Ko Hono Fakamu‘omu‘a ʻEku Nofo-malí ʻi Heʻeku Taʻefieʻulutukuá
Kuo ʻosi ʻi ai pē ʻema ngaahi taʻefemahinoʻaki mo hoku husepānití ʻi heʻema nofo-malí, ʻo tatau mo ha ngaahi mātuʻa mali kehe. Ka ʻoku ʻi ai ha meʻa ʻe taha ʻoku ou manatuʻi lelei. ʻOku ʻikai ke u kei manatuʻi ʻa e ʻuhinga ʻo ʻema taʻefemahinoʻakí, ka naʻe iku ʻo ʻikai ke ma toe feleaʻaki, pea ʻoku ou manatuʻi ʻeku pehē ko e foʻui kotoa ʻeni hoku husepānití. Naʻá ku ongoʻi naʻe halaʻatā ke u fai ʻe au ha meʻa ne fie maʻu ai ke u kole fakamolemole.
Pea ʻi he fakalau atu ʻo e ʻahó, naʻá ku tatali pē ke kole fakamolemole mai hoku husepānití. ʻOku totonu pē ke ne lava ʻo fakatokangaʻi ʻene fehālākí. Kuo pau pē ʻokú ne ʻiloʻi lelei ʻa e lahi ʻene fakalotomamahiʻi aú. Naʻá ku pehē kuo pau ke ʻoua naʻá ku fakavaivai ki ai; he ko e tefitoʻi moʻoní ʻoku mahuʻingá.
ʻI he ofi ke ʻosi ʻa e ʻahó, naʻe kamata ke u fakatokangaʻi ko e koto kulanoa ʻeku talí, peá u lotu leva ki he ʻEikí. Naʻá ku lotu ke ʻiloʻi ʻe hoku husepānití ʻa e meʻa naʻá ne faí pea mo ʻene uesia ʻema nofo-malí. Naʻá ku lotu ke ueʻi ia ke kole fakamolemole kae lava ke fakangata ʻema taʻefemahinoʻakí.
Lolotonga ʻeku lotú, kuó u maʻu ha ongo mālohi ʻoku totonu ke u ʻalu ʻo kole fakamolemole ki hoku husepānití. Naʻá ku kiʻi ʻohovale ʻi he ongo ko ʻení peá u fakamahinoʻi he taimi pē ko iá ʻi heʻeku lotú naʻe ʻikai ke u fai ʻe au ha meʻa hala pea ʻoku ʻikai leva tonu ia ke u kole fakamolemole au. Ka naʻe hū mālohi mai ha fakakaukau ki hoku ʻatamaí: “ʻOkú ke fie tonuhia, pe ʻokú ke fie kei nofo-mali?”
ʻI heʻeku fakakaukauʻi ʻa e fehuʻi ko ʻení, naʻá ku fakatokangaʻi te u lava pē ʻo piki ki heʻeku taʻefieʻulutukuá ʻo ʻikai kole fakamolemole kae ʻoua kuo kole fakamolemole mai ia, ka ko e hā hano fuoloa? Lau ʻaho? Naʻá ku loto mamahi he lolotonga ʻo e ʻikai ke ma toe feleaʻakí. Naʻe mahino kiate au neongo he ʻikai ke lava ʻe he meʻa ia ko ʻení ʻataʻatā pē ʻo fakangata ʻema nofo-malí, kapau te u kei taʻefieʻulutukua maʻu ai pē, te ne lava ʻo fakatupu ha maumau lahi ʻi ha ngaahi taʻu lahi. Naʻá ku pehē leva ʻoku mahuʻinga ange ke maʻu ha nofo-mali fiefia mo feʻofoʻofani kae tuku ʻeku pīkitai ki heʻeku taʻefieʻulutukua ʻi he faʻahinga meʻa ʻe ʻosi angé ko ha kiʻi meʻa laulaunoa.
Naʻá ku ʻalu leva ki hoku husepānití ʻo kole fakamolemole ʻi heʻeku fakatupu ʻita ki aí. Naʻe kole fakamolemole mai mo ia, pea ʻikai hano taimi kuó ma fiefia mo toe uouangataha ʻi he ʻofa.
Talu mei he taimi ko iá mo e faʻa ʻi ai ha ngaahi meʻa ʻe niʻihi ne hoko naʻe fie maʻu ai ke u toe fai kiate au ʻa e fehuʻi ko iá: “ʻOkú ke fie tonuhia, pe ʻokú ke fie kei nofo-mali?” ʻOku ou fakamālō lahi ʻi he lēsoni maʻongoʻonga ne u ako ʻi he ʻuluaki taimi naʻá ku fehangahangai ai mo e fehuʻi ko iá. Kuo tokoni maʻu ai pē ia kiate au ke u fakatonutonu ʻa e anga ʻo ʻeku fakakaukaú mo u fakamuʻomuʻa hoku husepānití mo ʻeku nofo-malí ʻi heʻeku taʻefieʻulutukuá.