʻi he taimi naʻe maʻu ai ʻeku makasini ki he kāingalotu foʻoú (ʻOkatopa 2006). Naʻe ongo moʻoni kiate au peá ne toe fakamoʻoniʻi mai hono moʻoni ʻo e ongoongolelei ko ʻení. ʻOku ou ongoʻi ofi ange ʻi he Liahoná ki he ʻOtuá.
Māsio Honilio Pelesi, Palāsila
Fafangaʻi ʻo ʻEtau Tuí
ʻOku ou fiefia lahi ʻi he taimi ʻoku ou lau ai ʻa e Liahoná. ʻOku ou fakaʻaongaʻi ʻa e makasiní ki he lēsoni ʻa e Fineʻofá pea mo e ngaahi efiafi fakafāmili ʻi ʻapí. Naʻá ku vahevahe ʻa e Liahoná mo hoku kaumeʻa ʻoku ʻikai ke tau siasi. ʻOku ou manako moʻoni ke lau ia koeʻuhí he ʻoku mahino lahi ange ai kiate au ʻa e Siasí pea mo e meʻa ʻoku hoko ʻi he lotoʻi Siasí. Fakamālō lahi atu ʻi hono teuteu ʻo ha ngaahi tefito lelei mo e ngaahi lēsoni leleí koeʻuhí ke tau lava ʻo fafangaʻi ʻetau tuí ʻi he ongoongolelei moʻoni ʻa ʻetau Tamai ʻi he Langí.
Māsoama Pēnati, USA
Ko ha Fakahinohino Fakaʻaho
ʻOku hangē ʻa e Liahoná ha takaua maʻu peé. ʻOku ou lau ia he ʻaho kotoa pē—ʻi he ʻōfisí he taimi mālōloó, ʻi ʻapi pea mo e faingamālie kotoa pē ʻoku maʻu. ʻOku tokoni ʻa e faleʻi ʻa e Kau Taki Māʻolungá pea mo e ngaahi talanoa moʻoni kehekehe ʻo e moʻuí ke fakatonutonu ai ʻeku moʻuí. ʻOku hounga kiate au ʻa e ngaahi talanoá kotoa. Kuo fakatupulaki ʻe he Liahoná ʻeku fakamoʻoni kia Sīsū Kalaisí. ʻOku hoko ia ko ha fakahinohino fakaʻaho.
Uilifeleti Kēneti F. Ukekolo, Naisīlia
Mālōlō ʻi he hili ha ʻAho Ngāue Lahi
Naʻá ku ʻalu ki hoku lokí kuó u fuʻu ongosia mo fie maʻu ha mālōlō ʻi he tuku ʻa e akó. Naʻá ku lau ʻa e Liahoná. ʻOku ou manako ʻi hono laú. Ko e ngaahi pōpoakí kotoa naʻe ueʻi fakalaumālie moʻoni pea ʻoku nau fakamanatu mai ʻa e ngaahi meʻa kotoa naʻe akoʻi ʻe Sīsū Kalaisí. ʻOku ʻilo ʻe hoku lotó kotoa ʻoku moʻoni ʻa e ngaahi meʻá ni.
Suti ʻAna Taiamata Polikoa, ʻOtu Filipainí
Ko e Mālohi ʻo e Fakaleleí
Naʻe paaki ʻe he Liahoná ha fakamatala ʻi he Fakalelei ʻa Kalaisí pea mo hono mahuʻinga ki he moʻui ʻa e kakaí, pea naʻá ku fakatokangaʻi ai ko ʻeku ngaahi angahalá naʻe hoko ia ʻi he kuo hilí pea te u lava ke hoko atu ʻo toe kamata foʻou. Kuó u hoko ʻeni ko e palesiteni ʻo e Kau Finemuí pea ʻoku ou fiefia ʻi he ngāue mo e kau finemuí. ʻOku ou fiefia lahi pea ʻoku ou fakatauange te u lava ʻo tokoni ki he kakai ʻoku teʻeki ai ke papitaisó ke nau ʻiloʻi ko e Siasi moʻoní ʻeni.
Viata Mātinesi, Lepāpulika Tominikení
Fakavaʻe ki he Ngāue Fakafaifekaú
ʻOku hoko ʻa e Liahoná ko ha fakavaʻe taʻe toe lava ke mole ki he ngāue fakafaifekaú. Kuó u ʻosi tokoniʻi ha kau fie-fanongo tokolahi ʻo fakaʻaongaʻi ʻa e ngaahi fakamatala mei he Liahoná, ʻo tautautefito ki hono teuteuʻi kinautolu ki he papitaisó mo e hilifakinimá.
Petela Longelisi, Siamane