‘Omi ‘e he Kau Tā Valivali Siasí ha Fōtunga ‘Oku Toe Fakatu‘apule‘anga Ange ki he Ngaahi Tohi ‘a e Siasí
ʻOku fakaʻau ke tokolahi ange ha kau tā valivali mo ha kau faitā mei māmani kotoa ʻoku fakaʻaongaʻi ke nau ʻomi ki he ngaahi makasini mo e ngaahi tohi kehe ʻa e Siasí ha fōtunga ʻoku toe fakatuʻapuleʻanga angé.
Ne ʻuluaki ʻoatu mei he Potungāue ʻa e Siasí ki he Ngaahi Meʻa Fakalēsoní ha fakaafe ki he kau tā valivali mo e kau faitā fakapalofesinalé ʻi he Liahona ʻo ʻOkatopa ʻo e 2005. Talu mei ai mo e fakaʻau pē ke tokolahi ange ʻa e kau mēmipa talēnitiʻia ʻo e Siasí mei ha ngaahi fonua lahi kuo nau ʻomai ʻenau ngaahi ngāué ʻo fakatahatahaʻi. Ne toe fakalahi atu ki ai ha kole ki he kau tā valivali mei he ngaahi fonua mei tuʻapuleʻangá ke nau tā ha ngaahi fakatātā fakalotu, kae fakatautefito pē ki he ngaahi talanoa mei he Fuakava Foʻoú.
Naʻe pehē ʻe Teti Pitasoni ʻa ia ʻokú ne tokangaʻi ʻa e ngāué ʻi heʻene hoko ko e taki ʻi he Tafaʻaki ki he Ngaahi Fakatātaá ʻi he Potungāue ki he Ngaahi Meʻa Fakalēsoní, “Ko e taumuʻa ʻo hono [faʻufaʻu mo fokotuʻutuʻu] e polokalama ko ʻení ke tauhi (database) ke toe totonu ange ai ʻa e ngaahi ʻaati fakafonua fakavahaʻapuleʻanga ʻoku maʻu pea pulusi ʻi he ngaahi tohi ʻa e Siasí. ʻOku mau toe feinga foki ke fakaʻaongaʻi e ngaahi talēniti tā valivali ʻo e kau mēmipa ʻo e Siasí ʻi māmani kotoá.”
Ko e konga ia ʻo e ngāue ki he Fuakava Foʻoú ʻa hono ʻoatu ʻe he kau ngāue ʻo e Liahoná ha fakaafe kiate kinautolu ʻe fie kau maí ke nau tā ha ngaahi fakatātā pea ʻomai ia ke lava ʻo fakaʻaongaʻi ʻi he ngaahi makasini mo e ngaahi tohi ʻa e Siasí ke poupou ki he kaveinga ʻo e Fuakava Foʻoú ki he 2007. Ne fakaʻaongaʻi ha ngaahi tā valivali mei ʻĀsenitina, Palāsila, Kolomupia, Finileni, Siamane, Pelū mo ʻAfilika Tonga.
ʻOku lolotonga maʻu mo tauhi e ngāue ʻa ha kau faitā, kau tā valivali mo ha kau tā fakatātā ʻe toko 200 tupu mei ha ngaahi fonua ʻe 31.
Kuo ʻomi ʻe kinautolu ne tokoni maí ha ngaahi fakatātā ki ha ngaahi fakamatala ʻoku hā he ngaahi makasini ʻa e Siasí pea pehē ki he ngaahi fakamatala ʻoku ʻalu fakataha mo e tohi lēsoni ko ia ko e Malangaʻaki ʻEku Ongoongoleleí ʻʻa ia ʻoku fakaʻaongaʻi ʻe he kau faifekaú ʻi māmani kotoá.
Naʻe pehē ʻe Misa Pitasoni ʻoku tokoni hono fakaʻaongaʻi ʻo e ngaahi tā valivali fakatuʻapuleʻangá ke ne ʻomi ha ongoʻi uouangataha ki he kau mēmipa ʻo e Siasí ʻi māmani kātoa. ʻOku fakaʻaliʻali ʻe he ngaahi ngāue fakaʻaati ko ʻení ʻa e ngaahi ʻulungāanga fakafonua mo e ngaahi founga moʻui kehekehe, lolotonga ko iá ʻoku ʻi ai ʻa e fāʻūtaha ʻi he fakaʻapaʻapa mo e ʻofa ki he ngaahi tefitoʻi moʻoni ʻo e ongoongoleleí pea mo e ʻapasia ki he ngaahi meʻa ʻoku toputapú.
Naʻe pehē ʻe Misa Pitasoni, “ʻOku mahuʻinga lahi e ngaahi ngāue fakaʻaati ko ʻení ki he kāingalotu kotoa pē he ʻoku nau fakafofongaʻi moʻoni ha siasi fakamāmani lahi.”
Ko e founga ʻaonga taha ki hono fakahū mai ha tā valivali pe fakatātā ke fakakau ki he ngaahi meʻa ʻoku tātānakí ko hono ʻī-meiliʻi pē ʻo ha ngaahi fakamatala ki he tuʻasila ʻo e tokotaha tā fakatātaá mo ha ngaahi tatau ʻo e fakatātaá pe ʻū laʻi taá ki he cur-artist-photographer@ ldschurch.org. ke fai hano vakaiʻi. ʻE lava pē foki ke ʻomai he meilí mo ha tatau (fakamolemole kae ʻoua naʻa ʻomi ʻa e tatau totonú) ʻo e fakatātaá pe laʻi taʻá, tuʻasila ke fetu‘utaki atu ki aí mo ha kiʻi hisitōlia nounou pē kau ki he ngāue naʻe fai ki aí ki he:
Artists and Photographers Database
50 E. North Temple St., Rm. 2474
Salt Lake City, UT 84150-3220, USA
ʻE makatuʻunga e ngaahi ngāue fakaʻaati ʻa e kau tā valivali mo e kau faitā ʻoku nau ngāue pē ʻiate kinautolú ʻi he feituʻu, taukei, ākenga ʻoku nau fakaʻaongaʻí mo ʻenau ngaahi feituʻu maʻuʻanga tokoní.