iVaqa ni Siko Vuvale

Vakasaqara Vagumatua na iVolanikalou

Vakavulica na ivolanikalou kei na veivosacavuti ena vukei ira na marama o sikova me ra kila vakavinaka na ivakavuvuli oqo. Sureti ira ko vakatavulica tiko me ra wasea mai na veika era sa vakila ka vulica.

Na Cava me Vulici kina na iVolanikalou?

Peresitedi Howard W. Hunter (1907–95): “Au sa solia vei kemuni na ivakatakila ni Kalou ni sai koya na ivakarau me da bula voli kina ka sa ivakarau me da tuvanaka kina na noda vakatulewa kei na cakacaka yadua. Ni dau yaco mai na nuiqawaqawa kei na bolebole, sotava yani ena nomu wilika na ivolanikalou ka vuki vei ira na parofita” (“Fear Not, Little Flock,” ena1988–89 Devotional and Fireside Speeches [1989], 112).

Peresitedi Ezra Taft Benson (1899–1994): “Na bula rawata na ivalavala dodonu, na kaukauwa me vorati kina na veilawakitaki kei na veitemaki, dusimaki tiko ena noda bula e veisiga, vakabulai ni yalo—oqo e vica na yalayala sa solia mai na Turaga vei ira era na lako mai ki na Nona vosa. … Na veivakalougatataki eso era na kunei ga ena ivolanikalou, o ya na lakovi ni vosa ni Turaga ka ququmi matua tiko kina. …

“… Vakadeitaki iko tale mo vulica na ivolanikalou. Mo wilika tikoga ena veisiga ena qai vakatikori vei iko na kaukauwa ni Yalotabu mo qaqaco ena nomu ilesilesi. Wilika vei iratou na nomu matavuvale ka vakavulici iratou na gone me ratou taleitaka ka vakasakita” (“The Power of the Word,” Ensign, Me 1986, 82).

Peresitedi Spencer W. Kimball (1895–1985): “Ni ko sa kila vakavinaka cake tikoga na veika dina ni ivolanikalou, ena yaco me na mana vei iko na ikarua ni vunau cecere, o ya ko na lomana na wekamu me vakataki iko. Mo kenadau ena ivolanikalou—ka mo kakua ni beca kina e dua, ia mo laveti ira cake kina! Sa dina sara, o cei e gadreva cake vakalevu me ‘vakaiyau’ ena dina ni kosipeli (ni ra na gadreva ena gauna dredre) mai vei ira na marama kei na tina era maqusa ena veisusu kei na veivakavulici?” (“The Role of Righteous Women,” Ensign, Nove. 1979, 102).

Me sa Noqu iYau Vakacava na iVolanikalou?

2 Nifai 4:15: “Au sa dautaleitaka nai volatabu ka vakananuma e lomaqu, kau sa vola me ivakavuvuli me ra vinaka kina na noqu kawa.”

Julie B. Beck, peresitedi raraba ni iSoqosoqo ni Veivukei: “E dua na sala uasivi ni tekivutaki ni vulici ni ivolanikalou o ya ni sa ‘vakamacalataki’ keda tiko (raica 1 Nifai 19:23). Eso era tekivu ena nodra digitaka e dua na ulutaga e tiko ena Topical Guide era vinakata me ra kila vakavinaka cake. Se era na tekivu ena dua na ivola ena ivolanikalou me ra vakasaqara e dua na ivakavuvuli. …

“Se sala cava ga e tekivu kina e dua me vulica na ivolanikalou, na kena iusutu ga o ya me tomana tikoga na kena vulici. Au sega ni wale na vakasaqara na iyau levu ni dina ni ivolanikalou baleta ni ‘tukuni vakamacala vei [keda] ena vosa macala sara’ (2 Nifai 32:7). Sa tukuni Karisito na ivolanikalou (raica Joni 5:39). Era tukuna vei keda na veika kece me da cakava (raica 2 Nifai 32:3). Era sa ‘vakavukui [keda] [me da] bula’ (2 Timoci 3:15).

“Mai na noqu wilika na ivolanikalou kei na veimasu era dau salavata kei na noqu vulica, au sa kila ka kina ka kauta mai na vakacegu ka vukea na noqu sasaga meu raimatua taumada ki na veika tawamudu. Baleta niu sa tekivuna na noqu wilika ena veisiga na ivolanikalou, au sa mai kila kina na Tamada Vakalomalagi, na Luvena o Jisu Karisito, kei na veika meu cakava meu uci Rau kina” (“Sa Dautaleitaka na Yaloqu na iVolanikalou,”Liaona kei na Ensign, Me 2004, 108–9).

Peresitedi Thomas S. Monson: “Era iyaya talei ena neitou vatavata na ivolanikalou. Era sa vakarautaka na kakana bula ki na noda vakasama kei na veidusimaki ki na noda bula” (“The Mighty Strength of the Relief Society,” Ensign, Nove. 1997, 95).

iTaba vakadroini mai vei Craig Dimond; ivakaraitaki e muri mai vei Shannon Gygi Christensen