Taimi Feʻinasiʻakí

Ko ʻEku Moʻuí ko ha Meʻofa; Ko ʻEku Moʻuí ʻoku ʻI ai Hano Palani

FAI ʻE LINDA CHRISTENSEN

“Ko e kakai kotoa pē—ʻa e tangata mo e fefine—naʻe fakatupu ia ʻi he tatau ʻo e ʻOtuá. Ko e tokotaha fakafoʻituitui kotoa pē ko e foha mo e ʻofefine ia ʻo ha mātuʻa fakalangi pea ʻi heʻene peheé, ʻoku maʻu ai ʻe he tokotaha kotoa pē ha natula fakalangi pea mo ha ikuʻanga pau” (“Ko e Fāmilí: Ko ha Fanongonongo ki Māmani”).

Ko ʻeku moʻuí ko ha meʻofa; ko ʻeku moʻuí ʻoku ʻi ai hano palani. Ko ʻeku moʻuí ʻoku ʻi ai hano taumuʻa; naʻe kamata ia ʻi langi.

Ko ʻeku filí ke u haʻu ki he ʻapi fakaʻofoʻofa ko ʻení ʻi māmani.

Pea fekumi ki he maama ʻa e ʻOtuá ke ne tataki au ʻo kamata ʻi hoku fanauʻí.

(“Te u Muimui he Palani ʻa e ʻOtuá,” Tohi Hiva ʻa e Fānaú, 86–87)

ʻOku akoʻi ʻe he ngaahi lea ko ʻení naʻá ke nofo mo e Tamai Hēvaní ki muʻa peá ke toki haʻu ki māmaní. Ko ʻEne fānau koe. Ne kole ʻe he Tamai Hēvaní ki Hono ʻAlo ko Sīsū Kalaisí ke ne fakatupu ʻa e māmaní. Naʻe teuteu ʻa e māmaní koeʻuhí ke ke lava ʻo haʻu pea mo maʻu ai ha sino. Naʻe toe foaki atu foki mo haʻo tauʻatāina ke fili, pea naʻá ke fili ke ke haʻu ki māmani ʻo feinga ai ke ke muimui ʻi he palani ʻa e Tamai Hēvaní.

Te ke lava ʻo ʻilo ki he palani ʻa e Tamai Hēvaní ʻi he folofolá. Naʻe akoʻi ʻe Sēkope, ko ha palōfita ʻo e Tohi ʻa Molomoná, ʻo pehē, naʻe fili ʻa Sīsū Kalaisi ke hoko ko hotau Fakamoʻuí. ʻE hāʻele mai ki māmani ʻo moʻui ai, toʻo kiate Ia ʻa e ngaahi angahala ʻa māmaní mo ʻomi ha hala ke foki ai ʻa e fānau kotoa ʻa e Tamai Hēvaní kiate Ia. Koeʻuhí ko Sīsū, te ke lava ai ʻo fakatomala pea fakamolemoleʻi hoʻo ngaahi angahalá. Naʻe pehē ʻe Sēkope, “ʻOiauē, hono ʻikai ke maʻongoʻonga ʻa e palani ʻa hotau ʻOtuá!” (2 Nīfai 9:13).

ʻOku ʻofa ʻa e Tamai Hēvaní ʻiate koe. Kuó ne ʻosi foaki atu ʻEne leá—ʻa e ngaahi folofolá—koeʻuhí ke ke lava ʻo ʻilo ʻEne palaní. Kapau te ke muimui ʻi Heʻene palaní, te ke fiefia ʻi māmani pea toe foki atu ke nofo fakataha mo Ia ha ʻaho.

ʻEkitivitií

Toʻo ʻa e peesi K4, ʻo fakapipiki ia ʻi ha pepa matolu. Kosi ʻo toʻo ʻa e ngaahi fōtungá takitaha ʻi he laine motumotú pea fakapipiki ha kiʻi konga tupenu sipi pe tupenu matolu ʻi he tuʻá. Ngāueʻaki ʻa e fakahinohino ki hono fakakakato ʻa e papa tupenu sipí ke tokoni atu ʻi hono fokotuʻu ʻo e ʻū fakatātā tupenu sipí ʻi honau tuʻuʻanga totonú. Ako ki he palani ʻo e fakamoʻuí pea fakamatala ange ʻa e meʻa kuó ke ʻosi ʻiló ki ho fāmilí. Fakakaukau ke fakahoko ʻa e ʻekitivitií ni ʻi ha lēsoni he efiafi fakafāmili ʻi ʻapí.

Ngaahi Fakakaukau ki he Taimi Feʻinasiʻakí

1. Fakaʻaliʻali ha tā ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá mo ha tatau ʻo e “Ko e Fāmilí: Ko ha Fanongonongo ki Māmani” (Liahona, ʻOkatopa 2004, 49). Aleaʻi hono mahuʻinga ʻo e fanongonongó, pea tokoni ke ako maʻuloto ʻe he fānaú ʻa e ʻuluaki sētesi ʻo e palakalafi hono uá. Fakamatalaʻi ange ʻoku ʻuhinga ʻa e “fakatupu ʻi he tatau ʻo e ʻOtuá” ko ʻetau maʻu ha sino fakamatelie pea malava ke tau hangē ko e Tamai Hēvaní. Aleaʻi ʻa e ngaahi tāpuaki ʻo e maʻu ha sinó. Ngāueʻaki ʻa e Ko Hoku Ngaahi Tuʻunga Mahuʻinga ʻi he Ongoongoleleí: “Te u tauhi ʻeku fakakaukaú mo hoku sinó ke toputapu mo maʻa pea he ʻikai ke u maʻu ha meʻa ʻe fakatuʻutāmaki kiate au.” Talanoa fekauʻaki mo ha ngaahi founga ke fakahaaʻi ai hono fakaʻapaʻapaʻi hotau sinó.

2. Talaange, “ʻOku ou maʻu ha ikuʻanga fakalangi,” pea ʻeke ki he fānaú pe ʻoku nau pehē ʻoku ʻuhinga ʻeni ki he hā. Aleaʻi hono ʻuhinga ʻo e foʻi lea ko e fakalangi (fakahangatonu mei he ʻOtuá) mo e ikuʻangá (ko ha palani ne tomuʻa fakapapauʻi). Lau fakataha ʻa e ʻĒpalahame 3:23. Laineʻi ʻa e kupuʻi lea “naʻe fili koe ʻi he teʻeki ai fanauʻi koé.” Fakamatalaʻi ha ngaahi meʻa naʻe hoko ʻi he moʻui ʻa ʻĒpalahamé. Fakamamafaʻi ange naʻe ʻafioʻi mo ʻofaʻi ʻe he Tamai Hēvaní ʻa ʻĒpalahame ʻi he moʻui ki muʻa ʻi he māmaní. Koeʻuhí ko e talangofua ʻa ʻĒpalahamé, naʻá ne maʻu ai ha ngaahi tāpuaki lahi mei he Tamai Hēvaní. Aleaʻi ha ngaahi sīpinga ʻo ha niʻihi kehe naʻe fili ki muʻa pea toki fāʻeleʻi mai kinautolu ke nau fakahoko ha misiona mahuʻingá: Siosefa Sāmita (vakai, 2 Nīfai 3:14–15), Kōtoni B. Hingikelī (vakai, “Mou Fekumi ki he Puleʻanga ʻo e ʻOtuá,” Liahona, Mē 2006, 82), pea mo Sīsū Kalaisi (vakai, Mōsese 4:1–2). Fakamanatu ki he fānaú ʻoku ʻi ai ha misiona mahuʻinga ʻa e Tamai Hēvaní maʻanautolu ke nau fakahoko ʻi he lolotonga ʻo ʻenau ʻi māmaní. ʻEke ange, “Ko e hā ha faʻahinga meʻa ʻokú ke pehē ʻoku fie maʻu ʻe he Tamai Hēvaní ke ke fai?” Fakamoʻoni ange ko e tangata kotoa pē ʻoku ʻi ai hano ikuʻanga fakalangi, pea ʻe tokoni ʻene fili ʻa e totonú ke fakahoko ai ia.