Vakasama ni Lotu Vakamatavuvale

Sa rawa me taurivaki na veivakasama oqo ena gauna ni kalasi ka vakakina ena vuvale. Sa rawa mo veiganititaka na veivakasama oqo ki na nomu matavuvale se kalasi.

“Na Cava na iBalebale ni Veisorovaki Vei Iko?” t. 14: Sureta na nomu matavuvale me ratou wasea na veika kece eratou kila baleti Nifai. Taroga na vuna a marau tu ga kina ena gauna mada ga a sotava tu kina na dredre levu (raica 2 Nifai 5:27). Vakalekalekataka na wase “Bula Marau ena vuku ni Veisorovaki.” Veivosakitaka na sala a walia rawa kina o Nifai na nona leqa ka me vakayacori ki na nomu matavuvale. Tinia ena kena wiliki na iotioti ni rua na parakaravu ni itukutuku.

“Vuli kei Ira na Yalododonu Edaidai,” t. 26: Mo wilika mada na itukutuku ka digitaka na parakaravu e vakaibalebale vakalevu cake ki na nomu matavuvale. Kerei iratou na lewe ni nomu matavuvale me ratou wilika na parakaravu sa digitaki ka me veivosakitaki. Tinia mo wilika na iotioti ni rua na parakaravu ni itukutuku.

“Na Nona Yalayala e Dua na Profita,” t. T6: Ni wiliki oti na itukutuku, me ra saga na matavuvale me ra wilika vakatobuicu na ivolanikalou eso. Me veivosakitaki ni wiliki na ivolanikalou ena vakalougatataka na lewe ni matavuvale yadua. Me wiliki tale na yalayala nei Peresitedi Ezra Taft Benson (raica na ivakatekivu ni itukutuku), ka me tomani na inakinaki oqo ni wiliki vata na ivolanikalou.

“Maqusa ena Vuli,” t. T12: Sureti iratou na gone me ra tu vakayadudua ka vakatakarakarataka e dua na cakacaka, ka me ra vakilakila o ira na kena vo. Me veivosakitaki na veika me ra vulica mada na matavuvale me ra rawata kina na cakacaka o ya. Wilika na italanoa. Vakaraitaka na veika a gadreva o Russell me kila mada ni bera ni vulica na veika baleti ira na dainaso. Tinia mo wilika na Vunau kei na Veiyalayalati 88:118.