Hā e Vave mo e Mahinongofua e Tokoni ‘a e Siasí ki he Ngaahi Me‘a ‘Oku Hoko Fakatu‘upakeé

Ne hā ʻi ha mofuike ne hoko ʻi Pelū mo ha afā ne tō ʻi Mekisikou ʻi loto ʻi ha ngaahi ʻaho siʻi ʻa e vave mo e faingofua hono fulifulihi ʻe he Siasí ʻene founga tokoni ki he ngaahi meʻa fakatuʻupakē ʻoku hokó.

Naʻe pehē ʻe Tenisi Lifesi, ko e talēkita ngāue ʻa e Potungāue Tokoni Fakauelofeá ʻi he hetikuota ʻo e Siasí ʻi Sōleki Sití, “Kuo hā mei he ongo fakatamaki ko ʻení ʻa hono maʻu ʻe he kau taki fakalotofonua ʻo e Siasí ʻa e ngaahi maʻuʻanga tokoni pea mo ʻenau malava ko ia ke fai leva ha tokoni ki he ngaahi fiemaʻu fakavavevavé ʻaki hano fakatau mai mo tauhi e ngaahi meʻa ʻe fie maʻu ʻi ha hoko mai ha ngaahi fakatuʻupakē fakalotofonua.”

Hili e hoko ʻa e fuʻu mofuike naʻe 8.0 hono mālohí ʻi Pelū ʻi ʻAokosi ʻo e 2007—ko e mālohi taha ʻeni ke tō ki he fonuá ʻi he taʻu ʻe 35 kuo hilí—naʻe kamata leva hono fakafuofuaʻi ʻe he kau taki fakalotofonua ʻo e Siasí ʻa e ngaahi fiemaʻu vivili taha ʻa e kakai Pelū kotoa ʻi he kolo tuʻu matātahi ko Pisikoú, ʻo ʻikai ko e kāingalotu pē ʻo e Siasí.

Lolotonga e puna atu ki Pelū ʻa ha vakapuna uta koloa 747 naʻe fakaheka ai ha ngaahi nāunau fakafaitoʻo mahuʻinga, ngaahi nāunau faitafa, ngaahi puha meʻakai maʻá e ngaahi fāmilí, ngaahi nāunau haisini mo ha ngaahi tapoleni mei Sōleki Sití, naʻe tokangaʻi ʻe ʻEletā Uolotā F. Konisālesi ʻo e Kau Palesitenisī ‘o e Kau Fitungofulú, ko e Palesiteni ʻo e ʻĒlia ʻAmelika Tonga Hihifó, ʻa hono fakatau fakalotofonua pē ʻo ha meʻakai pea fakaava mo ha ngaahi fale lotu ʻe fā ke nofo ai e kakaí.

Hili ha ʻaho ʻe ua mei he mofuiké, naʻe fakafofongaʻi ʻe ʻEletā Konisālesi ʻa e Siasí ʻi ha kātoanga ʻa ia ne foaki atu ai ha ʻū sipi kafu ʻe 8,000 ki he hoa ʻo e Palesiteni ʻo Peluú, Pelaia Noalesi ti Kāsia, ke tufaki ki he kakai ʻo Pelū ne uesia ʻe he mofuiké.

Taimi nounou pē mei he tō ʻa e mofuiké, ne toe hanga mai mo ha fakatamaki ʻe taha ki Mekisikou. Naʻe ʻamanaki ʻe aʻu mai ʻa e Matangi ko Tīní ki Kenikani, ko ia ne kamata ngāue ʻa e kau taki fakalotofonua ʻo e Siasí ki hono tānaki ʻo ha meʻakai, vai mo ha ngaahi nāunau ʻi ha fale ofi pē ki he feituʻu naʻe fakafuofua ʻe tō ai ʻa e matangí. ʻI he mafuli ʻa e matangí ʻo hanga ki he Muitolotolo ʻo Iukataní, ne fetukutuku leva ʻe he kau taki ʻo e Siasí ʻa e ngaahi nāunau tokoní ki ha fale ʻe taha ʻi Sietumala. ʻI he kamata ke kolosi e matangí ʻi loto fonuá, ne fakafonu ʻaki e nāunau tokoni ha toe fale, ko hono tolú ʻaki ia.

Naʻe fakamatala ʻa Liki Fositā ko e talēkita ʻo e tafaʻaki tokoni pule maʻá e Potungāue ʻo e Tokoni Fakauelofeá ʻi he hetikuota ʻo e Siasí ʻo pehē, ko e ʻaonga lahi moʻoni ʻa e tekinolosiá ʻi he teuteu ki he ngaahi meʻa ʻe hoko fakatuʻupakeé. ʻOku lava lelei ange he taimí ni, ʻo tala ʻa e ngaahi fakatamaki ʻe hoko maí—pea taimi ʻe niʻihi ʻoku ʻiloʻi mo e feituʻu pau ko ia e hoko ai e fakatamakí.

Naʻe pehē ʻe Misa Fositā, “ʻI hono maʻu ʻo e fakamatala ko ʻení, ʻe lava leva ʻe he kau taki ʻo e Siasí mo kinautolu ʻoku ngāue totongí mo e kau ngāue tokoni ʻo kamata hono fakatau mai ʻo e ngaahi nāunaú mo toe fakanofonofo e kakaí ki ha nggaahi feituʻu malu kehe.”