Taro kei na Kena iSau

“Rau sa sega tu ni laki Lotu o noqu itubutubu. Meu na tudei vakacava ni rau sega ni tokoni au?”

Oqo e dua na gauna dredre baleta ni o ira sara ga na itubutubu e dodonu me ra veidusimaki ka veivakasalataki. Ia e tu na veika o rawa ni cakava mo tudei tiko kina, ni o vakayacora na ka oqo ena vukei iko mo ivakaraitaki vinaka vei ira na nomu itubutubu.

Ni ko gadreva mo vakauqeti vakayalo ena nomu bula, mo ia tikoga na masu ka vulica na ivolanikalou. E dau rogoca na nomu masu na TamadaVakalomalagi ka na sauma mai.

Lako vei ira na wekamu se lewe ni Lotu me baleta na ivakaraitaki vinaka kei na veitokoni o gadreva tiko. Kena ivakaraitaki, kerei koya nomu dauveituberi ni matavuvale se bisopi se peresitedi ni tabana me masulaki iko vakamatabete kevaka e sega ni tiko e dua na lewe ni matabete kilikili e nomu vale.

Sa rawa mo na vaqaqacotaki iratou na tacimu kei na itubutubu ena ivakaraitaki ni nomu vakabauta. Sa rawa mo dou vakayacora vata kei iratou na tacimu na lotu vakamatavuvale, masu vakamatavuvale, se vuli ivolanikalou vakamatavuvale. E rawa ni rau oka talega kina na nomu itubutubu.

Kena iusutu ga mo lomani rau tikoga na nomu itubutubu. Kakua ni vakalewai rau. Ia, mo itovo vinaka ka dau vosota tiko. Rau se gadreva tikoga na nomu loloma kei na veitokoni, me vaka o gadreva tiko mai vei rau.

Masulaki Rau Nomu iTubutubu

Sureti rau nomu itubutubu ki na masu vakamatavuvale. Sureti rau ki na veitaviqaravi ni Lotu. Vakarautaka na lotu vakamatavuvale. Masulaki rau vagumatua, ka mo ivakaraitaki vinaka tikoga. Oqo ena vaqaqacotaka na nomu matavuvale kei na nomu ivakadinadina, ko na yalo vakacegu, ka na vukei iko na Turaga mo tudei tikoga ena Lotu. Vakayacora ena vakabauta kei na yalodina, ka na sauma mai o Koya na nomu masu.

Sonia B., 20, Yucatán, Mexico

Kakua ni Guce

E sega ni lewenilotu o tamaqu, ka ratou sa sega tu ni laki lotu o tinaqu kei rau na ganequ. E mosi vei au ni ratou vakawalena na noqu vakabauta. Ia sa qaqaco sara na noqu vakabauta niu lako ki semineri, lotu, kei na Muavata niu masu ka wilika na ivolanikalou. Na noqu ivakasala vinaka duadua o ya mo kakua ni guce.

Amanda B., 16, Nevada, USA

Na Sala Eso Mo Tudei Tiko

Au kila e dua na goneyalewa totoka e gugumatua sara ena Lotu ka dina ga ni rau sa luluqa tu vakalotu o rau na nona itubutubu. E veivakauqeti sara o koya vei ira na goneyalewa ka ni sa taura oti na nona metali ni Goneyalewa. A kaya o koya ni nona tokoni ira na goneyalewa me ra laki lotu ka dau qarava tiko vakavinaka na Tamada Vakalomalagi sa salatu cecere ni nona qaqaco tiko vakayalo.

Chelsea C., 17, Oklahoma, USA

E Dua na Vanua e Veitaqomaki

Sa noqu inuinui ga na wili ivolanikalou kei na masu me qaqaco kina na noqu ivakadinadina, ka dua na vanua e veitaqomaki o ya na vakaitavi ena Sikauti kei na parokaramu ni Cauravou kei na itutu au sa kacivi kina. E veivuke talega na vakamuria na ivakasala ni parofita kei na vakaitokani vinaka. Mo dau ivakaraitaki vinaka tiko ki na nomu matavuvale ena loloma dina, veikauwaitaki, kei na veidokai. Ke o na vakayacora na nomu itavi, ena vakayacora na Nona na Turaga.

Elder Whigham, 21, California San Francisco Mission

Yaloqaqa mai na Nodra iVakaraitaki

E luluqa tu vakalotu o tinaqu, ka ra sega ni lewenilotu o ira na wekaqu tale eso. Au sa nuitaki ira tiko na noqu iliuliu kei na itokani; ni ra dau vukei au. Era sa rui bibi ki na noqu bula ni ra dau vukei au sara vakalevu kei na noqu sasaga meu laki kaulotu. E dau vakayaloqaqataki au na nodra ivakaraitaki. E dodonu me ra vakavinavinakataki na nodra veikauwaitaki o ira era vakatorocaketaki keda vakalewenilotu ka kauwaitaki ira vakalevu cake, ni na yaco tikoga me da vulica e dua na ka vou.

Ivana S., 20, Buenos Aires, Argentina

Vakaraitaka Nomu Lomani Rau Nomu iTubutubu

Mo dau veivosaki vakalevu kei rau nomu itubutubu, ka tovolea me rau tokoni iko. Vakaraitaka vei rau na nomu vakavinavinaka kei na loloma, ka tukuna ni bibi vei iko na laki lotu. Kerei ira na iliuliu me ra mai vakavodoki iko, ka kerei bisopi me mai veivosaki kei rau nomu itubutubu. Masu ka kerea na veitokoni ni Tamada Vakalomalagi, ka masulaki rau nomu itubutubu me rau raica ni bibi vei iko mo tudei tikoga. Ko na qaqaco talega ni ko wilika ena veisiga na iVola i Momani ka muria na vunau.

Craig L., 16, Missouri, USA

E Rua na Gacagaca ni Veitokoni

Au a raica vakalevu na ka oqo ena noqu kaulotu, ka ra yaloqaqa o ira na gone era sotava na ka oqo. Era cakava vakacava? Ena nodra tauyavutaka e dua na gacagaca ena loma ni Lotu vei ira na itokani kei na iliuliu ena dua na gacagaca veitokoni vata kei na Turaga ena masu, wili ivolanikalou ena veisiga, kei na laki Lotu. O na rawata rawa ni ko cakava na veika oqo!

Elder Jones, 21, Tahiti Papeete Mission

Sa Rawa Mo Vaqaqacotaka na Nomu Matavuvale

“Me iSakisaki ni iTabagone e vakavotuya vei keda ni ‘sa dua na veivakalougatataki levu na lewena e dua na vuvale. … E sega ni ra tautauvata na matavuvale, ia era bibi kecega ena yavu ni Tamada Vakalomalagi’ ([ivola lailai, 2001], 10).

“Sa gadrevi me ra vaqaqacotaki na veimatavuvale kecega, mai na kena e vinaka ki na kena e vakaleqai vakalevu duadua. Sa rawa sara ga mo veivaqaqacotaki o iko. Na kena dina, ni so na matavuvale sai iko sara beka ga na ivurevure duadua ni kaukauwa vakayalo. Sa nuitaki iko tu na Turaga mo na kauta mai na veivakalougatataki ni kosipeli ki na nomu matavuvale.

‘Sa ka bibi dina me tauyavutaki e dua na bula vakaivakarau ni ivalavala dodonu ki na nomu bula vakai iko, ka me rawa kina vei iko mo ivakaraitaki vinaka ki na nomu matavuvale, se cava ga na draki ena curuma yani na nomu matavuvale.”

Mary N. Cook, imatai ni daunivakasala ena mataveiliutaki raraba ni Goneyalewa, “Vaqaqacotaka na iTikotiko kei na Matavuvale,” Liaona kei na Ensign, Nove. 2007, 11.