Tokoni ‘a e Siasí ‘i he Matangi ko Tīní

ʻI he tō tuʻo ua mai ʻa e Matangi ko Tīní ki Mekisikoú pea ko e matangi ko ʻení feʻunga hono mālohí mo e 2, naʻe kei hokohoko atu pē ngāue fakataha ʻa e kau taki ʻo e Siasí mo e kau ngāue fakapuleʻanga ʻi Samaiká ke fakapapauʻi e founga lelei taha ke tokoniʻiʻaki e kakaí mei he maumau kuo fakahoko ʻe he matangi ko ʻeni ko Tīní ʻa ia ne fika 5 hono mālohí.

Naʻe ʻomi ʻe Tiini ha ngaahi matangi ʻi he mālohi ʻo e afaá ki he konga lahi ʻo Samaika ʻi he ʻaho Sāpate, ko hono 19 ʻo ʻAokosi 2007, ka naʻe hiki e mālohi ia ʻo e havilí ne mail ‘e 145 he houa ofi ki he lotolotonga ʻo e matangí ki he tafaʻaki fakatonga ʻo e motú. Ne fakahā mai ʻoku malu pē ʻa e kāingalotú mo e kau faifekaú pea ne hao e ngaahi ʻapi ʻo e kāingalotu tokolahi mei hono toʻo e ʻató mo ha ngaahi maumau kehe pē.

Ne tō ʻa Tiini ʻi he matāfanga ʻo Mekisikou ki he tahi Kalipiané ʻi he ʻaho 21 ʻo ʻAokosí. Ne fakalaka e lotolotonga ʻo e matangí ʻi ha feituʻu naʻe ʻikai fuʻu tokolahi ai e kakaí ʻi he Muitolotolo ʻo Iukataní, ʻa ia ʻoku maile ʻe 40 (km ʻe 64) ki he hahake-tokelau-hahake ʻo Sietumalá ʻi Mekisikou. Ne toe ake mai ʻa Tiini ʻo mālohi ange ʻi heʻene fakalaka atu ʻi he Matāfanga ʻo Kemipīsí ʻo ne laiki ʻa e matāfanga lotoloto ʻo Mekisikoú ʻi he maile ʻe 100 nai (km ʻe 160) ki he fakatokelau ʻo Velakulusí, ʻi Mekisikou.

Ne maʻu e tala naʻe hao pē kāingalotú mo e kau faifekaú. Kuo aleaʻi ʻe he kau taki ʻo e Siasí ha ngaahi fale ʻoku malú mo ha meʻakai mo e vai feʻunga maʻá e kau faifekaú pea naʻe ʻosi mateuteu pē ʻa e kau ngāue ʻi he fale tauhiʻanga koloa ʻa e pīsopé ʻi Mekisikoú ke fakafolau atu ha tokoni ʻofa fakaetangata ʻo kapau ʻe fie maʻu.