NGAAHI FAKAKAUKAU MAʻÁ E EFIAFI FAKAFĀMILI ʻI ʻAPÍ

ʻE lava ʻo fakaʻaongaʻi ʻa e ngaahi fokotuʻu ʻo e founga akoʻi ko ʻení ʻi he loki akó pea ʻi he ʻapí foki. Te ke lava pē ke filioʻi ʻa e ngaahi fakakaukaú ni maʻa ho fāmilí pe kalasí.

“Fakamuʻomuʻa ʻa e Meʻa ʻOku Mahuʻingá,” p. 10: ʻE ala ʻaonga ʻa e ʻekitivitī ko ʻení ʻi hono fakatātaaʻi ʻa e founga ke fokotuʻutuʻu lelei ai ʻa e ngaahi meʻa ʻoku mahuʻingá. Kapau te ke faingataʻaʻia mo ho fāmilí ʻi he toafá, ko e hā ha ngaahi meʻa ʻe 10 te mou fie maʻu? Kapau ʻokú ke faingataʻaʻia fakalaumālie mo ho fāmilí, ko e hā ha meʻa ʻe 10 te mou fie maʻu? Fakafehoanaki ʻa e ongo lisí. Fakamatala ki ho fāmilí ʻa e konga ki he “Moʻui ʻOku Fakavaʻe he Fuakavá.” Aleaʻi ʻa e ʻuhinga ʻoku tokamālie ai ʻa e meʻa kotoa pē ʻo ka fakamuʻomuʻa ʻa e ngaahi meʻa ʻa e ʻOtuá.

“Ko e Tohi ʻa Molomoná: Ko e Talakiʻanga Maʻongoʻonga ʻo e Melino ʻa e Fakamoʻuí,” p. 18: Fakaʻaliʻali ha vai inu, pea fakaʻatā ia ki he kau mēmipa ʻo e fāmilí. Fakamatalaʻi hono fie maʻu ʻe hotau sinó ha vaí pea mo ʻetau ongoʻi fiu ʻi he hili ʻo ʻetau inu iá. Fakafehoanaki ʻa e vaí ki he Tohi ʻa Molomoná pea mo ʻetau (fieinua) fie maʻu ha nonga pea mo e moʻoní. Ngāueʻaki ha ngaahi meʻa tonu ne ke foua pea mo ha ngaahi talanoa mei he fakamatalá, ke fakamanatu ʻaki ʻa e ngaahi tafaʻaki kehekehe te tau lava ai ʻo maʻu ha nonga ʻi heʻetau lau ʻa e Tohi ʻa Molomoná.

“Ko e Lēsoni Fineʻofa Naʻá ne Liliu Homau Fāmilí,” p. 26: Lau leʻo lahi ʻa e talanoa ʻo e lēsoni Fineʻofá. Fakaafeʻi ho fāmilí ke nau tokoni atu ʻi hano hiki ha lisi ʻe ua, ko e taha ʻe hiki ai ʻa e “ngaahi ngata uʻu kona” ʻoku fehangahangai mo ho fāmilí pea ko e tahá ʻe hiki ai ʻa e founga te tau lava ai ʻo tafoki ki he Fakamoʻuí ke maʻu ha maluʻí. Aleaʻi ʻa e founga ʻe lava ai ʻe he lisi hono uá ʻo maluʻi kimoutolú. Fakamoʻoni ki he lava ko ia ʻe he tokanga taha pē ki he Fakamoʻuí ʻo ʻomi ha ivi ke ke fakafepakiʻi ʻaki ʻa e ngaahi ngata vela ʻi hoʻo moʻuí.

“Ngaahi Hēkesi ʻOku Maʻú,” p. K10: Lau leʻo lahi ʻa e talanoá ʻo aʻu ki he taimi naʻe kamata fokotuʻu ange ai ʻe he faʻē ʻa Laiení ke ne ʻalu ʻo maʻu tokoni mei he pīsopé. ʻEke ki he kau mēmipa ʻo e fāmilí ha ngaahi fakakaukau ki ha meʻa ʻe ala fai ʻe Laieni. Fai ʻa e toenga ʻo e talanoá. Aleaʻi ʻa e ongo naʻe maʻu ʻe Laieni ʻi he taimi naʻá ne fakatokangaʻi ai ko e uōtí ko hono fāmili pea ʻoku ʻi ai ʻa e pīsopé ke tokoniʻi ia. Fakaafeʻi ʻa e kau mēmipa ʻo e fāmilí ke nau fai ha fanga kiʻi tohi fakahoungaʻi hoʻomou pīsopé pe palesiteni fakakoló.