Ma‘u ‘i he MP3 ‘a e Folofolá ‘i he Lea Faka-Sipeiní mo e Faka-Potukalí

Fakatatau mo e taumuʻa ko ia ke maʻu ʻe he kāingalotú ʻi māmani kātoa ʻa e ngaahi nāunau kuo fakangofua mai ke ngāueʻakí, ʻoku lava ai ke maʻu ʻi he Uepisaiti ʻa e Siasí ʻa e ngaahi faile ʻo e folofolá ʻi he lea faka-Sipeiní mo e faka-Potukalí ke hiki ki he MP3. ʻOku hiki taʻetotongi pē ʻeni mei he Uepisaití.

ʻE ʻoatu ʻe he ngaahi lea ko ʻeni kuo hikí ʻa e folofolá ki he kakai tokolahi ange ʻi māmani kātoa te nau fanongo ki aí. ʻOku ʻomi ʻe he tekinolosia ko ʻení ʻa e faingamālie kiate kinautolu ke nau lava ʻo ʻalu holo pē mo fanongo ki he Tohi ʻa Molomoná, Tokāteline mo e Ngaahi Fuakavá mo e Mataʻitofe Mahuʻingá. ʻOku maʻu ai foki ʻe he kau mēmipá ha founga kehe ke ako ai.

Ki muʻa ʻi Sepitema ʻo e 2007, ko e lea faka-Pilitāniá pē naʻe lava ke maʻu ai e folofolá ʻe kinautolu ʻoku nau fakaʻaongaʻi ʻa e MP3. Naʻe fakamatala ʻa Lopi Seki, ko e talēkita ia ki hono fakafekauʻaki ʻo e folofolá maʻá e Potungāue ki he Ngaahi Meʻa Fakalēsoní, ne fili ke fakakau atu mo e lea faka-Sipeiní mo e lea faka-Potukalí he ko e ongo lea ia ʻoku lahi taha hono fakaʻaongaʻi ʻe he kāingalotú ʻo hoko hake ki he lea faka-Pilitāniá. Ko e tahá, kuo ʻosi maʻu pē foki e ngaahi fakamatala ia ʻi he ongo lea ko ʻení ʻi ha ngaahi fōmeti (format) kehe, ko ia ne faingofua ange ai hono liliu ke fakahū ia ki he MP3.

Naʻá ne fakamamafaʻi ʻoku ʻomi e ngaahi faile ʻi he MP3 ke “toe lelei ange ai ʻa hono ako ʻo e folofola ʻa e ʻOtuá.”

ʻOku kau ʻi he ngaahi palani ke toe fakalahi ange ʻa e ngaahi faile fakamatala ʻi he Uepisaiti ʻa e Siasí ʻa hono fakakau atu ki ai mo ha toe ngaahi lea fakafonua kehe ʻe 28 ʻi he ngaahi taʻu siʻi ka hoko maí. Naʻe pehē ʻe Misa Seki ʻoku lolotonga maʻu e paaki ʻo e Tohi ʻa Molomoná ʻi he ngaahi lea ʻe 106 pea ko e tohi ʻoku fakatahaʻi ai e ngaahi folofola ʻe tolú ʻi he lea ʻe 49. ʻOku hokohoko atu pē hono liliu ki he ngaahi lea kehé lolotonga ia ʻoku ngāue ʻa e Siasí ke ʻoatu ki māmani e folofola ʻa e ʻOtuá.

Ke maʻu e ngaahi faile ko ʻení ʻi he ʻInitanetí, hū ki he www.lds.org/audio.

ʻI he konifelenisi lahi ʻo ʻEpeleli ʻo e 2000, ne fakamatala ai ʻa ʻEletā L. Tomu Peuli ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē: “Kuo tāpuekina kitautolu ʻe he tekinolosiá ʻi ha ngaahi ʻilo foʻou lahi ke fakamafola ai ʻa e pōpoaki ʻo e ongoongoleleí ʻi he satelaité, ʻo ʻi ai ʻetau fetuʻutaki ʻinitaneti, televīsone, letiō pea aʻu ki hono hiki ʻo e ngaahi leá ʻi heʻetau ngaahi makasiní mo ʻetau nusipepá. ʻOku tānaki kotoa ʻeni ki heʻetau founga fakamafolá ʻa ia kuo fakautuutu lahi ai ʻetau malava ke maʻu ʻa e ngaahi pōpoaki ʻoku fakahokó” (“Tokanga ki Heʻene Ngaahi Lea Kotoa Pē,” Liahona, Siulai 2000, 29–30; Ensign, May 2000, 23).