Na Domo ni Vakatawa Vinaka
Sa yabaki 70 na noqu susu manumanu, kau noqu isakisaki na vunau vakaibalebale ni ivakatawa vinaka, ka tiko ena Joni 10:1–18, au a bulataka sara ga. Na veika e sotavi oqo a kaukauwa sara na kena mana na vunau vakaibalebale oqo.
Ena gauna ni ivolatabu era dau kaci yani na ivakatawa yadua vei ira na nona sipi ena loma ni qele ni sipi era cokovata tu ena dua na bogi (raica na tt. 3–4). Sa vakakina, niu dau tosoi ira na noqu sipi, au dau kacivi ira ga, ka ra muri au.
Ena vuqa na yabaki sa oti, a tauvimate o Alice na noqu neiba yabaki 96 ena gauna ni nodra vakasucumi na sipi, kau a vukei koya sara ena nodra vakatawani ena bogi. Niu vakarau curuma na nona vale ni vakasucu sipi ena imatai ni bogi “meu cakacaka kina” sa ra davo moce no na nona sipi yalewa e voleka ni 100. Niu sa tu e matadra, era totolo na nodra kila niu tamata tani. Era rere, ka ra laki veiosooso toka ena dua na tutu me ra taqomaki ira. (raica na t.5).
A vakatiko oqo me vica na bogi. Se cava ga na totolo ni noqu curu yani era rere ka ra dro na sipi. Au sa qai vosa vakamalua vei ira na sipi era se qai sucu kei ira na ka yalewa niu qaravi ira tiko. Ena ika lima ni bogi era sa sega ni rere niu sa laki cakacaka maliwai ira. Era sa tekivu kila na domoqu ka vakabauti au.
E muri au a qai laki tukuna vei Alice niu dau vakania ena tavaya e vica na nona sipi luveniyali. Na bama o ya na luve ni sipi sa mate o tinana se sa sega ni to na sucuna.) Au a vakatotomuria na domoi Alice, ka kacivi ira na nona sipi. “Mai, BaBa! Mai, BaBa!” Au namaka me ra cicivi au mai ni ra dau cakava vei Alice. Ia a sega ni bau rai mada la mai e dua na sipi. A qai tu ena mata ni nona valenikuro o Alice ka kaci. Ni ra sa rogocana domona, era cici vakatotolo vua, ka ra gunuva na medra sucu.
Keirau sa nakita sara kei Alice me keirau vakatovotovo mada. Au a tucake tu ena noqu bai ni sipi, ka vakatotomuria o Alice na domoqu: “Mai, sipi, sipi,! Mai sipi, sipi!” ka sega ni dua e toso mai. Ia ena gauna au qai kaci kina ena vosa vata ga o ya, era vakavolivoliti au sara vakatotolo. E dina ga ni tautauvata na vosa keirau a vakayagataka me ra kacivi kina na sipi, a sega ni rogoci ena duidui ni domoi keirau. Era a dinata duadua ga na sipi na voqa ni domo i nodra ivakatawa (raica na t.4)
Joni 10 e tukuna na kedrau duidui na ivakatawa mai na ivakatawa sa dau saumi vakailavo. Na ivakatawa vinaka, ena taqomaka na nodra bula, na nona qele ni sipi. Ni vakatauvatataki, na ivakatawa e “voli na nona cakacaka” e “sega ni daunanumi ira na sipi” (t.13). Na vosa vakatautauvata e vakavulica talega ni na dro o ivakatawa saumi ka biuti ira na nona sipi (raica t. 12), na ivakatawa vinaka ena solia na nona bula ena vukudra na nona sipi (raica t. 11). Sa cakava dina na ka oqo na noda iVakatawa Vinaka—na noda iVakabula, o Jisu Karisito—sa solia na Nona bula ena loloma me baleti keda (raica tt. 15, 17–18).
Ena veika sa yaco oqo sa vakadeitaka kina e dua na itukutuku bibi ni vosa vakatautauvata oqo: o ya na sasaga me da kila vakaikeda yadua na noda iVakatawa Vinaka ka kila rawa tu na Domona me da kakua ni vakacalai ena domo tani ni ivakatawa saumi. Ni da vakamuria ena yalodina na domoi koya na iVakatawa Vinaka—ka sega tale ni dua—me da na dusimaki yani ki na taqomaki tawamudu.
A Noqu iVakatawa ko Jiova, mai vei Simon Dewey, lolomataka na Altus Fine Art, American Fork, Utah