Mai Rogoca na Domona E Dua na Parofita

Lesu Bula Vua na Tamada Vakalomalagi

Mai vei Peresitedi Dieter F. Uchtdorf

iKarua ni Daunivakasala ena Mataveiliutaki Taumada

E dua na vosa mai na koniferedi raraba ni Epereli 2007.

E vakavulica o Peresitedi Uchdtorf ni vuku ga ni Veisorovaki, sa rawa me da veivutuni ka bula ena inuinui.

Gauna ni Lesu Bula Mai

Ena gauna au a se vuli pailate ni waqavuka tiko kina, e a gadrevi kina meu vulica na iwalewale ni kena dau vukataki vakabalavu na waqavuka. O ya na kena vuka baleti na veiwasawasa lelevu, vuka takosovi na veivanua dravuisiga vakaitamera, kei na vuka curuma yani na veimatanitu era toka veitikivi ka sa gadrevi kina na ituvatuva maqosa me yacovi rawa kina na vanua e vukaci tiko. Eso vei ira na vuka balavu oqo e rawa ni dau laki yacova sara me 14 na auwa na kena dede ka 9,000 na maile na kena yawa.

E dau tiko e dua na gauna ni vakatulewa bibi ena gauna ni vuka balavu vakaoqo ka dau vakatokai tu me gauna ni lesu bula mai. Ni sa dau yacovi na gauna vakaoqo sa dau vo toka ga ena waqavuka na waiwai me saumaki ka lesu bula mai ki na rara ni waqavuka ka vuka yani kina. Ni sa dau sivi na gauna ni lesu bula mai, sa sega ni rawa vei pailate me saumaki mai ia me sa tomana ga yani ki liu na ilakolako. Oqo gona na vuna e dau vakatokai tu kina na gauna vakaoqo me gauna ni sega ni lesu rawa mai.

E Se Rawa Tiko

E vinakata o Setani me da nanuma ni gauna eda caka cala kina eda sa sivia na “gauna ni sega ni lesu rawa mai”—ni sa sega ni rawa me da veisautaka na noda ilakolako. Na Veisorovaki i Jisu Karisito sa isolisoli ni Kalou vei ira na Luvena me vakasavasavataki ka rawai na isau ni ivalavala ca. A mai vakabulai keda na Karisito. Kevaka eda sa muri cala, sa rawa me solia vei keda na Veisorovaki i Jisu Karisito na veivakadeitaki ni ivalavala ca e sega ni gauna ni sega ni lesu rawa mai. Ena rawa na lesu bula mai kevaka me da muria na yavu ni veivakabulai ni Kalou.

E Dau Tu Ga na iNuinui

Na veivanua cava ga o lakova tiko ena bula oqo, se veivakatovolei o na curuma, e tikoga na gauna ni lesu bula mai; ka tu ga na inuinui. O iko na kavetani ni nomu bula, ka sa vakarautaka tu na Kalou e dua na ituvatuva mo lesu bula mai Vua, ki na nomu itikotiko vakalou.

Na isolisoli ni Veisorovaki i Jisu Karisito e vakarautaka vei keda ena gauna kei na veivanua taucoko na veivakalougatataki ni veivutuni kei na veivosoti. Ena vuku ni isolisoli oqo, sa soli kina vei keda kece sara, na madigi me da lesu bula mai na veivakarusai ni ivalavala ca. Sa na keda isau na bula marau ena bula oqo kei na reki tawamudu ena bula e tarava kevaka me da digitaka ka bulataka na isolisoli oqo mai Vua na Tamada Vakalomalagi.

Na Veika Me da na Vakasamataka

1. Na veigauna kece o veivutuni kina ka votai ena sakaramede, ko na savasava tale me vaka ga na gauna o a papitaiso ka vakadeitaki kina. Ena gauna ni sakaramede, vakasamataka na Nona lomani iko tiko o Jisu ka me rawa kina mo veivutuni ka bula marau.

2. Vakasamataka mada e dua na gauna o a kila ni ko sa caka cala. Na cava e vinakata vei iko o Tamada Vakalomalagi mo cakava ni yaco na ka oqo? Na cava e bibi kina mo veivutuni ena gauna sara ga o sa kila kina ni ko sa caka cala?

3. Ena vukei iko vakacava na muria na vunau mo muria kina na ituvatuva nei Tamada Vakalomalagi mo vakabulai kina? Na cava eso na sala e taqomaki iko kina na talairawarawa?

Droini mai vei Scott Greer