Lisi ʻo e Fakakaukaú

Moʻui Leleí mo e Iví

Kuó ke ʻosi ʻiloʻi ko e taʻefai ha meʻá pea mo e taʻekai ʻa e meʻakai fakatupu moʻui leleí ʻe iku ai ʻo vaivai ho sinó, faingofua ke maʻu ʻe ha mahaki, pea siʻi ange ke ne toe lava ʻo fai ha ngāue pe fiefia. ʻOku hoko ʻa e meʻa tatau pē ki ho laumālié. Ko hono faikehekehé, neongo ʻe foaki atu ʻe he ʻOtuá ha sino nāunauʻia kuo ʻosi fakahaohaoaʻi ʻi he Toetuʻú, ka ko e laumālie te ne nofo ʻi he sino ko iá ʻe ʻi he tuʻunga pē ia naʻá ke ngāueʻí (vakai, ʻAlamā 34:34). Ko ha ngaahi fokotuʻu leva ʻeni ke fakatupulekinaʻaki hoʻo moʻui lelei pea mo ho ivi fakalaumālié:

Meʻakaí

• ʻAi ke ke maʻu ha uʻa ki he meʻakai fakalaumālié. Hokohoko atu hono lau ʻo e folofolá, ngaahi malanga konifelenisi lahí, ʻū lēsoni ʻi he lotú mo e seminelí, pea mo ha ngaahi meʻakai fakalaumālie kehe pea ʻe kamata ke ifo ia kiate koe (vakai, ʻAlamā 32:28).

• Kai kae ʻoua ʻe kiʻi ʻahiʻahiʻi peé. ʻI he meʻakai fakalaumālié, te ke lava ʻo kai lahi mo ivi lahi ai, kae ʻikai fuʻu sino.

• Fakasiʻisiʻi ʻa e meʻaki ʻoku ʻikai fakatupu moʻui leleí. ʻOku hangē hono uesia ʻe he fuʻu lahi ʻo e meʻakai ʻoku ʻikai fakatupu moʻui leleí ho uʻá ʻo ʻikai te ke toe fie kai ha meʻatokoni lelei ʻi he efiafí, mo hono hanga ʻe he fuʻu lahi ʻo e taimi ʻi he vaʻinga vitioó, ʻInitanetí, TV, mo e ngaahi alā meʻa peheé ʻo toʻo kotoa pe tuku siʻisiʻi atu pē hao taimi ke ke keinanga fakalaumālie aí.

• ʻOua ʻe kai ʻa e meʻakai kuo tuʻungafulufuluá. Ka ʻi ai ha meʻa ʻoku ʻikai lelei ki he Laumālie Māʻoniʻoní ʻoku kovi ia ki ho laumālié. Ko e ponokalafí, ngaahi fakafiefia ʻoku makaka mo taʻefeʻungá pea mo e ngaahi fasi ʻoku ʻikai maʻá ʻoku kona ʻaupito.

• ʻOku fakaofo ʻa e lahi ʻo e meʻa fakatupu moʻui lelei ʻoku maʻu ʻi he kihiʻi konga mā siʻisiʻi mo e maʻanga vaí, ʻi he taimi ʻokú ke toʻo ai ʻa e sākalamēnití ʻi he faʻa fakakaukau mo e lotu lahi ʻi he loto fakatomalá.

Fakamālohisino

• Fai ha tokoni pea fakahā mo e angaʻofa. Ko hono langaki hake ʻo e kakaí ko ha fakamālohisino lelei ia.

• Peluki ho tuí ʻo ʻoua naʻa toe siʻi hifo ʻi he tuʻo ua ʻi he ʻaho. ʻOku mahuʻinga ʻa e faʻa lotú ki he mohu ivi fakalaumālié.

• Faʻa fakahoko hoʻo fakamoʻoní. ʻOku hangē ia ko ha uoua ʻoku fakaʻau ke mālohi ange ʻi hono toutou fakaʻaongaʻí.