Gauna ni Veiwasei

Sa Noqu iVakabula o Jisu Karisito

Mai vei Cheryl Esplin

“Oi au na sala, kei na vu-ni-dina, kei na vu-ni-bula; sa sega ni torovi Tamaqu walega e dua na tamata, ena vukuqu ga” (Joni 14:6).

Ni bera na nona biuti keda mai ki vuravura na Tamada Vakalomalagi, a digitaki Jisu Karisito me noda iliuliu ka iVakabula. O a digitaka mo muri Jisu Karisito ni bera ni ko mai sucu.

Ni sa tadu mai ko Jisu ki vuravura, a mai vakavulica o Koya na kosipeli ka tauyavutaka na Nona Lotu. A maroroya tiko na Nona yalayala me noda iVakabula A vakararawataki, mate ka tucaketale me rawa kina ni da tucaketale ka bula vata tale kei Tamada Vakalomalagi kei na noda matavuvale.

E vakavulica vei keda na ivolanikalou na levu ni veivakalougatataki sa vakarautaka rawa tu o Jisu Karisito. O se nanuma tiko beka na tadra nei Liai? A raica o Liai e dua na vunikau. O ya na vunikau ni loloma i Tamada Vakalomalagi kei Jisu Karisito.

Na vua ni vunikau oqo ena vakamarautaki ira na tamata. A kania o Liai na vuanikau oqo, ka dua na ka na nona marau. Sa gadreva sara o Liai me ratou kania na vuanikau o ya na nona matavuvale taucoko. (Raica 1 Nifai 8:10–12).

Na vuanikau oqo sai koya na veivakalougatataki eda na ciqoma ena vuku i Jisu Karisito kei na Nona Veisorovaki. Eda na kania na vuanikau oqo ni da nuitaki Jisu Karisito tiko, ka da papitaiso ka ciqoma na Yalo Tabu, ni da bulataka tiko na kosipeli ka vakila na loloma ni iVakabula.

iTaviqaravi

Kotiva laivi na tabana T5, ka vakabira ki na dua na pepa vavaku levu. Tava na laini vulavula ena vunikau, ka kotiva laivi na vuanikau. Ena vuanikau yadua, raica na ivolanikalou, me baleta na veivakalougatataki sa solia mai vei keda na Tamada Vakalomalagi, ka vola ena laini. Vakabira na vuanikau ki na vanua sa tavai tu ena vunikau

Moronai 6:8______________

Mosaia 16:7–8______________

Vakasama ni Gauna ni Veiwasei

Ena bula taumada, au a digitaka meu muri Jisu Karisito. Kerei ira na gone me ra tukuna mai na veika era sa digitaka ena siga o ya (me ra dara, kania, kei na veika tale eso). Vola ena papanivolavola na veika era tukuna. Vakamacalataka ni sa solia tu vei keda na Tamada Vakalomalagi na galala ni digidigi, me da vakatulewa kina. Vakavulica na veika me baleta na Matabose mai Lomalagi, ena gauna a vakaraitaka kina o Tamada Vakalomalagi na Nona ituvatuva. Vakamacalataka ni vakayagataki ni noda digidigi sa tiki bibi ni ituvatuva o ya. Vukei ira na gone me ra kila vakavinaka ni a gadreva o Setani me veisautaka na ituvatuva o ya ka kauta laivi na noda lewa me da digidigi. A gadreva o Jisu Karisito me muria na ituvatuva ni Tamada Vakalomalagi ka bolea me noda iVakabula. Vakabibitaka vei ira na gone ni ra a digitaka me ra muri Jisu Karisito (raica Lalai 6, lesoni 2). Vola eso na taro me ra vukei na gone me ra raicalesu na veika era sa vulica. Biuti ira na taro oqo ki na dua na koniteina. Digitaka e dua na gone me tomika e dua na taro mai na koniteina ka me sauma. Oti me qai digitaka na gone oqo e dua tale na gone me tomika e dua na taro ka sauma. Tomana tiko ke vo na gauna. Wasea na nomu ivakadinadina me baleta na bibi me da muri Jisu Karisito tikoga.
Keitou na tucaketale vakamatavuvale. Ni bera na veivakadonui nei bisopi se peresitedi ni tabana, sureta e dua na lewenilotu sa mate e dua na nona daulomani me mai wasea na nona ivakadinadina me baleta na ibalebale ni Tucaketale vua. Biuti ira vata na iYaloyalo Taurivaki ni Kosipeli oqo ena kena ituvatuva oqo me toka e cake na 227: 227 (Masu o Jisu e Kecisemani), 228 (Sa Soli Yani o Jisu), 230 (Lauvako ena Kauveilatai), 231 (iBulubulu i Jisu), 233 (Meri kei na Turaga sa Tucaketale), 234 (Sa Vakaraitaka o Jisu na Nona Mavoa), kei na 316 (E Veivakavulici o Jisu ena Ra kei Vuravura). Me tabaki na piano, ena gauna era solia wavoki tiko kina na gone e dua na vatu lailai. Tukuna vei ira ni vatu sa ivakatakarakara tiko ni vatu a vaqiqici laivi mai na ibulubulu i Jisu Karisito. Ni sa mudu na ivakatagi, na gone e taura tiko na vatu me qai taura e dua na iyaloyalo mai na ibinibini ni yaloyalo ka vakamacalataka se digia e dua na gone me vukei koya. Me vaka tiko oqori me yacova ni sa vakamacalataki oti na 234 ka me ra wilika vata na Luke 24:39 na gone. Vakamacalataka vei ira na gone me ra kila ni gauna sa tucaketale kina o Jisu, era tara na iApositolo na mawe ni mavoa e Ligana me vakataka ga ni ra tara na ligadra na gone. Me ra qai vakamacalataki kece sara na vo ni iyaloyalo. Vakavulica ni vuku ga ni Veisorovaki i Jisu Karisito, o ira kece era na bula e vuravura oqo era na tucaketale. Me qai wasea na nona ivakadinadina na vulagi a sureti mai.

Droini mai vei Brad Teare