Ko e Tohí ʻi ha Ngaahi Lea Fakafonua Kehekehe
Naʻe kamata ʻa e manako ʻa Kelela Kulusi Kano ʻo Pueto Likó he Tohi ʻa Molomoná ʻi hono taʻu faá nai. Naʻá ne fakatokangaʻi naʻe ʻi ai ha faingamālie ʻo hono tuongaʻane lahí ke kau ʻi he laukongá ʻi heʻenau ako he pō kotoa pē ʻa e folofolá pea naʻá ne loto ke maʻu mo hano faingamālie. Naʻá ne kole heni ki heʻene ongomātuʻá ke na tokoni ange, pea naʻe ʻikai fuoloa kuo kau atu ʻiate kinautolu naʻa nau laukongá.
ʻI he taʻu 12 ʻo Kelelá naʻá ne fehangahangai ai mo ha tukupā foʻou. Naʻe ʻikai ke toe laukonga ʻi heʻene lea fakafonua faka-Sipeiní, ka naʻá ne lau ʻa e Tohi ʻa Molomoná ʻi he lea faka-Pilitāniá. ʻI hono taʻu 14, naʻá ne lau ai ia ʻi he lea faka-Falaniseé; ʻi hono taʻu 15, naʻá ne lau ia ʻi he lea faka-Potukalí; pea ʻi hono taʻu 16, naʻá ne lau ia ʻi he lea faka-ʻĪtalí.
ʻI he kole ko ia ʻa Palesiteni Kōtoni B. Hingikelī ʻi ʻAokosi 2005 ke toe lau ʻe he Kāingalotú ʻa e Tohi ʻa Molomoná, ne ʻosi lolotonga lau ia ʻe Kelela ʻi he lea faka-Siamané.
Naʻá ne pehē, “ʻOku faingataʻa ange ʻeni, ka kuo pau pē ke u lavaʻi.”
Kuo hanga ʻe heʻene lau ia ʻi he ngaahi lea fakafonua kehekehé ʻo fakalahi ʻa e ngaahi foʻi lea foʻou ʻokú ne ʻiló. Naʻá ne fakamatala ʻo pehē, “Ko ʻeku aʻu pē ki ha foʻi lea ʻoku ʻikai ke u ʻilo, ʻoku ou kumi leva ia. Faifai peá u fiu ʻi hono kumí peá u ako maʻuloto leva ia.” Kuo tokoni foki mo ʻene ako ʻa e ngaahi lea fakafonua kehekehé ʻi heʻene ngāue fakaakó. ʻI he taʻu kuo ʻosí, ko e taʻu 17 ia ʻo Kelelá, ne hoko ai ko e taha ʻosi māʻolunga taha mei he ako ʻa e puleʻangá ʻi hono motú.
Kuo maʻu ʻe Kelela ha ngaahi makakoloa ʻi heʻene ako ʻi he ngaahi lea kehekehé. Naʻe aʻu ʻo ne ʻilo ko hono hingoa lotó, ʻa e Letisiá, ʻoku ʻuhinga ia ko e “fiefia” ʻi hono liliu faka-ʻĪtalí (vakai, 2 Nīfai 1:21; 8:3).
ʻOku ʻi ai ha ngaahi Tohi ʻa Molomona ʻa Kelela ʻi ha ngaahi lea fakafonua kehekehe, ʻo hangē ko ha niʻihi kehe. Ka, ʻokú ne pehē, “Ne u fakapapau he ʻikai ke ʻi ai haʻaku Tohi ʻa Molomona te u taʻe lava ʻo lau.”
ʻOku mahino ai ko ʻene ngāue hoko maí kuo ʻosi ʻi heʻene funga laupapa tukuʻanga tohí ʻaʻana. Naʻe fakatokangaʻi ʻe heʻene pīsopé, ʻe Hekitā ʻAlavalesi, ʻa ʻene fulifulihi ha Tohi ʻa Molomona ʻi hono ʻapí peá ne foaki ange ia maʻana. Kuó ne maʻu ʻeni ha faingamālie naʻá ne fili pē, ke ʻikai ngata pē ʻi heʻene ako ha lea fakafonua ʻe tahá kae kau ai mo ha ngaahi mataʻitohi fakaʻalifapeti foʻou. Ko e tohi ko ʻení ʻoku faka-Lūsia.