Sega ni Waqari na Waiwai ni Bogi
Ni sa yaco mai na siga ni qeretueti ena koliji, au raica ni ivakavuvuli ni kosipeli sa vakalougatataka na noqu bula vakayago—vakakina na noqu bula —vakayalo.
Ena gauna mada ga niu se goneyalewa, e vuqa na noqu veikacivi ena Lotu au a vakaitavi tiko ena Lalai, oqo a vakauqeti au meu laki saga na noqu koroi ni vakavulici ni gone. Ia na vaqara koroi oqo a sega walega ni sala a vakayavalata kina na noqu vuli na ivakavuvuli ni Lotu. A matata sara na ka oqo niu sa vakarau qeretueti tiko.
Na iotioti ni cakacaka o ya meu vakarautaka e dua na pepa meu tutaka ena dua na veivakatarogi vei iratou e tolu na dauvakatulewa. Eratou vakatulewa e tolu na noqu qasenivuli ena kalasi.
Au sa vakarautaka rawa na noqu pepa, kau gole ena yakavi o ya i nodratou vale o noqu itau cauravou. Niu vakarau lesu mai, a vosa vakanuinui vinaka mai o tinana vaqo, “kevaka dou sa vakarau vinaka tu dou na sega ni rere” (V&V 38:30).
Sa mataka mai. Sa veiciciyaki na noqu vakasama. Au nanuma na noqu biuta mai na siti au a tubucake ka vuli torocake kina; kei na nodratou solibula na noqu matavuvale ena kena saumi. Sa sega ni rawa meu vakamaduataki iratou. Meu sa na rawata vinaka sara na noqu veitarogi oqo.
Era sa wawa veitarogi tale tu ga na noqu lewe ni kalasi. Keimami sa vakasamataka tiko na mataqali taro eratou na taroga na dauvakatulewa, ia au nuidei tiko niu a masu meu vukei baleta niu kila ni kila tiko na Kalou na noqu saga meu vakarautaka, vakadikeva, ka vola na noqu pepa.
Au sa kacivi sara. Niu sa vakamacalataka oti na noqu pepa vei iratou na dauvakatulewa, au sa tekivu saumi taro. Niu vakatarogi ena so na noqu iulutaga, a taroga e dua vei iratou, “E vica na auwa o a vakarautaka kina na nomu pepa oqo?
“Levu sara” au sauma. “E levu sara na gauna au vakayagataka kina me rogorogo vou.”
“O a waqara kina na waiwai ni bogi?”
“Sega, au sega ni dau vuli ena lomaloma ni bogi.” au a kaya. “Au dau tuvanaka vinaka na noqu cakacaka ena veisiga.”
Eratou a kurabui na dauvakatulewa tiko. A kaya mai o dauvakatulewa o ya, “E ka vou vei au ni ko sega ni vuli ena bogi. Keitou kila ni levu na nomu lewe ni kalasi era vuli ena bogi.”
A kaya mai e dua tale vei iratou, “Meu tukuni koya mada na gonevuli oqo. E vakayagataka vakavinaka na nona gauna. Au kaya oqo niu kilai koya. E vakarautaka na gauna ki na nona vuli, itokani, matavuvale, ka laki lotu talega.”
“E dina?” a kurabui kina na dauvakatulewa tale ka dua. “O lotu cava”
“Au lewe ni Lotu i Jisu Karisito ni Yalododonu Edaidai.”
“Io, au kila na lotu cava oqori,”a kaya e dua.
“Keimami vakavulici me keimami moce vakayakavi me keimami bulabula ena siga tarava.”
E vakacegu ka dei na yaloqu niu vakamacalataka na kosipeli, ena gauna mada ga a tarogi kina na noqu lotu ena dua na veitarogi cecere ni vuli.
“A volai na nomu pepa ena qaqa kei na nuidei. E totoka dina. Au vakabauta ni vu talega ena ivakarau tudei ni Lotu o sa tuberi kina.”
“Io” au a kaya. “Au a vakavulici ena lotu ena tuberi ira na gone, ka a vukei au ena noqu koroi.”
“E totoka sara na nomu vakarautaka,” a kaya e dua vei iratou. “Keitou nuitaka ni ko na laki lotu tikoga, baleta ni ko sa rawata rawa kina e vuqa na nomu iyavunibula.”
Au sa kerei sara meu sa lesu me ratou na vakatulewa mada. Ni oti e rua na miniti ratou sa kacivi au tale.
“A sega ni dredre me keitou vakatulewa. Me baleta ni ko ivakaraitaki vinaka, totoka ni kemu maka, kei na pepa o mai tutaka nikua, sa duavata kina na neitou lewa mo sa qeretueti, ena kena cecere duadua. O sa kalougata!”
Niu sa laki tukuna i vale, eratou a tagi ena marau.
Au vakadinadinataka ni gauna e vakaroti keda kina na Tamada Vakalomalagi me da “moce vakayakavi mo dou bulabula kina; dou yadra vakamataka lailai me makutu kina na yagomudou kei na yalomudou” (V&V 88:124), sa Nona inaki ga me vakalougatataki keda kina. Au sa vakavinavinaka Vua ni sa solia mai na kosipeli me da marau kina ena veigacagaca kece ni noda bula.
iTaba vakadroini mai vei Christina Smith