Ko e Lēsoni Fineʻofa Naʻá Ne Liliu Homau Fāmilí
Kuó ke fakaʻamu nai ʻi ha taimi ʻoku ʻi ai ha founga fakaofo mo faingofua ke maluʻiʻaki ho fāmilí mei he ngaahi mālohi ʻo e koví ʻokú ne ʻohofi ia mei he tafaʻaki kotoa peé?
Naʻá ku fakatokangaʻi ha liliu māmālie ʻi he fakakaukau ʻema tamasiʻi ko Sēkopé ʻi hono ʻuluaki taʻu ʻi he ako lotolotó (ne liliu ʻa e ngaahi hingoá). Ko ha talavou lelei, ka naʻe fakaʻau ke anga taʻefakaʻapaʻapa mo fakafetau he taimi ʻe niʻihi. Naʻe hangē naʻe ʻāvea ʻi he televīsoné, vaʻinga he vitioó pea mo e ʻInitanetí. Naʻe taungutu maʻu pē kiate kimaua fekauʻaki mo hono fai ʻo ʻene ngāue fakaako mei ʻapí, ʻi hono tauhi ke maʻa hono lokí pea mo tokoni takai ʻi homau falé. Naʻá ku fakatokangaʻi ne hoko ʻa e ngaahi meʻa tatau pē mo ʻema fānau lalahí ʻi heʻenau aʻu ki he taʻu hongofulu tupú, ka naʻá ku ongoʻi naʻe kovi ange ʻeni. Naʻá ku ʻilo mei ha ngaahi meʻa fakamamahi ne u foua ʻi ha mavahe ʻa ha fānau ʻe niʻihi mei he Siasí ʻi heʻenau lalahi haké. Naʻá ku lotu lahi pē ke u ʻilo ha founga ke maluʻi ai hoku kiʻi foha siʻisiʻi tahá pea mo homau fāmilí mei he ngaahi mālohi ʻo e koví ʻoku ʻi māmaní.
Naʻe ʻikai ke u teitei ʻamanaki ʻe hoko ʻa e mana ko ʻení ʻi he Sāpate ko ʻení ʻi Nōvema, ʻi heʻeku tangutu ʻi mui ʻi he kalasi ʻa e Fineʻofá. Ne fakahā ʻe Sisitā Lenitolo, ko ha tokoni ʻi he kau palesitenisī ʻo e Fineʻofá, ko e tefito ʻo e lēsoní ko e ako folofolá pea naʻá ku ongoʻi foʻi mo halaia moʻoni ʻi heʻeku fakakaukau ki hoku fāmilí. Naʻá ku fakakaukau, “Ko e toe lēsoni ai pē ʻeni ʻi he ako folofolá. ʻOku ou fai pē ʻa e lelei taha ʻoku ou lavá.”
Ko hoku husepānití ko ha husepāniti mo ha tamai lelei ʻoku ʻofa maʻu pē ʻi hono fāmilí, ka naʻe ʻikai ke teitei hohaʻa ia ki he ako fakafāmili ʻo e folofolá. Naʻa mau lotu mo e fānaú, pea naʻa mau feinga ke fai maʻu pē ʻemau efiafi fakafāmili ʻi ʻapí. Ka ko e taimi kotoa pē ʻoku ou fokotuʻu ange ai ke mau ako fakafāmili e folofolá, naʻe ʻikai ke ne teitei tali. Koeʻuhí ko ʻeku ongoʻi ʻoku mātuʻaki mahuʻingá, naʻá ku lau ai ʻa e folofolá mo e fānaú taki taha he taimi poʻulí ki muʻa pea toki tuku ke nau mohé. Naʻe ʻikai ke u ʻiloʻi pe ko e hā ʻe toe faí.
Neongo ia, ki muí ni maí, ko e taimi pē naʻá ku lau folofola ai mo Sēkope, ʻokú ne faʻa pehē maʻu mai pē: “Siʻi, ʻoua ʻe ʻai he taimi ní. ʻOku ou fuʻu helaʻia au [pe femoʻuekina pe ha meʻa pē; ne taʻe faʻalaua ʻene kumi ʻuhingá]. Te u lau tokotaha pē ā ʻe au.” Ko e taimi naʻe ʻikai ke mau lau folofola fakataha ai peá u ʻeke ange ʻi he pongipongi hono hokó, naʻá ne pehē maʻu pē naʻe ʻi ai ha meʻa ʻo “ngalo” ai ke ne fai ʻeni. Naʻá ku fifili pe ko e hā hano lahi ʻeku teke ʻa e ako folofolá kae lolotonga ia ʻoku fanongo pē ia ki he mata televīsone ʻa ʻene tamaí ʻi he loki hoko maí.
Ko e taimi ne kamata ai ʻe Sisitā Lenitolo ʻene lēsoní, naʻá ku ʻamanaki te u fanongo ki ha toe talanoa ki he anga ʻo e fiefia ʻa ha “fāmili haohaoa” he ako folofolá. Ka, naʻe kamataʻaki ʻe Sisitā Lenitolo ha talanoa mei he Fuakava Motuʻá: “ʻOku fakamatala ʻa e Nōmipa vahe 21 fekauʻaki mo ha ngaahi ngata vela naʻa nau ʻohofi ʻa e kakai ʻIsilelí ʻi heʻenau fononga ki he fonua ʻo e talaʻofá. Naʻe uʻu ha kakai tokolahi ʻe he fanga ngatá pea nau mate. ʻI heʻenau mamata ki he fakaʻauha fakalilifú ni, ne fakatomala leva ʻa e kakai ʻIsilelí mo kole kia Mōsese ke lotu ki he ʻEikí ke ne toʻo atu ʻa e fanga ngatá pea mo fakamoʻui kinautolu.”
Ko e anga ʻo ʻeku fakakaukaú, ʻoku ou sioloto ki he fononga ʻo homau fāmilí ʻi he moʻuí pea fakafokifā pē kuo ʻohofi ʻe ha fanga ngata huhu kona ʻi he tuʻunga ʻo e ngaahi kona ʻoku mau maʻú: ʻa e faihiá, faitoʻo konatapú, ponokalafí mo e angaʻulí. Ne u ongoʻi e meʻa tatau ne ongoʻi ʻe he kakai ʻIsilelí, ʻa e ʻikai ha meʻa ʻe lava ke u faí.
Naʻe fakamatalaʻi ʻe Sisitā Lenitolo hono fakahā ʻe he ʻEikí kia Mōsese ke ne faʻu ha ngata palasa (fakataipe ʻo Kalaisi) ʻo hili ia ʻi ha vaʻa ʻakau. Pea talaʻofa ʻe Mōsese ki he kakaí ka ʻi ai ha taha ʻe uʻu ʻe ha ngata ko e meʻa pē naʻe fie maʻú ke sio ki he ngata palasá pea ʻe moʻui. Neongo hono faingofua ʻo e talaʻofá ni, ʻoku tala mai ʻe ʻAlamā “naʻe ʻi ai ʻa e tokolahi ʻa ia naʻe lahi pehē fau ʻa e fefeka ʻo honau lotó naʻe ʻikai … ke nau fie sio ki ai, ko ia naʻa nau mate. Ko ʻeni, ko e ʻuhinga ʻo ʻenau taʻe fie sio ki aí, ko e ʻikai te nau tui ʻe fakamoʻui ai kinautolú” (ʻAlamā 33:20).
Ne tala mai ʻe Sisitā Lenitolo neongo ʻoku fōtunga kehe ʻa e fanga ngata huhu koná he ʻahó ni, ka te tau lava mo kitautolu ʻo sio kia Kalaisi pea tau moʻui. Kuo ʻosi talamai ʻe he kau palōfita ʻi hotau kuongá ni ke tau lau fakaʻaho ʻa ʻetau folofolá, ʻo fakafoʻituitui mo fakafāmili fakatouʻosi; ke tau lotu fakafoʻituitui pea mo fakafāmili; ke tau ō ki heʻetau ngaahi houalotú; ke tau totongi vahehongofulu; ke tau fakatomala; ke tau moʻui taau ke ō ki he temipalé; pea mo fakahoko ʻa e efiafi fakafāmili ʻi ʻapí. Ko e founga ʻeni ke tau hanga ai kia Kalaisi pea tau moʻuí.
ʻI he kamataʻangá ʻoku ngali fuʻu faingofua fau hono angá ke ne maluʻi kitautolu mei he ngaahi fakatauele fakaʻaho ʻo e moʻuí. Ka ʻi he lea ʻa Sisitā Lenitoló, naʻe ongo ki hoku lotó, peá u ongoʻi ʻoku folofola mai ʻa e ʻEikí kiate au ʻo fakafou mai ʻiate ia. Naʻá ku fakatokangaʻi ko e meʻa pē ʻoku fie maʻú ko e tui. Naʻá ku tui nai ki he ngaahi lea ʻa e kau palōfita mo e kau ʻaposetolo ʻo e ʻaho ní, pe te u sītuʻa, ʻo hangē ko e sītuʻa ʻa ha kakai ʻIsileli tokolahi mei he ngata palasá?
Naʻá ku foki ki ʻapi mei he lotú mo fakapapau te u tokoni ke fakamālohia hoku fāmilí ʻaki ʻa e lotú mo e ako folofola fakafāmilí. Naʻá ku lotu ʻo laulau uike ke fakamolū ʻa e loto ʻo hoku husepānití. Naʻá ku ʻaukai. Naʻá ku fakahoko ha efiafi fakafāmili ʻi ʻapi makehe pea fakaafeʻi ʻema tamasiʻi naʻe māmālohi pē he Siasí mo hono fāmilí ke nau kau mai. Naʻa mau ako ai kau kia Mōsese mo e fanga ngata huhu koná. Faifai, peá u kole ange ʻi ha pō ʻe taha ki hoku husepānití pe ʻe lava ke mau kamata ʻa e taʻu foʻoú ʻaki hono ako fakafāmili ʻo e folofolá. Pea ʻi he ʻAho ʻUluaki ʻo e Taʻú, naʻá ne kamata leva ke tataki kimautolu ʻi hano ako fakaʻaho ʻo e folofolá.
Naʻe ʻikai ke vave ʻa e haohaoa homau fāmilí, ka naʻá ku ʻohovale ʻi he lahi ʻo e fakalakalaka ʻa e faʻahinga ongo ʻi homau ʻapí. Naʻe siʻi ange haʻamau toe fekainaki kae ʻi ai ha ongoʻi fiefia ange ʻi he ʻapí. Naʻe ʻikai ke u toe fakapoʻuli pe toe faʻa lahi ʻeku loto foʻí. Naʻá ku ongoʻi ofi ki hoku husepānití pea mo e ʻEikí pea ko ha meʻa ia naʻá ku ofo ai. Neongo ia, ko e loto ʻo Sēkopé naʻe liliu lahi tahá. Naʻá ne kamata ke fakamanatu kiate kimautolu kātoa kuo pau ke mau fakahoko ʻa e ako folofola fakafāmilí, pea naʻá ne fakahoko fiefia ʻeni ʻi heʻene aʻu ki he taimi ke laukonga aí.
Naʻá ku toe fakatokangaʻi foʻou heni hono fakapotopoto ke muimui ʻi he kau palōfitá mo falala ki heʻenau ngaahi talaʻofá. ʻOku ou maʻu ha fakamoʻoni ki hono moʻoni ʻo e lea ko ʻeni ʻa Palesiteni Sēmisi ʻE. Fausí, na‘e Tokoni Ua ʻi he Kau Palesitenisī ʻUluakí: [“ʻOku faʻa meimei ke toki lavaʻi ʻaki pē ha ivi fakaetangata kāfakafa fau hono fafangu ʻe he mātuʻa ʻa ha fāmili femoʻuekina ʻa e taha kotoa ke nau ʻā pea fakatahaʻi kinautolu ke nau lotu mo ako folofola fakafāmili. Mahalo he ʻikai ke mou ongoʻi fie lotu maʻu pē ʻi he faifai pea mou maau maí, ka ʻe ʻaonga lahi ʻi he kahaʻú ʻo kapau te mou vilitaki pē.]”1