Haʻu ʻo Fanongo ki he Leʻo ʻo e Palōfitá
Ko e Maama ʻo ha ʻAho Foʻou
Naʻe ʻi ai haʻaku fakataha fakangalongataʻa lōloa mo ha palēmia mālōlō. Naʻe tofanga ʻi ha ngaahi fepaki mo ha faingataʻa lahi ʻi hono taimí. Naʻá ne fai ai ha talanoa mālie fekauʻaki mo ha faifekau ʻo e lotu faka-Siú pea mo hano ongo kaungāmeʻa. Naʻe ʻeke ange ʻe he faifekaú ki ha taha ʻo kinaua “ʻOkú ke ʻilo fēfē kuo matafi atu ʻa e poó kae kamata ha ʻaho foʻou?”
Ne pehe ange ʻe hono kaumeʻá, “Ko e taimi te ke vakai ai ki he hahaké ʻo ke lava ke fakafaikehekeheʻi ʻa e sipí mei he kosí, te ke ʻilo leva kuo ʻosi ʻa e poó pea kuo kamata ʻa e ʻaho foʻoú.”
Naʻe fai ki he fika uá ʻa e fehuʻi tatau. Naʻá ne tali ange, “Ko e taimi te ke vakai ai ki he mamaʻó ʻo lava ke ke fakafaikehekeheʻi ʻa e fuʻu ʻōlivé mei he fuʻu fikí, te ke ʻilo leva kuo hoko mai ʻa e pongipongí.”
Ne na toki fehuʻi leva ki he faifekaú pe ʻoku anga fēfē ʻene lava ke tala kuo ʻosi ʻa e poʻulí kae kamata ʻa e ʻahó. Naʻe kiʻi fakakaukau peá ne toki pehē ange, “Ko e taimi ʻoku ou vakai ai ki he hahaké peá u fakatokangaʻi ha fofonga ʻo ha fefine mou lava ke pehē, ʻKo hoku tuofefiné ia,’ pea ʻi he taimi te ke vakai ai ki he hahaké ʻo fakatokangaʻi ha fofonga ʻo ha tangata mo lava ke pehē, ʻKo hoku tokouá ia,’ te ke ʻilo leva kuo hoko mai ʻa e maama ʻo ha ʻaho foʻou.”
Kiʻi fakakaukau ʻi ha taimi nounou ki ai, ʻe hoku ngaahi kaungāmeʻa. ʻOku ʻuhinga moʻoni ia ki he ongoʻi fakatokouá.
Ko e ongoongolelei ʻo Sīsū Kalaisí, ko e mālohi pē ia ʻe taha te ne lava ke fakaʻauha ʻa e tāufehiʻa ʻoku ʻi he kakaí. Kapau te nau toʻo mai ʻa e ongoongolelei ko ʻení ki heʻenau moʻuí, ʻe lahi fau ange ʻa e melinó ʻi māmani. Ko hono ʻuhinga ia ʻokú ta ʻi heni aí—ke akoʻi ʻa e ongoongolelei ʻo e ʻEiki ko Sīsū Kalaisí mo tokoniʻi ʻa e loto ʻo e kakaí ke nau lava ʻo tala ko e ngaahi tokoua mo e tuofāfine kinautolu, ʻo taau mo e fānau ʻa ʻetau Tamai Hēvaní.
Mei ha lea naʻe fai ʻi he ʻUnivēsiti ko Pilikihami ʻIongí ʻi he ʻaho 31 ʻo ʻOkatopa 2006 mo e “Ngaahi Lea ʻa e Palōfita Moʻuí,” Liahona, Tīsema 1996, 8; Tūhulu, Tīsema 1996, 8.
NGAAHI MEʻA KE FAKAKAUKAU KI AÍ
-
ʻI he talanoá, naʻe fakafehoanaki ʻe he faifekaú ʻa e ʻofá ki he maama ʻo ha pongipongi foʻou. Ko e hā ʻoku ʻomi ai ʻe he maama ʻo e ongoongoleleí ha ʻofa ki hotau lotó?
-
ʻʻE founga fēfē haʻo vahevahe ʻa e ongoongoleleí mo tokoni ke ʻomi ha nonga ki he niʻihi kehé?
-
Te ke lava fēfē ʻo maʻu ʻa e nonga ʻo e ongoongoleleí ʻi hoʻo moʻuí?