Pōpoaki ʻa e Faiako ʻAʻahí

Naʻe Akoʻi Mai ʻe Sīsū Kalaisi ʻa e Taumuʻa ʻo ʻEtau Moʻui ʻi Mamaní

Filifili ʻi he faʻa lotu mo lau mei he pōpoaki ko ʻení ʻa e ngaahi potupolofola mo e ngaahi akonaki te ne feau ʻa e ngaahi fie maʻu ʻa e houʻeiki fafine ʻokú ke ʻaʻahi ki aí. Fakamatalaʻi ange hoʻo fakamoʻoní mo e ngaahi meʻa kuó ke aʻusiá. Fakaafeʻi kinautolu ʻokú ke akoʻí ke nau fai ʻa e meʻa tatau.

Ko e hā ʻa e Taumuʻa ʻo e Moʻui ʻi Māmaní?

Palesiteni Sipenisā W. Kimipolo (1895–1985): [“Ko e tangatá, ʻa ia naʻe fakatupu ʻi he tatau ʻo e ʻOtuá, naʻe tuku ia ki māmani ke ne foua ʻa e moʻui fakamatelié, ko ha tuʻunga ʻi he vahaʻa ʻo e moʻui ki muʻa ʻi he māmaní pea mo e moʻui taʻe faʻamaté.]

[“Naʻe talangataʻa ʻetau ʻuluaki mātuʻá, ʻa ʻĀtama mo ʻIvi, ki he ʻOtuá. ʻI heʻena kai ʻa e fua ʻo e ʻakau naʻe taʻofí, naʻá na hoko ai ʻo matelie. Ko hono olá, naʻá na moʻulaloa ai mo hona ngaahi hako kotoa ʻi mui ʻiate kinauá ki he mate fakamatelié mo e mate fakalaumālié fakatouʻosi. (mate fakamatelié, ko e mavahe ʻa e sinó mei he laumālié; pea ko e mate fakalaumālié, ko e mavahe ʻa e laumālié mei he ʻao ʻo e ʻOtuá pea mate ai mei he ngaahi meʻa ʻo e laumālié).]

[“Koeʻuhí ke toe maʻu ʻe ʻĀtama hono muʻaki tuʻungá (ke ʻi he ʻao ʻo e ʻOtuá), naʻe fie maʻu ai ha fakalelei ki he talangataʻa ko ʻení. ʻI he palani fakalangi ʻa e ʻOtuá, naʻe fie maʻu ai ha huhuʻi ke ne veteki ʻa e ngaahi haʻi ʻo e maté pea fakafaingamālieʻi ke toe fakataha ʻa e laumālie mo e sino ʻo e taha kotoa pē ne moʻui ʻi māmani, tuʻunga ʻi he toetuʻú.]

[“Ko Sīsū ʻo Nāsaletí naʻe fili ki muʻa pea toki fakatupu ʻa e māmaní, ke hāʻele mai ki māmani ʻo fakahoko ʻa e ngāué ni, ke ikunaʻi ʻa e mate fakamatelié”] (“The True Way of Life and Salvation,” Ensign, May 1978, 6).

Ko e hā Te u Lava ʻo Fai ke u Fakahoko ai ʻa e Taumuʻa ʻo ʻEku Moʻuí?

Palesiteni ʻĒsela Tafu Penisoni (1899–1994): [“ʻI hono tuku ko ia ʻe heʻetau Tamai Hēvaní ʻa ʻĀtama mo ʻIvi ki he māmani ko ʻení, naʻá Ne fai ia ʻi he taumuʻa ke akoʻi kinaua ʻi he founga ke na foki ange ai ki Hono ʻafioʻangá. Naʻe talaʻofa ange ʻe heʻetau Tamaí ha Fakamoʻui ke Ne huhuʻi kinaua mei hona tuʻunga hingá. Naʻá ne foaki ange ʻa e palani ʻo e fakamoʻuí mo talaange ke na akoʻi ʻena fānaú ke nau tui kia Sīsū Kalaisi mo fakatomala. ʻIkai ngata ai, naʻe fekau kia ʻĀtama mo hono hakó ʻe he ʻOtuá ke nau papitaiso, ke nau maʻu ʻa e Laumālie Māʻoniʻoní, pea ke nau kau ʻi he founga ʻa e ʻAlo ʻo e ʻOtuá … , ʻa ia ko hono kakató ʻoku toki maʻu pē ia ʻi he Fale ʻo e ʻEikí”] (“What I Hope You Will Teach Your Children about the Temple,” Tambuli, Apr.–May 1986, 4).

Suli B. Peki, palesiteni lahi ʻo e Fineʻofá: “ʻI he hoko ʻa e houʻeiki fafiné ko e ngaahi ʻofefine fakalaumālie ʻo e ʻOtuá, ne nau maʻu ai ʻenau ʻuluaki lēsoní ʻi he maama ʻo e ngaahi laumālié pea naʻe teuteuʻi kinautolu ke nau haʻu’ (T&F 138:56) ki māmani. Naʻa nau kau ʻi he ʻkakai ʻeiki mo tuʻukimuʻa’ (T&F 138:55) naʻe ʻkalanga fiefia’ (Siope 38:7) ʻi hono faʻu ʻo māmaní koeʻuhí he ʻe foaki ange hanau sino fakamāmani mo ha faingamālie ke siviʻi ʻi ha ʻātakai fakamatelie (vakai, ʻĒpalahame 3:25). Naʻa nau loto ke nau ngāue fakataha mo ha kau tangata māʻoniʻoni ke ikunaʻi ʻa e ngaahi taumuʻa taʻengata ko ē he ʻikai ke lava ʻo aʻusia fakafoʻituituí.

“Naʻe ʻikai ke kamata ʻa e tuʻunga fakaefefiné ia ʻi māmani, pea he ʻikai ke ngata ia ai. Ko e fefine ko ē ʻe mahuʻingaʻia ʻi he tuʻunga fakaefaʻeé ʻi māmaní ʻe mahuʻingaʻia ʻi he tuʻunga fakaefaʻeé ʻi he maama ka hoko maí, he ʻko e potu ʻoku ʻi ai [ʻene] koloá, ʻe ʻi ai foki mo [hono] lotó’ (Mātiu 6:21). ʻOku teuteu ʻa e kiʻi taʻahine mo e fefine kotoa pē ki hono misiona fakalangi mo taʻengata he tuʻunga fakaefaʻeé, ʻi heʻene fakatupulaki ha manavaʻi faʻeé… .

“Tuʻunga ʻi he ngaahi meʻa kuó u fouá, kuó u mamata ai ko e niʻihi ʻo e kau fafine ʻmanavaʻi faʻē’ moʻoní, ʻoku maʻu ia ʻe ha kau fafine ʻoku ʻikai ke nau lava ʻo ʻohake haʻanau fānau ʻi he māmaní, ka ʻoku nau ʻilo ʻkuo pau ke hokosia ʻa e ngaahi meʻa kotoa pē ʻi honau taimí’ (T&F 64:32–33)” (“Manavaʻi Faʻeé,” Liahona, Mē 2004, 76).