iTokani ki na iTokani
Na Nona Yalayala E Dua na Parofita
“Dou vulica matua na vunau kece sa tu ena i vola oqo, ni sa dina ka dodonu; raica ena vakayacori vakaidina na parofisai kei na vosa ni yalayala kece sa tu kina” (V&V 1:37).
Ena noqu bula taucoko au sa vulica ni gauna eda muria kina na nodra ivakaro na noda parofita, eda na ciqoma na veivakalougatataki a yalataki tu. Ena koniferedi raraba ni Epereli 1986, a yalataka kina o Peresitedi Ezra Taft Benson (1899–1994) ni kevaka ena dau wiliki vakamatavuvale na ivolanikalou, ena tiko na Yalotabu ena loma ni nodra itikotiko. 1
Keirau a mani muria vakaveiwatini na ivakasala o ya. Ena veisiga keirau a tekivu wilika sara e dua na wase mai na iVola i Momani vata kei iratou na luvei keirau—o Jorge, 10; Susi, 9; kei Luis, 3 Ena veisiga yadua, keitou na wilika e yadua na tikina. E dina ga ni se bera ni wiliwili rawa o Luis, a via vakaitavi talega kina. Au tenei koya toka, me rai toka mai vei au, ka keirau taura tiko na iVola i Momani. Ni sa noqu gauna, au a dusia na vosa yadua me keirau raica, ka voqa levu na domo i Luis ni vakatotomuri au ni vuki cala tiko vua na ivola.
Ni sa vakarau yabaki lima, a taroga sara o Luis, “Au qai wiliwili ena gauna cava?”
Keitou a kaya ni sa na qase cake, me gole i koronivuli ka vulica kina na wili vola.
A kaya mai, “Au sa kila tu na wili vola!”
Au kurabui, kau solia sara vua na iVola i Momani. A vukica cala na ivola, rai e cake, ka matata na nona wiliwili. A vulica na wiliwili ni a vakamuria tiko na iVola i Momani!
Ni sa yabaki ono, keirau dau laki sikovi ira na lewe ni Lotu. Au dau kerei koya me wasea na nona ivakadinadina kei na tiki ni ivolanikalou kau a vakavulica vua. Ni gauna e dau wilika kina na iVola i Momani, e dau vukica sobu ka raica na yasana e cake.
Au vakadinadinataka ni gauna mo ni wilika kina na ivolanikalou ni ko se gone, ko na kila vakavinaka na yalayala ni Turaga ka kila na veika e vinakata o Koya vei iko. Ena dua na siga ko na yaco mo itubutubu ka vakaluveni. Vakavulici ira me ra wilika na ivolanikalou, ko na raica kina na mana ni yalayala e tiko e Na Vosa Vakaibalebale 22:6: “Vakatavulica na gone ena sala e dodonu me lako kina: ia ni sa qase mai ena sega ni lako tani mai kina.”
Sa vakacavara tiko o Luis na nona vuli ena univesiti ka sa cakacaka tiko. Ni dau bera mai na cakacaka, vuli, se itaviqaravi ni Lotu, ena mai wilika ga e dua na wase ni iVola i Momani me qai moce. Sa yaco vakaidina na veika a parofisaitaka na parofita: ni keitou a wilika na ivolanikalou oqo, ka vakalougatataki vakalevu na neitou matavuvale ka qaqaco sara na neitou duavata tiko.
Au sa veisureti mo ni wilika e veisiga na ivolanikalou. Ke rawa, mo ni wilika vakamatavuvale. Au sa vakayaloqaqataki kemuni na cauravou mo ni kaulotu. Au sureti kemuni kece mo ni laki vauci tawamudu ena valetabu. Meu tinia mo ni nanuma tiko na nona ivakasala vakalou vei keda o Peresitedi Gordon B. Hinckley (1910–2008), o ya: “O ni gadreva na vuli taucoko o ni rawata. … Se ena ripeataki kato ni wai liliwa, se dauveisele vinaka, ka mo dau vuli tikoga.”2
Kemuni na gone daulomani, vakarorogo vei qasenivuli, mo talairawarawa ena loma ni kalasi, gugumatua sara, ka mo qaqa sara ena vuli. Sa tiko na veivakalougatataki cecere ni Turaga baleti iko kei nomu matavuvale. E noda ilesilesi me da “”muria na parofita; ni kila na sala.”3
Ni oti toka ga na nona papitaiso, ni se yabaki 16 tiko.
Na luvena o Luis ni se yabaki va.
E lolomataka mai na itaba o Elder Octaviano Tenorio; droini mai vei Robert A. McKay